Ads by Google Ads by Google

Tala I Vaifanua


Le Afioga o le Kovana Lolo Moliga [ata: SN]

TALI KOVANA FANOGA AFIO’AGA O FAGATOGO MALAEOLETALU

 

Ua mae’a o’o le savali ma o se fanoga o le afioaga o Fagatogo, ina ia latou soalaupule ma Kovana Lolo Moliga, ona ua fa’asima se vaega o le Malae ole Talu i galuega toe fa’aleleia atili o Pavili.

 

Ua tali fo’i le afioga le Kovana, ma ia fa’aalia, “O Fagatogo o le isi afioaga e tetele eleele ua avea ma ua faaaogaina e le Malo, peitai e leai lava se taui o latou maua mai ai.”

 

O le Malae o le Talu o lo aofia i lisi o fanua ma fale ua va’ava’aia tumau e le Ofisa o Measina o le Tala Fa’asolopito a le Malo Tele, lea ua i ai le latou lala iinei, Office of Historical Preservation.

 

Fa’aalia e le kovana, “E le o toe mamao, ae fa’auia e lana faigamalo se tagi e fa’asaga i le Malo Tele i mataupu ogaoga lava e lua. O le mea muamua o le maualuluga tele o pasese o femalaga’i ai ona tagaata i va’alele la’u pasese, lua o fanua nei ua avea e le Malo Tele i le vaitau a’o taugofie tele le laueleele, ma ua le toe fa’amatu’u maia i aiga ina ua mae’a le vaitau o le tau atina’e o Amerika Samoa.”

 

O i latou na masi’i atu e soalaupule ma le kovana, e aofia ai le afioga le Aloali’i Afoa Moega Lutu, Taesaliali’i, Samoa, Tualima ma Rep Steve Leasiolagi.

 

Na fa’ailoa e le kovana, lona naunauta’iga o i ai, ia toe fa’alelei fale ua i luga o le Malae, ia mafai ona fa’aaoga e le Malo i ana fa’atasiga e fia faia ai, ae le gata i lea, ia mafai ona fa’aaoga e le afio’aga i a latou fa’atasiga e fia faia ai, ma fa’amatagofie atili fo’i le vaaiga lautele i le afioaga mo e tafafao mai i le atunuu ma i tatou fo’i ia mitamita ai.

 

Sa ia fa’ailoa lona fiafia, aua o fanau talavou lea ua va’aia le savavali e fa’ailoa o latou taofi e ao ina mataituina e le malo ma le malo tele. “E mautinoa o lea ua va’ai mai le Malo tele i lena mau. Peita’i o le Sima latou e faigofie lava ona toe ave’esea.”

 

Saunoa fo’i le kovana, “Ua tele galuega ua taumafai atu e atina’e ai le atunuu ua poloka mai e le Malo tele. Peita’i o galuega nei e fa’aleleia atili ai le va’aiga lautele i le matagofie o le atunuu. Ua solituina lava le taofiga fo’i o le fale na soso’o ma le Maota o Leoleo, ona o lea ua tatau ona faatu ai le Fale Tinei Afi e pei ona faia ai nei.”

 

Ua ia fa’ailoa fo’i i sui o Fagatogo na latou fono, o le a toe taliu mai alii loia, poo le isi lua vaiaso o lumana’i nei, e latou toe va’ava’ai toto’a lava i lisi ma faaupuga o lisi o fanua o aiga sa fa’aaogaina i aiaiga fa’alisi pe fa’atau foi e le Malo i tausaga e tele ua tuanai, ina ia mautinoa pe o mafai ona lisi ae toe soalaupule le malo ma aiga nei e ona eleele, i se isi feagaiga fou.

 

“O mea uma ua fausia i luga o le malae [i Fagatogo] e aoga e fa’aaoga e le afio’aga i ona aiga ma ekalesia ma lea afioaga i ni fa’atasiga e fia tuufa’atasia i ai.  E mautinoa lava fo’i a fia fa’aaogaina fo’i e le Malo lea nofoaga mo a latou fa’atasiga, e le fa’atuiese mai le nu’u, ae o se nofoaga e aoga mo le nu’u, ekalesia ma aiga, fa’apea ma le malo,” o le saunoaga lea a Lolo.

