Tala I Vaifanua
FONOTAGA WAN SOSAIETE A TAMA’ITA’I LEOLEO I LE PASEFIKA - AUKUSO 19-21
E ese mai le fonotaga a Ta’ita’i Leoleo ma Komesina o Leoleo (PICP) a atunu’u e 21 o le Pasefika, e aofia ai Amerika Samoa, lea o lo’o talimalo ai le teritori, ae ua tauaofia muamua le Fonotaga a Leoleo Tamaita’i o Matagaluega o Leoleo a nei atunu’u
O le fonotaga a le PICP o le fa’alua ai lea ona talimalo Amerika Samoa - tausaga 1987 ma le 1994.
O le tama’ita’i Leoleo Suesue Det. Vaivasa Wells o le Matagaluega a Leoleo a Amerika Samoa ua avea ma Taita’ifono o le Fonotaga a le WAN mo le 2019-2020.
A’o le tama’ita’i sa tula’i mai i le tofi taitaifono o le 2018-2019, o Superintendent Efo Moalele, o le Matagaluega o Leoleo i Samoa. O ia fo’i lea sa ia siitia le tatalo e amata ai le tauaofiaga a le WAN i le Tradewinds Hotel.
O le afioga le Komesina o Leoleo a Amerika Samoa, Le’i Sonny Thompson, sa tula’i ma e fa’atalofa aloaia atu ai Amerika Samoa i sui usufono. O ia foi sa fa’alauiloa le Taitaifono ae masie o sui mamalu fo’i o tama’ita’i leoleo Amerika Samoa i lenei fonotaga.
O Det. Wells ua siitia lona tulaga ua avea ma Leoleo Su’esu’e i le CIIB. Ua si’itia fo’i le tofiga o Sgt Samantha Lam Yuen ua galue ai nei i le Vice & Narcotics ma Lt. Annielyse Coffin lea ua avea ma lutena ma ua faigaluega i le polokalama o le MCSAP - Motor Carriers Safety Program.
I le toe vaega o lana lauga sa fa’ailoa ai e Le’i le fiafia o Amerika Samoa e talimalo i lenei fonotaga, ae maise fo’i, o le a taumafai le Matagaluega o le Puipuiga o le Saogalemu Lautele o le Malo o Amerika Samoa e sapaia so’o se mataupu o le a pasia ma fa’amati’e o se iugafono a lenei fonotaga a le WAN.
I le amataga o le tauaofiaga na tula’i ai le ali’i Komesina o Leoleo mai le Atu Solomona, Mathew Varley, ma ia fa’ailoa mataupu sa pasia i le fonotaga talu ai a le WAN, ina ia mautinoa ua laugatasia i latou ua aofia i lenei fonotaga e silafia lelei ai mataupu ua talanoaina, ma ua pasia fo’i ina ia fa’ataunu’u i lenei tausaga.
Saunoa Varley, “Ia outou iloa lelei, o outou e mafai ona faia suiga lelei mo tama’ita’i Leoleo e galulue i matagaluega o leoleo i so’o se atunu’u ua lotolotoi so latou sui i le tatou fonotaga lenei, ia outou maumaua’i i lea avanoa lelei, aua i le i’uga o la outou fonotaga lenei, o le a tele se avanoa e feutaga’i ai la outou sui mamalu ma le Taitaifono o le Sosaiete a Taitai Leoleo o le Pasefika, ina ia soalaupule nei suiga o le a outou aiaia ma pasia.”
E ese mai lea sa ia toe fa’amanatu i le au usufono, “Ia outou iloa lelei, o a outou iugafono ma iugafono a le PICP, e tatau lava ona feso’ota’i lelei, ina ia mautinoa ua tautuaina lelei tagatanu’u i mea o lo’o outou tautua ai e o’o fo’i i le aotelega fa’atasi e pei ona faia nei.”
O le iugafono muamua na fa’aleoina o se ala o faatupega faalotoifale o le WAN a le latou lava malo. Ia fa’afaigofie atili ai ona fa’atautaia suiga ua mae’a fa’atulaia mai i fonotaga nei faale-tausaga a le WAN mai ona sui ta’itasi.
O le isi mataupu, o le tulaga le fa’amanino a’ia’i o nei iugafono i sui uma o le Matagaluega o Leoleo, ma ia usita’ia lea tulaga mo tama’ita’i leoleo ia fa’afaigofie ona latou fa’atinoa o latou galuega.
