FA’AMANATUINA 7 TAUSAGA MO TAGATA FAIGALUEGA ATUNU’U

“E Taualoa lau Tautua!” o le auau lea o le aso e fa’amanatuina ai le 7 tausaga talu ona faia se aso fa’apitoa e aloaia ai tagata faigaluega i le atunu’u. O lea aso fa’apitoa sa faia i le malae i Fagatogo i le aso Faraile ua te’a.

O le fofoga fa’apitoa o le polokalama le afioga le Komesina o Leoleo, le’i Sonny Thompson, ae o le susuga le Fa’afeagaiga EFKAS i Fagatogo, Rev. Iasepi Ulu sa avea ma fofoga e taumolimoli le vi’iga o le Atua ma le faafetai ona ua fa’ataunu’uina lea fa’amoemoe i le manuia mai le Atua.

Tautalaga fa’apitoa a le Kovana sili, Lolo Moliga, lea sa ia saunoa ai i le taua o le tautua matavela ma le tautua tuavae a le mamalu o le aufaigaluega i so’o se vaega, so’o se matata tau’ave a le malo.

Sa ia fa’ailoa ai, “Na ala ona fa’amaite lenei aso mo le aufaigaluega a le tatou Malo, ina ia mafai ona fa’afetaia le alofa o le Atua, i lana pule to ma le pule fa’asoa i le ola ma le malosi, ae maise o lana puipuiga malu ia i tatou uma, i lo outou soifua ma so matou ola, ua o’o mai i lenei aso. Lea ua fitu tausaga o tatou faia lenei sauniga, ia ave pea le fa’afetai i le Atua i mea uma.”

“O le fa’afetai fo’i ia te outou uma o galulue ma le fa’amaoni, ae va’ai outou e le o fa’amaoni, o lo’o silasila lava le Atua ia te oe, e i ai se aso e le toe va’aia ai oe o e faigaluega pea i le tatou malo.”

O le afioga le Pule Sili o le Falema’i tele LBJ Medical Center, Faumuina John Faumuina, sa tula’i na te fa’alauiloa le afioga le Foma’i SIli, Dr Iotamo Saleapaga, o se tasi ua loa fo’i lana tautua i le mamalu lautele o le atunu’u, ma e fa’afetaia fo’i lona sao i le taumafaiga e togafitiga gasegase tuga o lo’o mafatia ai le to’atele o tatou tagata i le tatou nei malo.

Ua fa’ailoa fo’i, o Dr. Saleapaga, o le ulua’i alo lenei o Amerika Samoa na malaga i fafo e a’oga fa’afoma’i, ma ua mafai ona toe taliu mai, ma tautuaina le atunu’u. O se tasi o ana saunoaga sa ia fa’ailoa ai, “O le faigata e malaga loa le fanau e a’oa’oina lelei i Amerika, ona faigata lea ona latou tu’ua galuega i le Iunaite Setete ae toe fo’i mai i Amerika Samoa, aua e maoa’e lava totogi e le fa’atusalia i ai tatou totogi iinei. O le ala e fa’afaigofie ai lea mataupu, o le ave lea i Fiti e a’oa’o ai a tatou fanau i a’oga faafoma’i ma toe taliu mai e tautuaina o tatou tagata ma le tatou falema’i.”

E le gata ina matagofie folasaga faapitoa o le aso, ae na i ai se taimi na fa’atulaga ina ia faia ai ni tatalo le leoa ina ia toe tau manatu i nisi e to’atele ua le toe mafuta ma le ausia mai lenei aso fa’ailogaina.

Na tafanaina e le vasega o Leoleo le fa’ailo i fana e fa’amau ai lea auaunaga matavela ua fa’amuta i le oti. O le itula e 9:00 tonu lava ae faia loa le savali fa’aaloalo ma soso’o ai lava ma le tufatufaina o mea tausami.

Ina ua o’o i lona siui o le fa’amoemoe i lea aso, na tula’i le afioga le Peresetene o le Senate Gaoteote Palaie ma saunoa e fa’afetaia le faigamalo ma le aso iloga ua fa’afitu ai lea ona faamanatuina i Amerika Samoa.