 

TAUVAGA TAUSALA LALELEI O AMRIKA SAMOA - SETEMA 27

 

O le tauvaga Tausala Lalelei o Amerika Samoa 2019-2020, ua fa’atulaga nei e fa’atino i le aso 27 Setema.

 

O se fa’amatalaga lea a le tausala o loo tula’i i lenei fo’i i lenei tausaga, Magalita Johnson. Peita’i, ua ia fa’ailoa mai, “O le fa’amoemoe e faalagolago tele lea i le vasega o tausala lalelei uma o le atunuu. O le to’atele fo’i o i latou e tula’i mai, o le matagofie lea o le sailiga o le tausala sili ona agava’a mo lea tofi taua mo le atunu’u.”

 

O le fa’atautaiga fo’i o lea sailiga, o le matafaioi lea a le Miss American Samoa Inc. (MASI) ma ua fiafia fo’i i latou e fa’ailoa mai lea fa’amoemoe ma le aso ua atofaina, ina ia fa’aosofia le vasega o tausala lalelei e tatau ona tauva, ae maise fo’i o le vasega o pisinisi ma faalapotopotoga, ina ia latou sapaia nei tausala lalelei i a latou taumafaiga.

 

“O lea tofi, e ao ina fiafia alo tama’itai talavou o le atunuu latou te fa’atinoa, aua e tumati’e foi ona fa’amanuiaga, ae maise o ni lesona aoga mo le soifua talavou o se tasi e tautua ai,” o se tala lea a Johnson.

 

PULE A’OGA TAUSAGA AOGA 2019 - 2020  - TUTUILA TOGILAU

 

Ua ma’ea ona filifilia Pule A’oga o le tausaga aoga 2019-2020, le tama’ita’i Pule A’oga mai Tafuna High -  Mrs Tutuila Togilau.

 

O le komiti fa’apitoa sa faia lenei filifiga, sa fa’auluulu lea ia Puna Tanielu, Dr Samasoni Asaeli ma le sui fa’atonusili o a’oga, Fa’aiufono Vaitautolu.

 

Saunoa Mrs. Togilau, “O lenei fa’aeaga e muamua ai ona ou ave le fa’afetai i le vasega o a’u faia’oga uma ma le aufaigaluega a la’u a’oga i Tafuna. O lo outou lagolagosua i o’u tiute ma lo outou gauai mai tatou te galulue fa’atasi, lea ua mataituina e le Komiti tofia mo lenei fa’amoemoe, ua pale ai lou sui fa’atauva’a i lenei fa’aeaga, fa’afetai.”

 

E le gata i lea ae sa ia fa’afetaia foi le sapaia o lana galuega e le tama o le aiga ma le fanau ma lona aiga atoa, “Fa’afetai Grayson Togilau ma si a’u fanau. O oe lava ma le fanau e tua atu i ai faiva, e te tu lava i o’u autafa ma lagolagosua mai a’u galuega fai i aso ta’itasi, e te le o ‘auese lava ia te a’u ma la’u taumafaiga. Fa’afetai.”

 

O isi fo’i tofiga ua fou nei mai le Matagaluega o A’oga ua aofia ai nisi ua ausia tofiga e avea ai ma Pule A’oga i a’oga maualuluga eseese i le atunuu. O le susuga Donna Mataese ua tula’i mai nei e avea ma Pule A’oga a le Manu’atele i Ta’u, Manu’a.

 

O le susuga Esekielu Foleni ua avea ma Pule A’oga i le Aoga Maualuga a Samoana. O le tamaitai o Dr. Valasi Apulu ua avea ma Pule A’oga i le Nuuuli Vocational Technical High.

 

Ua toe fo’i le susuga Dr. Patrick Danielson i Leone High e avea pea ma latou Pule A’oga, Tutuila Togilau e tumau pea i Tafuna High, ae o Suaese Ta’ase i  Fagaitua High