Ads by Google Ads by Google

Tala I Vaifanua

PERESETENE FOU EKALESIA METOTISI -TAMA FANAU AMERIKA SAMOA

 

I le mae’a ai le tautua a le susuga le Peresetene Rev Elder Apineru Lafai, ua tula’i mai ai se tasi o tama fanau a Amerika Samoa i le tofiga Peresetene o le Ekalesia Metotisi i Samoa e aofia ai ma Amerika Samoa.

 

O le susuga ia Rev Faulalo Leti Pa’aga ma le faletua o Fialelei Pa’aga ua avea le tofiga Peresetene o le Ekalesia Metotisi e pei ona faia le filifiliga i le fonotaga a le ekalesia i Samoa i lenei vaiaso.

 

O le faletua o Fialelei Pa’aga o le a avea o ia ma Peresetene o le Au Uso Fealofani, o le mafutaga lea a tina o Failauga i totonu o le ekalesia.

 

Ua fa’ailoa mai o le tautua a Rev. Lafai ua atoa le 50 tausaga, na amata mai lava i le maea ai ona a’oa’oina o se Failauga mai Piula.

 

Ua mae’a ona fa’atauto le Peresetene fou ma le faletua. Ua faapena fo’i ona fa’atauto ma fa’apa’ia ai ma le susuga Rev. Dr Eteuati Epa Tuioti ma le faletua Maselina Tuioti e avea ma Failautusi Aoao o le Ekalesia Metotisi Aoao, le tulaga sa tauavea mai e Rev. Pa’aga i le tausaga ua mavae.

 

I le mutaga ai o le auaunaga a Lafai, ua fa’ailoa mai, ua malolo manumalo ai o ia, ae o le fa masina talu ai na maliu ai lona faletua o Seti Lafai, peita’i o le tausaga foi lenei au amatalia mai ai le auaunaga a se tasi o la’ua alo i le tofi Failauga, ua mae’a a’otauina mai aoga fa’afaifeau i Paula, le susuga le Failauga o Apineru Jr Lafai.

 

Peita’i o le susuga le Failauga Toeaina Malolo Manumalo, i lana auaunaga i le Ekalesia e maoa’e lava. Ina ua fa’au’u mai Piula sa faigaluega lea i le Faletusi o le Ekalesia se’ia o’o i le 1976 ona malaga lea i Ausetalia e sailia sona fa’ailoga maualuga i Mataupu Silisili Fa’a-Kerisiano ma ua talih mai o ia ma lona fa’ailoga Tipiloma.

 

Ona avea lea o ia ma faia’oga i Piula mo le lua 1977-79, ona soso’o lea ma le isi lua tausaga na soso’o ai ua masi’i i Fiti na te fa’aatautaia nisi o tiute na mana’omia ona fa’atino mo le Ekalesia.

 

Na toe tautua o ia e pulea le faletusi o le Ekalesia i Matafele, ona soso’o lea ma le vala’auina e tautua i le Ekalesia i Asau, Savaii mo le lima tausaga. O i’ina loa na vala’auina ai e avea ma Teutupe Aoao i le tausaga e 1995, ma fa’asolo mai ai ona tofiga e avea ma Failautusi ma o’o mai ai e avea ma Peresetene.

 

I le tofia ai o Rev. Pa’aga mai le afio’aga o Nu’uuli, Saleimoa ma Manu’a ua ilona fo’i lona filifilia e tula’i i lona vaitau i lea tofiga. Na ia mua’i fa’afetaia le auaunaga a ta’ita’i Peresetene ua tuana’i, ae maise ai Rev. Lafai.

 

Na ia fa’afetaia le aiga fo’i o lona faletua, ae maise lona aiga, ona o le onosa’i ma le agaga fa’amalosi’au ia i la’ua uma i le galuega, i taimi o le lelei ae maile lava i taimi o le louloua. “E na’o le Atua le to’omaga e mautu ai le filemu ma le alofa faitama ia i ma’ua ma le fanau a’o feagai ai ma tiute i le galeega. O la outou fesoasoani ma le titi faitama e lalamua lea ia i ma’a i taimi uma e feagai ai ma fesi’ita’iga i le galuega ma tua atu i ai i mea e mana’omia, fa’afetai.”