O le lisi o suafa o i latou ua maliliu ta tolaulauina: Faipule mai le Manu’atele, Toeaina Faufano Autele, le pule sili o le ASPA Utu Abe Malae, Ameko Pato o le Fa’atonu o le ASEPA.

Sa tolaulauina ai fo’i ma suafa o afioga o fa’atama o le atunu’u ua loa le auaunaga i le Fono Faitulafono ma le Matagaluega fo’i o Leoleo: Senatoa Galea’i Moaali’itele Tu’ufuli ma le afioga le Tama a le Malo Aumoeualogo Te’o Joe Fuavai.

Sa mafai fo’i ona tolaulauina se lisi o i latou ua loa le auaunaga i le Kamupani I’a a le Star Kist Samoa ma sa amatalia mai i sui ua ausia le ta’i 30 ma agai i lua le aotelega o tausaga o le tautua.

Sa matauina fo’i sa i ai nisi o le aufaigaluega a le Kamupani a le Star Kist sa suia mai i latou e to’atele e savavali fa’aaloalo.

Mataina fo’i le matagofie o le sasao mai o sui mamalu o le faigamalo ma o latou fa’auluuluga fa’apea ma e na vala’aulia fa’apitoa ua fa’aaogaina ai le Pavili ua mae’a fa’afouina i lea taeao. Peita’i o le to’atele o matagaluega eseese o le Malo, sa tofusia ai faleie tetele sa fa’atutuina ina ia malutia i latou e to’atele mai le la matagofie i lea taeao.

Na matauina le faigata fo’i o feoa’iga i le alatele i lea taeao ona ua fa’auia fo’i ta’avale i magaala atofa e ali’i leoleo, ina ia mafai ona fa’afaigofie le solo ma le tele o ta’avale a tagata faigaluega o lo’o pa’au i lea fa’amoemoe o le malo.

381 MAE’A TOGAFITIGA I NZ - TAGATA AGAVA’A I LE MEDICARE

Ua fa’ailoa e le fa’atonu o le Medicaid State Agency Sandra King Young, “Ua atoa le 381 o i latou ua mae’a togafitia i le polokalama a le Medical Referral i Niu Sila tali mai le amataga o le tausaga fa’aletupe 2018.”

O le 75% o i latou nei o tagatanu’u o Amerika Samoa ma le Iunaite Setete o Amerika, ae 23% o tagatanu’u mai Samoa, ae to’aono o le 381 lea o i latou, o ali’i ta’ita’i po’o fa’atonu o matagaluega eseese o le tatou malo.

Peita’i, e le o maua uma e i latou na talosaga mo le fa’atupega lea a le Medical Referral na mafai ona maua lea penefiti po’o le alamanuia. E to’a 31 o i latou na talosaga na te’ena a latou talosaga, mai le Medicare ae o nisi e te’ena mai e Niu SIla.

E to’a 55 o i latou nei o lo’o fa’aauau nei togafitiga i Niu Sila, ae to’a 14 o lo’o fa’atalia le taimi e tu’uva’a ese atu ai i NZ.

O le aotelega o le tinotupe ua toina mai e le polokalama mo le tautuaina o nei gasegase e tusa ma le $8,037,765 i le tausaga faaletupe 2018, ae $1.4 i le $1.7 miliona i le tausaga fa’aletupe 2019.

Ua fa’ailoa fo’i e Sandra King Young, talu mai ona mafai ona fa’atupe e le Disaster Supplemental Act le aofai atoa o le pili FMAP ia Amerika Samoa, ua to’atele lava i latou ma ua si’itia fo’i le faitau aofai o i latou ua malaga i Niu Sila ma Hawaii mai le LBJ Med Center mo togafitiga talu mai Iuni.

Ua ia fa’apupula atili fo’i, o le fa’atupega 100% a le FMAP lea ua na’o le 86% o le pili o togafitiga o gasegase ua totogia e le Feterale ae fa’atupe e Amerika Samoa le 14%, e atoa ai le pili o le ma’i.

Ua toe fa’ailoa mai lava e King Young, e le o mafai uma ona maua le fa’atupega lea e tagata uma na talosaga e fia togafitia i Niu Sila.