Ads by Google Ads by Google

Tala I Vaifanua

TATALA TALAVAI FOMAI O'CLAIRE -TAOA I PAGO PAGO

 

O le taeao o le aso Lua na tatala aloa'ia ai talavai e siakia ai Mata, Fatu, Suka ma isi gasegase ua a'afia ai tama ma tina matutua i le latou Ofisa Autu i Pago Pago.

 

E pei ona lau silafia, ua atoa ai nei le lima o tausaga o malaga mai pea nei ali'i foma'i ma latou siakia le soifua o tatou tagata e ala i a latou talavai nei e faia e aunoa ma se totogi. Na mua'i fa'afeso'ota'ia lava i latou e le "Sosaiete a Tama Moemiti i Mea Lelei" - Men of Promised Ministry - ina ia latou fa'atautaia ni malaga fa'apenei e fesoasoani i ni talavai mo tagata e maulalo le tamaoaiga o le tatou atunu'u.

 

O a latou malaga e o mai lava i le vaitau o tu'uaga umi nei o a'oga, ma ua fa'ailoa mai e Bishop Vaifanua Mulitauaopele, "O le lima ai lenei o tausaga o faia pea lenei galuega ina ia maua pea se avanoa e fa'ao'o mai ai se fesoasoani i o tatou tagata matutua ae maise fo'i o le fanauiti. O le lipoti tau le soifua maloloina o le fanauiti, o le matou lipoti lea sa fa'asalalauina aloa'ia ai le tulaga o a tatou fanau pepe ua matele ina a'afia i le gasegase o le fatu e amata mai lava i le fananau mai. O lea ua matua aoga ai lava le faia mai pea o nei asiasiga ma siakia o tatou tagata e amata mai pepe se'ia o'o i o tatou matua matutua."

 

"I le talavai i Pago Pago ua maua ai le avanoa lelei mo tagata matutua o aofia i le Polokalama TAOA.”

 

O le aso ananafi na faia ai le talavai mo fanua i le Maota o le Galuega Antioch i Iliili.

 

O le taeao nei, Iulai 5, o le a suaina ai le eleele mo le galuega amata o le Falema'i a le O'Claire iinei. O lea vasega o falema'i, o lo'o malaga mai le susuga le CEO aoao o falema'i e 23 ua i ai nei i South Carolina a le EAU CLaire Medical Clinics, le susuga Dr Hamilton ma ua malaga fa'apitoa mai fo'i ina ia auai i le suaina o le eleele mo le fausaga o le falema'i atoa iinei.

 

O le aso Lua na fa'ato'a o'o mai ai le alo o Mulitauaopele, o ia lea o lo'o avea ma tausitusi o tulaga tau tupe mo le fa'amoeme.

 

Ua mae'a fo'i ona pikia le vasega o Kamupani Faufale mo le galuega, ua taua'aoina lea i le PRIMO Construction iinei.

 

O se saunoaga a le susuga Mulitauaopele, sa ia fa'ailoa mai ai, "O le lima o tausaga o tu'u o mai malaga nei e faia talavai mo tagata o Amerika Samoa sa latou va'aia, ua iloga ai ituaiga gasegase o lo'o aafia ai o tatou tagata, fa'atasi ai ma togafitiga o lo'o ua tau fa'afo'ia ai o latou tiga. O se mea lelei, ua i ai fo'i ni fa'amaumauga maumaututu a le matou vasega o foma'i e amatalia ai ona matau ma mita'i le fa'agasologa o le soifua o le mamalu lautele e ala i gasegase o maua ai, ma ni fa'aletonu e ono alia'i fo'i ona o togafitiga o lo'o faia pea i ai, e tau fa'afo'ia ai o latou tiga. E aoga tele le i ai o ni fa'amaumauga nei a'o e ulufale atu e tausili se togafitiga o sou ma'i o e maua ai."

 

POLOKALAMA FA'AMANATU 50 TAUSAGA O FAGAITUA HIGH

 

O le savaliga na tatala aloa'ia ai le vaiaso atoa o le fa'amanatuga o le 50 tausaga o Fagaitua High ma sa va'aia le savavali fiafia o i latou uma na maua le taimi avanoa e auai ai i le pitonu'u o Utusi'a, Fagaitua e amata atu ai le savaliga e aga'i atu i le Lotoa i le ogatotonu o Fagaitua.

