Ads by Google Ads by Google

Tala I Vaifanua

MAEA GALUEGA FA'AMAMA O AUVAI O VAITAFE I LEONE MA LAULI'I

 

O se galuega na fa'ataunu'u mo le manuia lautele o le atunu'u e ala i galuega fa'amama o auvai o vaitafe i Leona ma Lauli'i, ua mae'a lelei ona fa'atino ma limalima i ai le fanau a'oga i le ASCC - Polokalama a le ACNR, lea e fa'alauiloa Agriculture, Community & Natural Resources.

 

O lea polokalama e fa'atino ina ia aoga mo so'o se vaega o le atunu'u, ma ua latou filifilia ai nei auvai o vaitafe tetele e lua i Leone ma Lauli'i e fa'atino ai le latou auaunaga, ia fa'aleleia atili ia vaega o le atunu'u, ma ua aoga tele lea i le tulaga o tafega ma le toe taumafai e taofiofi mai le eleele mai le aia e vaitafe i taimi o timuga.

 

O se tala mai le ali'i o lo'o nafa ma lea polokalama taua a le ACNR Denis Sene Jr. sa ia fa'ailoa ai, "Ua mae'a lelei ona faia le galuega faamama lea o nei auvai e le vasega o fanau a'oga o lo'o aofia i lea polokalama. Ua le gata i lea, ua latou fa'aaoga fo'i mea ua a'oa'oina ai, ina ia latou fa'atino i nei auvai o vaitafe i Leone ma Lauli'i. O le fa'amoemoe taua, ia puipuia atili o le tatou siomaga mai le aia atu i tafega, o otaota ma isi lapisi e fa'aleagaina ai nei vaitafe ma o latou auvai, ia matua fa'amamaina, e le tau totogia fo'i nei ituaiga o faiva e tautua ai le atunu'u."

 

O le toe fa'aleleia o auvai na fa'atino lea i Leafu ma Fuafua ae o le fa'amama sa faia lea i auvai o vaitafe tetele nei o Leone ma Lauli'i.

 

I le galuega lea e toe fa'aleleia ai le afu sa fa'atino lea e le afio'aga o Leone i ona fuaiala e 6 ua aofia ai fa'apea ma autalavou e fa mai ekalesia i Leone lava. Ua fa'ailoa mai ua matua toe fa'aleleia atoa nei fa'atanoa vai i Leafu.

 

O autalavou mai ekalesia Katoliko, EFKAS, AOG ma le LDS lea sa latou nafa ma lea galuega toe fa'aleleia o le auvai ma fa'atanoa i Leone.

 

E tusa ma le toa 150 o talavou sa aufa'atasi i lea galuega lelei, e aofia fa'atasi ai ma sui mamalu mai le ASEPA, ma e tusa ma le 1.05 tone o le lapisi na aoina mai i auvai i Leone, ma e tolu fo'i la'au aoga ua totoina i lea nofoaga ina ia taofiofi mai ai le tele o le eleele mai le aia atu i tafega.

 

I Lauli'i i le galuega a le vaega o Fuafanua ma le Ofisa o Mataupu Tau Samoa fa'atasi ai ma autalavou mai le Ekalesia Metotisi, Papatiso, Katoliko EFKAS, LDS ma le Ekalesia Anglican na tu'ufa'atasia ai le aotelega e 109 i latou na galueaina le toe fa'aleleia o auvai ma kilia mai atoa le lapisi lafoa'i ina ia aveesea mai alavai ma auvai i le afio'aga.

 

Ua lipotia mai e tusa ma le 1.49tone o le lapisi lafoa'i sa aoina ma ua va'aia le tulaga mama lelei o auvai o le vaitafe i Lauli'i ona o lea galuega na limalima i ai le autalavou mai le afioaga, sui mamalu mai le ASEPA ma Coral Reef Advisory Group.

 

$2.5MILIONA FAUSIA MA FA'ALELEIA ATILI MALAE VA'ALELE I FITIUTA, MANU'A.

 

E $2.5 miliona tupe mai le Matagaluega o Fela'ua'iga a le Feterale [DOT] mo le toe fa’alelelia o le malae va’alele i Fitiuta, Mau’a.

 

Ua fa'ailoa  e le Faipule i le Konekeresi, Aumua Amata, "O lenei vaega tupe ua atofaina lea mo le toe fa'aleleia o le tatou Malae va'alele i Fitiuta ina ia mautinoa, ua ausia agava'a o lea malaeva'alele ia tusa o aiaiga uma tau Malaeva'alele mo feoa'iga i le teritori ma setete e pei ona fa'atulaga ai e le FAA."

