AISEA NA LE AVEA AI $100,000 FANAU TA'A'ALO TA'ALOGA PASEFIKA?

A taga'i i le aotelega o fa'asea na fa'ailoa mai e le mamalu lautele i ala o feso'otaiga i le Facebook, ua fa'ailoa ai, o le tele o ia fa'asea ua agaga i le taua'aoina na'o le $20,000 mo fanau patino a Amerika Samoa mo Ta’aloga a le Pasefika i le masina ua te’a ae foai e le malo o Amerika Samoa le le $100,000 sailiga tupe a le Man Samoa lea na faia i le teritori i le vaiaso ua te’a.

Ua faliu fo'i le afioga Kovana Lolo Moliga e fa'ailoa le mafuaga na le foa'ia ai lea vaega tupe na manatu muamua lava o ia e taua'aoina.

Muamua, na fa'ailoa manino mai e le ASNOC, e le mafai ona foa'i fa'apena atu i le Malo i se taumafaiga a fanau e ala i ta'aloga fa'avaomalo. Ina ia le molita'i o se tinoitupe ua foa'ia e ala i faiga fa'apolokiki o ni kemupeni mo le palotaga.

O lana lea tali mo le silafia o le vasega o e fa'asalalau, ina ia talia ai le to'atuga o tagata lautele.

"Na ou fa'atulagaina le Fa'atonu o Tupulaga ma Tamaita'i, ma lona sui fa'atonu, latou te soalaupule ma le ASNOC a'o le'i taitai mai i le ta'aloga a le Pasefika, ina ia fa'ailoa mai se mea e manana'o ai  i le tulaga tau le tupe e faia e le Malo, e fesoasoani ai i le fa'amoemoe o fanau o le a tauva mo le Pacific Games."

Na taua'aoina mai le ripoti fa'amauina e le ASNOC, e le mafai ona faia sa'o atu e le Malo se foa'i tau tupe i le ASNOC e fa'aaogaina mo fanau ta'a'alo a le atunu'u, ina ne'i avea ma se ala tu'usa'o e fa'atauanau ai ni palota ma faiga fa'akemupeni e ala i ta'aloga.

"Na ou manatu lava e taua'aoina lava le $100,000 mo le fa'amoemoe, o se vaega tupe mai le alagatupe mo Polokalama Fa'apitoa mo Ta'aloga a le fanau a le atunu'u. O lea fo'i vaega tupe o lo'o fausia ma fa'aleleia ai nofoaga mo so'o se ta'aloga e avea ma latou Ofisa Autu i le Stadum i Tafuna, lea lava ua fa'aaogaina e aunoa ma se totogi e Ofisa Autu o Ta'aloga Taitasi i totonu o le atunu'u."

"Ina ua ou iloa ua finagalo le afioga le Lutena Kovana e taua'ao atu le $100,000 mo le aumalaga masi'i mo ta'aloga nei, sa ou fa'ailoa i ai, e malaga le MV Manu'atele lll e ave le au ta'a'alo i Samoa, ma o le sao lena o le malo mo le fanau ta'a'alo. Ma ua faia lava fo'i ma le meaalofa e $20,000."

O se tasi o mataupu tulai sa fesiligia ai le kovana, o le itiiti o le fa'asoa tau tupe a le ASNOC. I le nofoaga sa atofaina mo le fanau ta'a'alo, e le'i alaalata'i fa'atasi ai ma sui o le ASNOC ma ta'ita'i o le Malo sa malaga fa'apitoa mo le fa'amoemoe e aofia ai ma le Tausala Lalelei o Amerika Samoa, peita'i ua alaala i latou i nofoaga taugata e ta'i $ST500 i le aso e tasi i le faletalimalo o le Sheraton Aggie Grey's Hotel."

O le lisi o le aumalaga na fa'ao'o atu e 300 i latou, ma sa toe fa'ailoa atu ina ia fa'aitiitia lea lisi e le ASNOC ina ia le tigaina i le totogi o le nofoaga e alaalata'i ai.

