Ads by Google Ads by Google

Tala I Vaifanua

ASO FA'ASAMOA "KIKI & SAM'S DAY CARE” - FAGAIMA

 

I le taeao o le aso Faraile ua te’a, sa usu fiafia ai fanau e to’a 65 - mai le fa'ato'a fanau se'ia o'o i le 13 tausaga i le latou aso fa'apitoa o Tu ma Aga a Samoa i le "Kiki & Sam's Daycare” i Fagaima.

 

"Ua ala usu mai le fanau i lenei taeao i se faiga fou. Ua amata ona tapena ma fa'amaopopo mai mea uma, o mea taumafa Samoa o le a tao i le matou suavai. Ua lava saunia fo'i i latou e fesoasoani malosi i le gaosia o mea'ai uma, ia iloa ona a'oa'o le fanau i faiga o fe'au o umu Samoa, ina ia tao le suavai, ae ua nofouta i o latou mafaufau laiti le fa'atinoga o nei tiute fa'asamoa uma mo taulele'a ae maise fo'i o tama'ita'i Samoa i le tapenaga lava o tatou mea'ai,” o se tala lea a le tama'ita'i o Miriama Fa'asavalu, e pulea lea Day Care sa amatalia i le 2008.

 

I le aso fa'apitoa mo a'oga o Tu ma Agaifanua a Samoa ua fa'atino ai le fa'apulouga o le Suavai Samoa, po'o le Umu e fa'avela ai mea'ai Samoa moni. O mea'ai na saunia o Palusami, le faiai pilikaki ma le miti faafeu mo tagata matutua tuaoi i le Day Care.

 

E le o misia fo'i sina mamoe tao ma nai afiafi o vae moa aua o mea e fiafia le fanau e tausami ai i le tele o taimi i o latou aiga. Ae o le mea sili ona taua, ua mafai ona fai sao o le fanau, ae maise i latou ua 11 i le 13 tausaga le matutua, ia gaooga o le suavai ma tao ae maise fo'i o lona fu'ega.

 

O se tala mai a Fa'asavalu, "E suamalie le tausami i le suavai na fa'apulou, ae ua mae'a faia i ai sou sao i lona ga'o'oga. E te tausami fiafia aua o mea na e gaosi, ma ua e maua fo'i tomai o le tapenaga o se suavai, e mulimuli mai tausasami ai nai ou matua."

 

4 KONEKARATE GALUEGA FA'AFOU FALE LAUMEI UTULEI

 

E 4 Kamupani ua manumalo i tauofoga e toe fa'aleleia le Fale Laumei i Utulei. O lo’o fa’atupeina lea galuega e le Community Development Block Grant, lea e fa'asoasoa ma mataituina e le Matagaluega o Fefaataua'iga (DOC).

 

O galuega Lipea o vaega eseese o le fale atoa ua taua'aoina lea i le Pacific Refrigeration i lona tau aofai e $380,572.44. O le toe galueaina fo'i o le Ea Malulu o le fale atoa ua toe maua fo'i e le Pacific Refrigeration i lona tau e $184,915.

 

O le uaeaina o le masini faaleotele leo to Al's Auto mo le $28,545 lona tau, ae o Pupuni uma o le maota i ona fa'amalama ma le fata ua malo ai nei le Quality Painting i lona tau e $26,000.

 

O galuega toe fa'aleleia ua fa'ato'a amatalia lea i le aso Gafua na te'a nei ma ua fa'ailoa mai e faitau masina le taimi lea ua tu'uina mo nei galuega toe fa'aleleia.

 

MAUA MASINI FA'ATA A LE QUARANTINE MALAEVA'ALELE MAI USDA

 

Ua fa'ailoa mai le maea fa'atulaga o le Masini Fa'ata fou a le vaega a le Quarantine i le Malae Va'alele lea na taua'aoina aloaia mai e le Matagaluega o Fa'ato'aga a le Malo Tele, [USDA] i le tatou Matagaluega o Fa'ato'aga.

 

Fa’ailoa e le ali'i Fa'atonu o Fa'ato'aga, Filifa'atali Mike Fuiava, o se tasi lea o mea faigaluega taua tele sa fa'aleagaina i le afa tele o Gita lea na a'afia ai le atunu'u ia Fepuari 2018, ma sa fa'auia lava le talosaga i le failautusi o Fa'ato'aga, Sonny Perdue mo se isi fa'ata ina ia toe suia ai le masini ua fa'aleaogaina.

 

"O le fesoasoani malosi mai fo'i o le ali'i Fa'atonu mo le Puipuiga o La'au a le USDA i Honolulu, Dr. Vernon Harrington sa fa'afaigofie ai ona fa'auia lenei talosaga ma ua vave lava ona toina mai ona o le mana'omia, ona puipuimalu lenei itu o le Iunaite Setete o Amerika tatou te ola ai. O le fa'ata lea e sailiilia ai mea o lo'o fa'auia mai i le tatou atunu'u, ina ia maua uma pe i ai ni mea fa'asaina fa'aletulafono o tau fa'aofi mai e tagata femalaga'i i totonu o Amerika Samoa,” o se tala lea a Filifa’atali.

 

"O le fa'ata lea ua tula'i mai ma ua fa'aaogaina mo suesuega a le Quarantine i le Malaeva'alele, o le ituaiga fa'ata lea o lo'o ua fou lava i lenei vaitau, ma ua fa'apitoa lava mo le sailiga o meaola ma la'au ae maise lava i meaola fa'alafua, ina ne'i o'o mai i totonu o le atunuu,” o se tala lea a Filifa’atali.

 

Ua fa'afetaia le USDA i le Malo tele fa'apea ma Hawaii fo'i ona o le vave ona fa'auia mai lenei fa'ata aoga mo le malae va’alele.

 

FA'ATULAGA GALUEGA MALAE TA'ALO TAFUNA ELEMENTARY

 

O se tasi o a'oga tulaga muamua sili ona to'atele i le atunu'u, Tafuna Elementary,  ua o'o nei i ai le fa'asologa o le a fa'aleleia le latou Malae Ta'alo, ma o se fa'atupega mai le Community Development Block Grant le polokalama o lo'o fa'atautaia ma mataituina fo'i e le Matagaluega o Fefa'ataua'iga (DOC) a le malo.

 

O le galuega lea o lo'o fa'atino e le Tresmal, ua latou mauaina le fa'atupega mo mea ta'alo mo ta'aloga a le fanau a'oga, ae o le fausaga o lea malae ua fa'atinoa lea e le IBACE.

 

Na fuafua lenei galuega e ao ina fa'amae'a i le vaitau lenei o le tu'uaga o a'oga, peita'i ua toe talosagaina le suia o le taimi e maea ai ona ua toe suia le fausaga o le galuega lea mai le mea na mua'i pasia ai.

 

Ua fa'ailoa mai o nisi o suiga i lenei malae ta'alo ua amatalia e i ai lona aoga tele i le vasega o i latou e fa'atautaia ta'aloga a le fanau atoa ma le va'aiga lelei o fanau i taimi o taaloga. O le autu o le taumafaiga ina ia lelei malae ta'alo o fanau a'oga, ina ia faaleleia atili lo latou soifua maloloina e ala i fa'amalositino i ta'aloga ma ia fa'aitiitia atili ai le so'ona mamafa o latou tino. O le isi a'oga ua mae'a lona malae ta'alo o Afonotele, na mae'a i le kuata lona lua o le tauaga nei, 2019.