Ads by Google Ads by Google

Tala I Vaifanua


O lo ua molita'i atu le Tanoa o le measina a Samoa, o se fa'ailoga o sosia o fa'amanuiaga e ao ina puna mai pea i totonu o le Ofia o le VA a le Malo Tele ma lona failautusi Wilkie, ina ia sasa'a ma fa'soa mai i le VA atoa i Amerika Samoa ma Samoa. [ata: foa'i]

MALAGA MAI FAILAUTUSI VETERANS AFFAIRS A LE FETARALE

 

Sa taligamalo a Amerika Samoa i le aso Lulu ua te’a i le oo mai o le Failautusi o le Veterans Affairs (VA) a le fetarale, Robert Wilkie ma lana aumalaga, e aofia ai le sui sinia o le Matagaluega o le Initeria a le fetarale, Nikolao Pula. Sa malaga mai i latou i se va’alele a le fetarale.

 

O le ava usu o le feiloa'iga i na tapena e le Ofisa o Mataupu Tau Samoa, na fa'ataunu'u i le Fale Samoa i le Malae o Suigaula a le Atuvasa i Utulei i lena lava taeao.

 

O i'ina fo'i na tali fa'aaloalo ai le tatou faigamalo i ana malo fa'aaloalogia, e ala i le sua fa'atupu ma fa'aaloaloga fa'atamali'i lea sa taua'aoina ai fo'i measina a le atunu'u.

 

O le susuga a Wilkie, o le ulua'i failautusi lea o le VA ua afea le teritori. Ina ua mae'a le ava fa’atupu sa asia e ia le falema'i mo se fonotaga ma taitai o le LBJ.

 

"Ua iloga mai, ua amanaia lava i matou fo'i ma se auaunaga sa faia i vaitau o tiute ma o talavou fo'i, i le vaega au, lea ua afio mai lava le ali'i Failautusi, tau ia ina ia togi pa tau i le 'ave e pei o lena alagaupu a le atunu'u,” o se tala lea a Ketesemane Meaole e tusa o le malaga mai a Wilkie ma feiloa'i ma i latou uma i le latou Ofisa Tutotonu o Mataupu Tau Fitafita Tuai i Tafuna.

 

Sa talanoa Wilkie i fitafita tuai aua o latou manaoga i le VA i Tafuna.

 

Sa auai mai fo'i ma Aumua Amata, le sui o Amerika Samoa i le Konekeresi, i lea fonotaga, ae maise isi nofoaga sa asia e Wilkie.

 

I le tautalaga a Wilkie, sa ia saunoa ma fa'afetaia le sao o fitafita tuai Samoa uma lava ua fai i lagi le tuligasi'a ma ua malolo mai i ti'asa.

 

"E le fesiligia lo latou sao i le tamaoaiga tausi o Amerika Samoa ma Samoa. Ua iloga fo'i le latou tomai sa fa'aaoga e tautua ma puipuimalu ai le Iunaite Setete atoa ma Teritori o Amerika, fa'apea ma atunu'u fo'i sa latou tautua ai e ala i taimi o taua ma fevaevaeaiga, ua fa'alautele atu i ai le latou tautua matavela. Fa'afetai ma ia matou manatua pea lo outou sao aoga tele i le taimi nei ma lona saogalemu ma o lo'o fa'aauau mai pea lena tautua aoga e nisi o outou olo'o sasao mai nei."

 

Na fa'aauau lana sanunaoga, "E le maulalo fo'i le va'ai a le Malo tele, aua sa malupuipuia e fitafita tuai Amerika Samoa ma Samoa lana faigamalo i ona setete ma ona teritori uma, ona o le latou tautua a'o tiute i taua e fia sa tautiga ai ona o le saogalemu o o tatou tagata uma, malo ma meatotino. Fa'afetai! O a lava la alamanuia ua le o'o mai, o le a matou galulue maumaua'i ina ia fa'auia mai, o le tali fo'i lea a le Malo o le Iunaite Setete e fa'afetaia ai la outou tautua na fa'ao'o a'o outou nopia a'i i faiva na. Toe fa'afetai atu le onosa'i, ae maise o le agaga i le tatou nofo lelei ma tatalia o tatou manuia."

