Ads by Google Ads by Google

Tala I Vaifanua


O nisi o tamaita'i sa galulue fa'atasi mo le faitauga tusi ma ua i'u ma le manuia le taumafaiga i lenei tausaga. [ata: Leua Aiono Frost]

125 FANAU 5-11 TAUSAGA POLOKALAMA FAITAU TUSI AOELUA FAMILY

 

O le taeao ananafi na fa'atasia ai le to'a 125 o fanauiti ua mae'a auai i le polokalama Faitau Tusi a le Aoelua Reading Program lea sa faia i Pavaiai, Afonotele ma Nuuuli.

 

O le polokalama lenei, sa amata mai i le tausaga e 2016 ma sa amata lava i le faletalimalo o Fanene i Nuuuli ma sa avea le Auuso o le Aiga Sa Aoelua ma Fanene ma latou faia'oga i lea taumafaiga amata mo le fanau i vaitau o tu'uaga umi o a'oga i le teritori.

 

Peita'i, o le ulua'i tausaga lea sa fa'aalia ai fo'i e Aoelua, "O le polokalama lenei, ua matou manana'o ina ia fa'alautele atu ina ia aofia ai isi afio'aga i le faitauga tusi i le gagana peretania po'o le gagana Samoa i nisi e fia iloa faitau tusi Samoa."

 

O le sini na fa'atu i lena ulua'i tausaga, ua atoa nei le tolu tausaga, ae ua tula'i mai, ua va'aia le mautinoa ona ausia. "O lenei tausaga ua atoa le 125 o fanau mai le 5 -11 tausaga le matutua ua mae'a auai e faitau tusi, ia faitau ma iloa malamalama lelei i le uiga o tala o latou faitauina."

 

E le gata i lea ae ua ia toe fa'aalia fo'i, "O lea fo'u ua tolu nofoaga ua fa'atautaia ai le polokalama faitau tusi, sa amata lava i Nuuuli nei, ona soso'o lea ma Afono, ae o lea ua ausia le isi nofoaga fou i Pavaiai."

 

O lea la ua fa'amae'a nei le polokalama, o le tufatufaga o latou fa'ailoga ma ni meaalofa ua taua'aoina fo'i e pa'aga a le Aoelua Reading Program 2019 e aofia ai le SSAB, le Lions Club mo latou foa'i o tusi, le Carl's Jr., ma le Feleti Barstow Library na tapena uma ma fa'ataunu'u ai lea fa'amoemoe lelei mo le fanau i le Carl's Jr i le Laufou Shopping Center i Nuuuli, i le itula e 10:00 i le taeao. Na tapena meaalofa uma e pa'aga e aofia ai le SSAB ma Feleti Barstow Library, ae o le 'aiga fiafia a le fanau sa tapena lea e le susuga Phil Love ma le Carl's Jr. I le aofia o fanau sa auai, e i ai i latou na si'i a'ao, e fa'ato'a ulufale lava lea o i latou i le Carls Jr i Nuuuli mo se latou 'aiga.

 

PULEAOGA FOU MO FA'ASAO MALISI & ST THERESA

 

A'o le'i amatalia le tausaga a'oga 2019-2020, ua mae'a filifilia nisi o tama ma teine tuai a le Fa'asao Malisi ina ia tutula'i mai nei tofiga Pule A'oga.

 

O le tama'ita'i Faia'oga, Lentoy Fuimaono Matagi, ma o se Pule A'oga fo'i a le ASDOE ua tofia nei e avea ma Pulea'oga i le Fa'asao Marist High e afua i le amataga o le tausaga a'oga nei o le a amatalia. I le a'oga a St Theresa i Malaeloa, ua filifilia ai le susuga Victor Langkilde e avea ma Pule A'oga.

 

O Matagi o lana galuega mulimuli nei lava o lana tautua lea i le Argosy University lea fo'i na to'atele nisi o le atunu'u sa sailia ai latou fa'ailoga maualuluga. O ia sa avea ma Sui Taitaifono o lea lala o le Argosy i Amerika Samoa nei, lea fo'i ua tapunia. Sa avea ma Pule A'oga i Tafuna High ma Leone High ao galue mo le Matagaluega o A'oga a le tatou Malo.