 

Ua fa'ailoa mai fo'i o lea malae va'alele e ao ina fa'aleleia ona moli, ina ia mafai ona sese'e ai va'alele i le po.

 

"Ina ia mautinoa lava ua saunia lelei o tatou malae va'alele aua feoa'iga a le atunu'u, ma le sese'e mautinoa fo'i va'alele i tatou malae, ua naunau ai ina ia mautinoa ua agava'a o tatou malaeva'alele i le Manu'atele i pasiga a le FAA,” o se tala lea a Aumua.

 

"Fa'afetai fo'i i le tautua sogasoga a le tama'ita'i fa'atonu Taimalelagi Claire Salafai Tuia Poumele, ona o lea ua manatu ia fa'aleleia a'ia'i malae va'alele i Manu'a, aua o le ala lea e mafai ai ona fa'aleleia atili tulaga o feoa'iga a va'alele i le Motusa. Fa'afetai fo'i i le pulega a le FAA ma le DOT i le susuga le Failautusi Chao, i le fa'avave ona aiaia lea seleni mo i tatou ma le galuega e tatau lava ona faia mo tagata uma o Amerika Samoa e femalaga'i ma fa'aaoga nei galuega."

 

ASIASI MAI VA’A FOU US COAST GUARD "JOSEPH GERCZAK"

 

Na taula loa le USCoast Guard Joseph Gerczak i le UafU i Fagatogo i le aso Gafua na te'a nei, ona fa'ailoa mai loa lea e le sui fa'asalalau a le US Coast Guard, Sara Miur, ua mafai ona ulufale i ai nisi e maimoaina lea va'a fou lava a le Coast Guard a le Iunaite Setete o Amerika.

 

O le lona lua lea o tausaga o lea va'a, ma o sui fo'i e faigaluega ai i luga e to'a 24 i latou. O le tama'ita'i E5 Christina Kimball e va'aia atoa lea va'a, peita'i e i ai le tama'ita'i e to'alua i ai sui o lo'o galulue i luga o lea va'a i galuega suesue ma tausailia o nisi ua lipotia ua se pe leiloa i luga o le sami loloa, o le gataifale o Iunaite Setete o Amerika.

 

I le o'o mai fo'i o asiasiga a le USCG Jospeh Gerczak e 9 lelei aso na malaga mai ai mai Hawaii lea e fa'amautu i ai a latou tautua suesue. O le ulua'i malaga lenei a lea va'a i le tatou gataifale ma o lo'o tautua fo'i se tasi o tama'itai Guamoro i luga o lea va'a, Petty Officer Zachey, ua latalata i le 10 tausaga o lana tautua i le USCoast Guard.

 

Sa ia fa'ailoa, "O le tautua ai i le US Coast Guard o se fiafiaga lea ia te a'u, aua ua sa'o la'u fllifiliga, ou te fiafia e folau ma e matua sefe lava fo'i va'a ua saunia lelei mo le fa'atinoga o tiute ma folau ai i luga o le vasa. O le va'a fo'i lenei ua mae'a fa'aauupega e le Coast Guard ina ia puipuia ai le gataifale i galuega tuli va'a e solitulafono i luga o le vasa. O le ala lea e fa'ala'ititi ai lona fausaga, ina ia vave fa'atino tiute na i le sami. Ua i ai le fana malosi ma e fa'atonutonu mai totonu i le Ofisa o le Kapeteni, ina ia le fa'atali pe a o'o na fa'atino le fa'amalosiga o tulafono a'o tiute e puipuimalu o tatou gataifale."

 

O le tama'ita'i Samoa Petty Officer Mili Poching mai Fagasa ua atoa le 17+ tausaga o lana tautua i le US Coast Guard, peita'i sa ulufale atu i totonu o lea tautua mai Hawaii, ua ia fa'ailoa le aoga fo'i o lana tautua i lona atunu'u ma atumotu o le Pasefika o lo'o avea ma teritori o le Malo tele.

 

"Ua silia i le 17 tausaga o la'u tautua, ma e matua ou fiafia lava i ai, aua ua lava ai le malamalama i le tele o tulafono e ao ina fa'amalosia fa'avaomalo e tusa o le tatou Moana Sausau, ua fa'apena fo'i ona fiafia e fa'amasani ma isi tiute uma lava i luga o va'a ma folauga, aua e uma ane fo'i tausaga o lau auaunaga i le USCoast Guard, ae tele ai agava'a e sailia ai se isi galuega mo oe i si matagaluega eseese o le Malo."

 

O le isi itu lelei o lea auaunaga, ua mafai nei ona fa'aulu atu nisi o alo o le atunu'u mai le tatou Malo i totonu o le US Coast Guard, ma ua i ai le tatou sui Mili Poching iinei mo lea fa'amoemoe taua.