Ads by Google Ads by Google

Tala I Vaifanua

MAUA $46,000 MAI VA’A KOREA I MATU - “MV WISE HONEST”

 

I se lipoti mai le Matagaluega o Uafu ma Malae Va’alele o lo’o taua ai le mauaina e le malo o Amerika Samoa le $46,000 mo tautua a le vaega o le uafu i le va’a a Korea i Matu, MV Wise Honest, o lo’o taula i lo tatou gataifale.

 

O lea vaega tupe mo tautua a le vaega o uafu i le taimi na fa’atoa toso mai ai le Wise Honest i Amerika Samoa i le masina o Me o le tausaga lenei.

 

Ma ua ma’ea foi ona tuuuina atu e le matagaluega ia pili o a latou tautua mo le masina o Iuni, Iulai ma Aukuso. Ma o lo’o fa’amoemoe e maua ai le tusa ma le $90,000.

 

O se saunoaga lea a le tama’ita’i fa’atonu sili o le matagaluega, Taimalelagi Dr Clair Poumele ina ua fesiligia i le aso Lulu i le taimi o le iloiloga o le tupe fa’asoasoa a lea vaega o le malo e le Fono Faitulafono.

 

E pei ona mua’i fa’alauiloa atu i a tatou lomiga talu ai, o lenei va’a sa toso mai Indonesia i le ogatotonu o le masina o Me 2019, ma ua taula ai nei i lo tatou gataifale, se’ia maea se fa’atauga o lo’o tauofoga mo lona fa’atauga lea na amata mai ia Iulai 2019. O lea fa’atauga o lo’o usita’ia ai se iuga a le Fa’amasinoga a le Malo Tele i le a’ai Niu Ioka.

 

Ua fa’alauiloa atu fo’i, e o’o mai i le amataga o lenei vaiaso e le’i maua se fa’amaoniga a’ia’i, pe mata ua taulia le va’a lea, e tusa ai ma nisi tala na fa’ailoa mai i nisi feso’ota’iga ua mae’a ona fa’atau ese atu lea va’a, i se tauofoga na fa’atautaia i le vaiaso ua tuana’i.

 

Saunoa Taimalelagi e leai lava se eseesega o  le totogi o lo’o fa’ae’e i le taula ai o le Wise Honest ma pili fo’i o lo’o totogia e nisi va’a uma e taula mai i le tatou Uafu, tusa lava po’o le a le umi. Peita’i ua fuafua le tetele o ia pili i le mamafa o nei va’a uma faatasi ai ma le umi o taula i o tatou gataifale.

 

Fa’ailoa foi e Taimalelagi e fa’apea sa tusi atu i lona ofisa le kovana, e fesiligia le tulaga o le Wise Honest ma po’o afea foi e aveese ai ma gataifale o Amerika Samoa. Ma o se fautuaga a le kovana ia Taimalelagi ina ia tagai i nisi o totogi fa’ae’e ona ua sili ma le tolu masina talu ona taula lea va’a i Amerika Samoa.

 

TOLOPO VASEGA STRATUS SILVER LINING INC. - ASO GAFUA A SAU NEI

 

O le vaiaso lenei sa tu’u e amatalia ai le kosi o feso’ota’iga fa’atekonolosi, le saogalemu o so’otaga fa’atafa’ilagi po’o le initeneti ma isi tomai, e fa’atautaia e le Stratus Silver Lining Inc. lea e pulea e Dr. Alok Sharma.

 

Peita’i, ua toe tolopoina se’ia mae’a ona faia le fa’alauiloaga o lea kosi atoa ai ma toe lesitala o fanau o lo’o ua aofia ai i lea vasega, lea ua fuafua e fa’ataunu’u i le aso Faraile nei, i le Multi Purpose Center i le tatou Kolisi Tu’ufa’atasi.

 

Ua fa’alauiloa mai ona faia’oga o lea kosi, Chris Magalei, o se tasi sa tele lona sao i le ta’iga e le Michaels o tatou laina feso’ota’i o le Initeneti ma le ali’i o Michael Robertson, ose tasi sa loa lana tautua i le US Army ma e tu’ua e ia lea auaunaga ua ausia e ia le tofiga Kapeteni. Na i ai fo’i se vaega o lana tautua i le Army sa auina atu ai i le tafa o taua i Afakanisitana.

 

E lua kosi o le a fa’atautaia ma e tofu i la’ua nei ma le vasega e a’oa’o. O nei vasega e lua o le a faia lea i le Computer Laboratories a le Kolisi.

 

O le tasi o nei vasega ua fa’atulaga e aotauina ai nisi o le Aufaigaluega a le Malo, o lo’o mana’omia ona ausia tusi pasi e gafatia ai ona fa’aaogaina e i latou komipiuta e fa’atino ai latou galuega o lo’o feagai ma i latou. O le vasega fo’i lena e faia i le Computer Lab a le Kolisi. O le vasega lona lua ua ofoina lea mo ni fanau a’oga maualuluga ma e faia lea i le potu fono i le fogafale lua o le Ofisa o le Litaea a le tatou malo.

 

O le a feiloa’i fo’i i latou uma ua lesitalaina ma latou faia’oga e to’alua.

 

FA’ATINOGA O LE TALA ”LAUMEI MA LE MALIE” - PACIFIC ISLANDS PRODUCTION

 

Na aumaia e le Pacific Islands Production le ali’i o Ben Lelevaga, Maiava Salele ae maise o le na amataina le ausiva a le Tiumasalasala Dance Theatre mai Samoa, Ms Eterei Maiava Sakele, ina ia fesoasoani i le latou taumafaiga e fa’atino le siva fa’asolo e fa’ailo ai le tala ua lauiloa i le atunu’u “Laumei ma le Malie”.

 

O lea fa’atinoga e 6 lelei vaiaso na a’oa’oina ai, fa’ato’a faia ai le latou fa’atinoga i le afiafi o le aso Faraile ua te’a, i le ASCC Multi Purpose Center.

 

I lea fa’atinoga sa iloga ona mata’ina fo’i le taumafaiga a nai o tatou fanau, aua sa ta’imua fo’i i la’ua na malaga mai e fa’aosofia le fiafia o le fanau ma toe fa’amanatu a latou vaega o le siva ua o’o i ai, i le polokalama atoa. Ua mataina aua e fou fo’i le vave ma ituaiga o taga ua fa’atinoa ai lea tala mo se taimi muamua e nai o tatou fanau, ae maise le vasega o fanau matutua.

 

O tausaga o fanau na fa’amauina e 13- 26 tasuaga le mafutua, ae sa fa’asalalauina e mafai ona o’o le matutua o le fanau sisiva i le 38 tausaga.

 

O le ta’ita’iga lava ole fa’amoemoe atoa na fa’atinoina, o le tama’ita’i o Eterei Maiava Sakele, ma ua fesoasoani atu i ai le ta’ita’i o le Pacific Islands Production, Irene Lake.

 

Mata’ina le fa’atinoga a le fanau, e fou fo’i le va’ai atu e mafaia e fanau ituaiga siva nei e masani ona maimoaina a le Tiumasalasala, oka, e lelei fo’i tamaiti iinei i na faiva, ma o se fiafiaga lena. E ala lava ona le maua e tatou fanau taga eseese ma le vave o fa’atinoa ai, ona e le o aoa’oina ai i latou ia iloa ona fa’atino na ituaiga taga i a tatou siva a’o.” O se tala lea a le tina o Ete Lutu sa auai atu i ai e maimoaina lea fa’afiafiaga.