TROY & THEODORA POLAMALU POLOKALAMA FOU MO FANAU

O le masina fou e taliu mai le ali'i lauiloa o Troy Polamalu ma lona faletua Theodora e fa'aauau le la'ua polokalama fa'apitoa mo le fanau a Amerika Samoa - Fa'asamoa Initiative.

Peita'i, ua fa'atulaga i le taimi nei se suiga, ua le toe pa'au mai e fa'aleleia tomai tauva o le fanau talavou i aoga, ae ua manatu ina ia fa'atauva le fanau i tomai tau le pesega, ma le fa'atinoga o agava'a e fa'afiafia ma isi pese.

Ua tapena mai e i la'ua se vaega o tagata e filifilia toto'a nisi siufofoga lelei i le Usuina o pese ma o le a fili fa'apitoa mai ia i latou o le a mafai ona fa'aulu a latou talosaga e fa'auia atu lea i feso'ota'iga tafa'ilagi i komipiuta, ma o i latou na e fa'atauva, ae maimoaina ma fa'amasinoina e sui iloga i fa'afiafiaga fa'apea e malaga mai - Tony Black ma Margot Bingham mai Niu Ioka.

Ua fa'asalalauina fa'apitoa i le Samoa News le ala e fa'auia ai talosaga mo avanoa e tauva ai, mo le to'a 10 pito i agava'a, ma o le to'alua o nei sui, tulaga lua ma le togislia o le a malaga i Niu Ioka mo le tauvaga.

O tausaga o i latou o le talia talosaga e tauva ai iinei mo sou avanoa i le to'asefulu e saili ai sui e malaga i Niu Ioka e amata mai le 7 tausaga seia o'o i le 19 tausaga le matutua.

O i latou fo'i nei e ao ina mafai ona talosaga sona tusi folau Amerika. Ma e fa'atino fo'i e le sui e filifilia mo le tauvaga iinei, sau pese ae fa'atino ma lau siva e fa'afetauia lea i upu o lau pese.

O le mea muamua lava e ao ina faia e sui e fia talosaga, o le lesitala lea o suiafa i le Orphaned Starfish Computer Labs i le Pacific Island Foundation i le latou Ofisa autu i le Moso'oi Building #2 i Ottoville Tafuna.

E tatau ona e mua'i pu'ea sau video po'o le ata fa'asolo e ta'i 30sekone i le 60sekone lona umi. E tasi le video o se pese samoa mai so'o se atumotu o le pasefika ma se pese fo'i ua e tusia ma fatu, ma e tatau ona e pikia lelei se vaega o lau pese e fa'ailo ai le lelei tele o lou leo.

E ao ina e pu'ea lau video pese i le Orphaned Starfish Computer Lab. Afai e le mafai ona e o'o ane i lea Ofisa, e mafai ona e fa'afesoota'ia le Pacific Island Foundation mo se fesoasoani mo oe lea e tauva.

E mafai ona e fa'aaogaina sau kitara po'o se ukulele, po'o se okeni i lau pese. O le taimi e amata ai ona fa'aulu talosaga mo nei avanoa o Iulai 1 se'ia o'o ia Iulai 31, 2018.

O le aumalaga lava e pa'u i ai le fa'amasinoina o sui tauva uma, ae maise fo'i, e ao ina mae'a uma tauvaga a'o le'i o'o ia Aukuso 25, 2018.

O le sui e manumalo e totogia uma e le Fa'asamoa Iniative lona pasese ma le tausiga o ia atoa ai ma le nofoaga e alaala ai, a'o alofaiva e tauva i le tauvaga tele e faatautaia e le Orphaned Starfish Gala i New York City, setete o Niu Ioka.

TUTULU DOMATA PEKO; PAGATIA FEAGAI MA TALAVAI A MATUA

Na maua se avanoa na toe fa'ailoa ai se taofi o le ali'i ta'alo Football mai Lauli'i Domata Peko, e fa'amatala ai ona lagona o'otia na ala ai ona maligi ona loimata a'o saunoa e tusa o lona fa'anaunauga ia i ai se isi falema'i e mafai ona gasolo i ai o tatou tagata.