 

Na amata avea o ia ma faife’au i le tausaga e 1981 lea sa mua’i tautua ai i Massey i Aukilani i Nius Sila. E lima tausaga sa galulue ai iina ma fa’asolo mai ai lava ona fesi’ita’i i le galuega se ia o’o mai i le tausaga e 2014 ae tofia loa e avea ma Failautusi Aoao a le Ekalesia Metotisi, 2019.

 

TULAGA FA’AINUMAGA FUALA’AU MUMU TUTUPA I LE ATUNUU

 

Ua fa’ailoa mai ua o’o atu i le itu i sasa’e o le motu le toe siakiga o le fa’ainumaga o fuala’au o le Mumu Tutupa, ina ia matua soloia lava lenei mai mataga ona taunu’uga mai le atunu’u.

 

O le suesuega ua fa’asolo nei  e le Matagaluega o le Soifua Maloloina, e galulue feso’ota’i ma le CDC fa’apea fo’i le Pacific Islands Health Officers Association.

 

Ua amata fo’i la ma galuega puipuia mo le mamalu lautele, e aofia ai le toe siakia lava o i latou e le’i faia ni inumaga o fuala’au e puipuia ai mai le ma’i mumu. O lea galuega na amatalia lea ia Iulai 13, 2019.

 

O le ali’i Foma’i Afili John Tufa, o lo’o nafa ma le tele o fa’amaumauga uma tau le gasegase pepesi e aofia ai ma le Ma’i Mumu, sa ia fa’ailoa mai, “O le fa’amaumauga ua mae’a tuufa’atasia mai le itu i sisifo o le Motu o Tutuila, ua matua lelei lava. E 1000 nisi na tuia toto ina ia faia i ai le suesuega ma ua maua fo’i fa’amaumauga o na suesuega, ua lelei atoatoa lava le pasene o i latou ua mama mai le Ma’i Mumu.”

 

“O le faiga o le sailiga lea, e o lava le aufaigaluega i maota o aiga e fesiligia pe na inumia fa’atolu e i latou fuala’au mumu, ona tuia loa lea o toto ia sailia ai pe moni lava ua kilia i latou mai le Ma’i Mumu.”

 

Ua le ‘asa fo’i le faiva ma se maumau, e i ai lava nisi e le’i fia tuia o latou toto mo lea sailiga. O nisi sa fa’afaigaluegaina na aofia ai ma le vasega o fanau ua a’o’oga i le Kolisi i le Nursing Program.

 

O le fa’amoemoe maualuga, ia ausia le aotelega e 2,900 o toto ua tuia o tagata uma o Amerika Samoa ina ia sailia pe ua kilia i latou mai le siama o le Mumu Tutupa.

 

TAUMAFAI SAMOA AIRWAYS MALAGA TUU SA’O SAMOA-LOS ANGELES

 

Ua fa’ailoa e Kovana Lolo Moliga le naunauta’iga o le Kamupani Va’alele a le Samoa Airways latou te fia tautuaina le mamalu lautele o tagata femalaga’i i le va o Samoa ma Los Angeles California.

 

“O se fesoasoani tele fo’i lea i le teritori, pe afai ae mautu lea malaga tuusa’o, aua e na’o sina malologa lava i Pago Pago ma fa’ae’e atu nisi pasese fa’aopoopo, ona alu sa’o loa lea o le faigamalaga,” o se isi lea o manatu fa’aalia o se tasi o faipisinisi Ofisa Va’alele i Amerika Samoa ina ia maua mai lea tala fiafia.

 

O le Masina o Me, 2019 na malaga fa’apitoa mai ai le Taitaifono o le komiti Fa’afoe a le Samoa Airways i le teritori mo se fonotaga a le kovana ae maise nisi sui o le malo.

 

I se talanoaga i le va o Tuilaepa Malielegaoi ma le kovana, na fa’ailoa ai le alava’a o le a fa’atautaia ai lea malaga tu’usa’o, e ao ina sau le Samoa Airlines e avatu pasese mai iinei, ona fa’atoa alu lea i Faleolo ona malaga loa lea i Los Angeles.

 

E le’i mautu i le taimi nei le vaitau e amata ai malaga a le Samoa Airways for Los Angeles.