 

O le savaliga sa vaevaeina i ona vaega e 8, ma sa fa'atautaia mai le ulua'i tausaga 1968 na umusaina ai le a'oga ma le ulua'i vasega fa'aiuaso 1969 se'ia pa'ia mai le 2018 lenei.

 

O le savaliga sa i ai ma ta'avale teuteuina fa'apitoa e vaitausaga ua fa'atulaga ai le savaliga. Ma sa va'aia le va'a muamua lava e na'o se va'a paopao, soso'o mai lea ma le va'a ua fai ona foe e pei o se Fautasi, ae mulimuli ane ai le ta'avale teuteuina matagofie lona fa'amau fa'ailoga o le Viking, ae mulimuli atu ai le ta'avale teuteuina e matua matagofie le pa mai ai o le musika, ma e la'ei uli uma fo'i le fanau o lo'o i ai i luga, ae ta'imua mai ai le susuga le Ali'i Pese o Richard Parker ma lana aufa'aili lea na fa'afiafia i le afiafi o le aso Lulu i le Lee Auditorium e fa'ailoga ai le 50 tausaga o Fagaitua High.

 

I le to'ai taunu'u i le Malae ua va'aia ai le fa'atusa o le Viking Tele ua saunia ina ia tatalaina aloa'ia i lea aso fa'amau fa'ailogaina o Fagaitua, po'o le Fetu tutasi i Sasa'e. Sa tula'i le Peresetene o le Sosaiete a Tama ma Teine Tuai o Fagaitua, Tuimavave Tauapa'i Laupola ma ia saunoa e tusa o foa'i fa'apitoa a le Asosi lenei mo le A'oga.

 

Muamua le poloketi e toe fa'aleleia ai suavai sualua i le Laumua, ma ua fa'aigoaina o le Reverse Osmosis, e fa'aaogaina lea a'o le'i ki mai le suava mama e inumia e le fanau.

 

Lona lua o galuega o le fa'apipi'ia lea o ili tetele i totonu o le falea'oga tele. Ole tuai mai o le va'a lea e uta mai ai nei oloa, ua tuai teisi ai le galuega lea. Lona tolu o le Tinoitupe ua mae'a na tolaulauina muamua e fa'amati'e ai le galuega o le falea'oga fou, ma ua tu'ufa'atasia ai e le Asosi a Tama ma Teine Tuai le $3,000 mo lea fa'amoemoe.

 

Galuega lona fa o le Poloketi lea o le Ma'a Fa'amanatu fa'atasi ai ma le vaega e teumau ai "Alofa'aga  mai le vasega o fanau a'oga uma a Fagaitua mai le ulua'i 50 tausaga o Fagaitua High i le vasega o fanau a'oga uma i le isi 50 tausaga o le a'oga i le Lumana'i." O lona uiga o lea alofa'aga o le a fa'ato'a toe tatalaina i se polokalama fa'apenei e faia i le tausaga 2068.

 

O le fa'atagata o le Vikings i Fagaitua, ua fa'ailoa mai o se sao lea o le fanau ma latou aiga o le tina o Senovefa Seumanu Pritt, o ia o se sui fa'au'u o le ulua'i vasega fa'aiuaso i Fagaitua i le tausaga 1969, ma o se tasi fo'i ua iloga lona sao i lana a'oga i tausaga uma i lona auai i mea e fai, atoa ma lona fa'amaopoopo i mea uma e tapena mo le Laumua i Fagaitua.

 

O le keke fo'i o le fa'atasiga e fa'amanatu le 50 tausaga o Fagaitua, sa matua tutu mai sui totino ta'ito'atasi a vaega nei e 8, tofu ma le naifi ma latou toto'o i le keke ia fa'amanuia ai le fa'atasiga.

 

O le susuga le Lutena Kovana Lemanu Peleti Mauga sa ia saunoa fa'afetai, fa'amalo ma fa'amanuia i le fa'amanatuina o le 50 tausaga o le Laumua, "O le fetu tutasi mai Sasa'e ua suluia ai fo'i lenei itu lalolagi i lona malamalama. Ia outou filifili i le Ola, ma ia saili le atamai e fa'asusulu atu ai atili, sailiga o outou faiva e agava'a ai, ia matua fa'ai'uina o outou faiva!"