Sa ia fa'ailoa mai, "E mautinoa le faigata o lo'o feagai ma nai o tatou matua matutua, e taumafai ona si'ima'i atu i fafo, ae ua le toe manana'o i latou e o atu mamao, ona o le umi o nonofo i totonu o va'alele ma le maualuluga fo'i o feoa'iga, paga lea, e ui ina faigata, ae ua malaga atu lava ina ia saili togafitiga i ma'ivale ua a'afia ai. O le ala fo'i lea o le le auai mai o nai o'u matua i lenei fa'amoemoe, ona o lo'o i ai i fafo mo talavai a si o'u tama."

"E le gata i lea, ae le taugofie lava feoa'iga, o pasese mo matua e taugata i le mamao, ae tele le mea o le tau o talavai, ae o le nonofo ai fo'i i fafo, toe fa'aopoopo i ai ma tau o pasese, ae le mafai fo'i ona femalaga'i na'o i latou, e malaga fo'i ma se isi e va'aia i latou i nei faigamalaga uumi. O mea na e tau ai le va'ai ma lagona ai le vaivai o le loto, aua a maua iinei ituaiga togafitiga eseese ua maua i fafo, ou te iloa lelei e nonofo lelei i latou i le malu o tatou aiga, tapua'ia o matou faiva fa'atasi ai ma isi fanau uma i fafo, ma maua fo'i le taimi e toe mafuta ai ma nai fanau i le lumana'i, pe a taliu manuia mai."

O le falema'i fou ua fuafua lelei e amata ona galue'aina ia Aukuso 2018, ma ua pasia fo'i le Kamupani Faufale a le PRIMO Builders latou te fa'atautaia lea galuega tele.

LISI PARAMOUNT BUILDERS VAEGA UAFU I FAGATOGO

O se vaega o le uafu i Fagatogo, lea ua fa’aigoaina o le service wharf, ua maea on a lisi e le Paramount Builders. Taua e le peresitene o le kamupani, Papali'itele Lauli'i Alofa ua mae'a lisia e lana pisinisi se vaega o le uafu ina ia mafai ona ia fa'afeso'ota'ia ai le tautuaina o va'a e taula mai i le Uafu, ae o lo'o fela'ua'ia pusa oloa fa'afulisa.

O le vaega fou lea o se pisinisi ua ia fa'atula'ia, ma e mafai ona ia fa'afeso'o'ia fulisa tetele nei a va'a oloa i le sapalai o le eletise mai le ASPA, ma o le a maua ai fo'i se tamaoaiga mo le ASPA latou.

Ua le mafai ona fa'ailoa fa'alaua'itele mai e Alofa aiaiga o le latou feagaiga tau lisi ma le Matagaluega o Uafu ma Malaeva'alele, lea ua fa'agaoioia ai lana pisinisi fou lenei i le Uafu Tele i Fagatogo.

I le taimi atoa fo'i o le a fa'aauau ona fa'atutu ai nei Pusa Oloa Fa'afulisa i luga o le vaega lea o le Uafu e tautuaina e le Paramount i lana tautua fou, o le a fa'aauau ona fa'aaogaina le sapalai eletise a le ASPA ma totogia lana lisi i lea vaega o le tautua, se'ia o'o lava i le taimi e ave'esea mai ai lea pusa oloa i tua mai le uafu.

I le taimi nei, o le tele o va'a o lo'o fa'aola e i latou a latou afi pe a taula mai, ina ia mafai ona fa'aaogaina e i latou le eletise a'o taula i le tatou uafu tele.Ua mafai fo'i ona maua se isi vaega o nei tautua e avea ma alagatupe maua a le Uafu tele a'o tautuaina va'a e ulufale mai ma taula i let atou uafu.

"I le taimi nei e tusa ma le 20 isi avanoa faigaluega ua mafai ona fa'aopoopo i ana tagata faigaluega ina ua fa'atula'ia lenei tautua mo va'a e taula i le uafu. E le o tautuaina e le Paramount ni pusa oloa i nisi lava tulaga, e pei o le tosoina o pusa oloa, ua na'o le fa'afeso'ota'ia lava ma le tatou sapalai eletise mai le ASPA,” o se toe fa'apupulaga lea a Papali'i.