 

Na ia fa'asoa mai fo'i o ia e tusa o lona tuputupu a'e ae ona va'aia pea le tautua a lona tama ma le vaai maualuga a lona tama i le auaunaga a se tasi o taitai iloga o le vaega au, General Mathew Ridgeway lea sa ia taitaia le vaega au i le taua i Aferika, Sicily ma Korea.

 

I le saunoaga tali a le afioga Kovana Lolo Moliga, sa ia fa'ailoa ai, "O lenei fo'i asiasiga a le Failautusi o le VA a le Malo tele, ua mautu ai lo tatou iloa, ua amata ona latalata atili mai le va'ai toto'a a Iunaite Setete i le tatou nei teritori i so'o se mea sa tatau ona latou mua'i taga'i toto'a i ai. E moni saunoaga ua pa'u nei a le ali'i Failautusi, e taua fo'i le sao o fitafita tuai i le faigamalo a Amerika Samoa, aua ua tele le tamaoaiga o lo'o ua sasa'a mai e le Malo tele ona o le latou tautua ua mae'a ona fai, ma ua fa'afetaia ai lo latou manatu ina ia alaala tumau i o tatou laufanua ma aiga, i lo latou taimi ua litaea ma matutua ai, tusa lava po'o a isi mau alagamanuia ua latou misia ona o le nonofo ai iinei ma aiga. Fa'afetai ma e taua la outou mau, ina ia fa'amautu mai ai fo'i alagamanuia na, a'o loma le taliu mai fo'i ole to'atele o fanau ma aiga o lo'o fa'aauauina le tiute fa'afitafita i so'o se tafa o le lalolagi."

 

O meaalofa fo'i na taua'aoina mo le malaga, ua i ai lona to'oto'o, o lona fue ma le tanoa ava. Ua taulimaina fo'i le tusi o le atoaga o le 100 tausaga o le mafutaga a Amerika Samoa ma le Malo tele ma le tele o pusa Wahoo.

 

MAFAI ONA AUSIA ASTCA AIAIGA FIRSTNET A LE AT&T IA IANUARI

 

Ua fa'ailoa e le CEO o le ASTCA Lewis Wolman, "E ausia e le ASTCA ona fa'atula'ia le FirstNet a le AT&T ma ona aiaiga uma a'o le'i o'o mai le taimi e fa'amuta ai aiaiga uma mo lea tautua ia Mati 2020. E mautinoa e gafatia ona ausia lea tulaga ia Ianuari 2020, ona toe tagai toto'a lea i ai, i nisi mea e fa'aletonu, a'o le'i muta le taimi atofa ia Mati 2020, e pei ona toina mai ai e le Feterale."

 

O le FirstNet o le tautua fa'ainiteneti lea ua sili ona saoasaoa e tatau ona fa'atautaia ai feso'ota'iga a i latou o e taimua atu e fa'ao'o fesoasoani i tagata lautele ma le Malo pe a o'o ina lutia i so'o se ituaiga o fa'alavelave fa'afuase'i tau natura pe e afua fo'i i faiga fa'aterarisi.

 

O le taumafaiga ina ia ausia e le ASTCA aiaiga uma ua fa'ataoto mai ai lea tautua, e le'i faigofie peita'i ua ausia nei e le ASTCA, o se galuega tele ma sa tu'u i ai le malosi ma le taumafai o e galulue punoua'i i le ASTCA ina ia mafai ona fa'amautu.

 

O le tautua lea a le AT&T na taua'aoina i ai e le Feterale le $6miliona ina ia fa'atino ai, ma e mafai fo'i ona maua ai se vaega tupe a le ASTCA mai lea aofa'i o le tupe ua toina mo le FirstNet, pe a o'o ina ausia e le ASTCA aiaiga nei ua nofo sauni atu e fa'amae'a lelei ia Ianuari 2020.

 

"Ina ia maua'i le pasiga a le Feterale o le FirstNet a le ASTCA o lo ua mautinoa e tatala lea tautua ia Ianuari 2020, a o'o atu i ai ae i ai ni faaletonu e mapuna a'e i nei so'otaga, a'o i ai le taimi e toe fa'aleleia ai, a'o le'i mae'a le taimi atofa mo le pasiga a le feterala e agava'a ai ASTCA i le FirstNet ia Mati 2020,” o le tala lea a Wolman.