O le isi mataupu, o le mafai lea ona talanoa sa’o i Taita’i o Leoleo e tusa o nei mataupu sa talanoaina ma o latou i’uga ua mae’a pasia. Fa’atasi ai ma le laugatasia ma leoleo ali’i i le ausia o tulaga tofi i totonu o Matagaluega o Leoleo o tautua ai.
Ua mae’a fa’atula’ia le mana’omia ona fa’atula’ia WAN i totonu o Matagaluega o Leoleo i atunu’u e 21 ua auva’a potopoto i nei fonotaga.
Ia matua una’ia malosi tamaita’i Leoleo ina ia taumafai a’ia’i ia ausia e i latou tapula’a maualuluga o le avea ai ma Leoleo. Ia i ai se sao o Leoleo Tamaita’i e fesaga’i ai ma feutaga’i sa’o i taita’i o Leoleo. E pei o le fonotaga o i ai nei, ia maua so latou laulau i totonu o lea fonotaga taua ina ia fefa’asoa’i i mea e lelei atili ai le auaunaga fa’atasi mo tagata lautele i o tatou atunu’u.
Saunoa Det. Wells, o le taumafaiga lea ua manatu o ia e fa’ao’o i ai le sailiga tofa i lenei fonotaga, o le mataituina lea o avanoa lelei ina ia suigamalie na tulaga mai le va lea o ali’i leoleo ma tama’ita’i leoleo i totonu o matagaluega a leoleo i totonu o le PICP.
“O le mau masani lava lea ua fa’alogoina, e matele ina fa’alagi tamaita’i leoleo e vaivai, ae o ali’i leoleo e malolosi,” o sana toe saunoaga lea.
FUAFUAGA TU’UFA’ATASI KVZK-TV MA LE OFISA O FESOOTAIGA (KVZK-TV)
Ua i ai fuafuaga a le malo e tu’ufa’atasi le fale televise o le KVZK-TV i lalo o le va’avaaiga a le Ofisa o Fesootaiga, po’o le American Samoa TeleCommunications Authority (ASTCA).
O lea fuafuaga sa fa’amaonia mai e le tofa Iulogologo Joseph Pereira, le taitai fono o le Komiti Fa’afoe a le ASTCA.
Sa fa’ailoa e Iulogologo i le Samoa News e fa’apea, i le taimi nei ma polokalama fa’ataoto a le ASTCA, o lo’o i ai le fa’amoemoe e fa’ataunuuina le tuufaatasia o ia vaega o le malo - le KVZK ma le ASTCA - i se taimi o le tausaga o lo’o muamua.
Fa’ailoa foi e Iulogologo e faapea o lo’o galulue le pulesili o le ASTCA, le susuga ia Lewis Wolman ma le Fa’atonusili o le KVZK-TV, le tofa ia Tuimavave Tauapai Laupola, e fa’atulaga se polokalama pe o se auivi i auala e tu’ufa’atasi ai ia ofisa fa’atasi ai ma le vaitaimi e ma’ea ai lea galuega.
Ma o lea polokalama o se fa’asino ala lea i le Komiti Fa’afoe a le ASTCA mo sa latou fa’aiuga pe a ma’ea ona tuuina atu lea mataupu i le Ofisa o le Kovana, o se fa’amatalaga lea a Iulogologo.
I le mafuaga ua taga’i ai le malo e tuufa’atasi ia vaega e lua, na saunoa Iulogologo e fa’apea, o se tasi lea o auala e sefe ai isi vaega tupe i le fa’ala’ititi o isi vaega o le malo. Ua le gata i lea, o lo’o fa’amoemoe fo’i le ASTCA e fa’afoeina i le lumana’i sa latou cable-TV ma o se auala lelei foi lea e tuufa’aasi ai ia tautua i lalo o le pulega e tasi.
Sa fesiligia foi e le Samoa News le taitai fono i le malosiaga i le komiti fa’afoe a le ASTCA e fa’atonuina ai fa’asalalauga ma isi mea o lo’o fa’aalia e le KVZK-TV. Ae sa saunoa Iulogologo o ta’iala o lo’o i ai nei i le fa’afoeina o fa’asalalauga a le KVZK e fa’aauau pea fa’atasi ai ma le mulimulita’i i tulafono a le fetarale mo fa’asalalauga i televise.
O le galuega a le komiti fa’afoe, o le fa’atumauina lea o ta’iala ae o le puleaga e fa’atunuuina, o se tala fa’aiu lea a Iulogologo.