 

O Langkilde e tele tausaga sa avea ai ma Pule A'oga o le Fa'asao Marist High, ma sa avea foi ma Peresetene o le ASNOC.

 

I se saunoaga a le afioga Epikopo Peter Brown, sa ia fa'aalia ai, "O le tofia ai o nei sui e lelei tele agava'a i tulaga Pule A'oga i tatou a'oga nei e lua, o le a fa'aauau ai pea le lelei o a'oa'oga i potu a'oga taitasi i a'oga a le Ekalesia. Ua tatou iloa ua loa tausaga o mautu lava le mau, i le maualuga o le tulaga o a'oga e fa'atautaia atu i potu a'oga o tatou a'oga tulaga muaua ma a'oga tulaga lua i le teritori o Amerika Samoa, ma o se mitamitaga lea i o tatou loto."

 

MANATU KOMESINA O LEOLEO TUMAOTI LE TOESE [TCF]

 

O le susuga le ali'i Faipule o le Manu'atele, Vesi Fautanu Jr. ua ia fa'aalia, "Ou te sapaia lelei fo'i le manatu fa'aalia o le ali'i Komesina o Leoleo, Le'i Sonny Thompson, ua tatau lava ona tu'u ese le Toese [TCF] i Tafuna e tumaoti sana matagaluega, pe fa'atautaia e se kamupani ae ave'esea mai le Matagaluega o le Puipuiga o le Saogalemu Lautele."

 

O lea manatu sa mafai ona fa'aalia lea e le ali'i Faipule i le iloiloga a le Komiti o le Saogalemu Lautele  a le Maota o Sui i le vaiaso na te'a.

 

Na fa'aalia fo'i e le ali'i Faipule, o nisi lagona o le ali'i Komesina, na ia fa'ailoa mai ai le to'agaogao o ali'i ma tama'ita'i Leoleo i le matagaluega i le taimi nei. Ua na'o le 96 o i latou i le matagaluega atoa. Peita'i e na'o le 39 i latou o lo'o auai i le vasega fou o leoleo o lo'o fa'atautaia latou a'oa'oga fa'apitoa i le taimi nei, e le'i mae'a ma fa'au'u ai o ni ali'i ma tama'ita'i leoleo.

 

"O se tasi o fa'afitauli o lo'o tula'i so'o mai pea i le TCF, o le sosola so'o i tua o pagota mai le Toese, ma ua fa'ailoa mai e le ali'i Komesina, o le fa'afitauli o le le lava o ali'i ma tama'ita'i leoleo e fa'atinoa le galuega e aofia ai ma le leoleoina o le Toese."

 

Pe afai e tumaoti le fa'atautaiga o le Toese i Tafuna, e mafai ona ese fo'i lava sana vaega tupe e toina mai le Feterale e fa'atupe ai lea matagaluega.

 

Ua fa'ailoa e Vesi, "Ua va'aia le fiafia tele o sui o le Komiti a le Saogalemu Lautele a le Maota o lea fo'i manatu.”

 

 Ona fa'aalia lea o sona taofi, "E tatau ona fa'aulu mai se pili e le faigamalo ina ia lafo taofi i ai le sui Faipule o le Maota ma toeaiina fo'i o le Senate, ae maise lava le mamalu lautele o le atunu'u i se latou lagona faaalia e tusa o lea mataupu. E le mailoa lava, aua ua lagona e tagata uma, ua tatau ona faia se suiga i le fa'atautaiga o le Toese ona o nei fa'afitauli e alia'i mai pea, e le malu puipuia ai le atunu'u atoa."

 

Ua faailoa fo'i e le ali'i Faipule lona manatu autu, "Afai e faia se suiga fa'apea, ua tatau loa ona mua'i faia lava se suesuega fa'alaua'itele, se'i fa'aalia finagalo o le mamalu lautele o le atunu'u i lea mataupu."