Saunoa le kovana, "O le isi vaega e ao ina manino atoatoa i ai le Malo, o se tala o le tupe fa'asoa a le ASNOC i le tausaga atoa, ina ia fa'ailoa ai lo latou mana'omia o i ai e soalaupule ai se taumafaiga e taua'aoina e le malo i ni ala e mafai ai e tusa o tulafono patino ua latou fa'ailoa mai e le tatau ai ona tu'usa'o atu fesoasoani tau tupe mo i latou."

E fa tausaga lea sa latou tapenapena mai ai mo lenei fa'amoemoe, ua iloga fo'i sa matua latalata mai ia i tatou le nofoaga o ta'aloga, toe taugofie pe a fa'aliliu i ai le tatou tupe Amerika, o ala nei sa manatu ai ua mafua ai ona latou fa'ailoa mai lea vala o le tulafono tau fa'atupega mo le ASNOC, ia le fete'ena'i ma ala o fa'akemupeni ta'aloga a le fanau.

Fa’ailoa e le kovana, "Ua le lisia lea meaalofa sa taua'aoina, o se fa'atupega a le malo mo le ASNOC, ae ua lisia i se isi ituaiga o foa'i ua talafeagai ma latou aiaiga o fa'atupega e fesoasoani mo le masi'i atu o 'au ta'a'alo e fa'atauva i fafo." Sa fa'aalia fo'i i le tele o tala ua fa'asau i luga o le Facebook, sa i ai misa'aga sa faia a le taupulega i Samoa, fa'atasi ai ma nisi o fa'aletonu ua a'afia ai fanau ta'a'alo ona o faia'oga o ta'aloga sa masi'i atu mo ta'aloga a le Pasefika.

ASIASI MAI FAILAUTUSI VETERANS AFFAIRS A LE FETARALE

O le taeao o le aso Lulu o le vaiaso lenei na taunu’u ai i le teritori le malaga a le Failutusi o le Veterans Administration a le malo tele, Robert Wilkie. Sa faia le ava o feoloaiga i le malae i Utulei, soso’o ai le asiasiga i le Falema’i i Fagaalu e vaavaai ma iloa ai fo'i ala o lo'o tautuaina ai Vetereni i le teritori.

Fa’ailoa e le faipule i le Konekeresi, Aumua Amata, "O lo ua iloga mai, e naunau tele Robert Wilkie e fia o'o atu ma feiloa'i ma tatou Vetereni uma o alaala i Amerika Samoa. Ua manatu fo'i o ia, o lo'o soifua i latou i se olaga e tumu i ni fa'afitauli e ao ina taga'i toto'a i ai le pulega o tautua mo Fitafita Tuai ma faia i ai ni suiga lelei. O lo'o naunau o ia e asiasi atu i le tatou teritori."

MOLIA LE TO'ALUA O LE TAMA'ITA'I VIET NAM I SAMOA & ALII LEOLEO

I se lipoti mai Samoa o lo’o fa’ailoa ai, o le ali'i leoleo na ia taliaina se togitupe na ofo ane e le to'alua o le tamaita'i Viet Nam o lo'o taofia ona o le ulufale i Samoa ma fualaau fa’asaina ua molia fo'i i le talia o se togitupe ina ua maua ane i suesuega o faia.

Ua molia nei le to'alua o lea tama'ita'i Viet Nam, ma ua fa'amalolo se tasi ali'i leoleo ona o lea lava fo'i suesuega e tasi.

Ua fa'ailoa mai e le ali'i Komesina, Fuiavailili Egon Keil, "E le mafai ona tu'u pea mea fa'apenei e faia pea, ua avea le tofi leoleo ma ala ua solituina ai le tulafono sa tatau ona ia fa'amamafaina. E malu le tulafono ona o leoleo e faia o latou tiute i le fa'amaoni ma le tonu."

Ua ese lava moliga ua fa'asaga i le tama'ita'i Viet Nam ese fo'i moliga o lona to'alua ma le ali'i leoleo lea ua fa'amalolo ma le isi ua saisaitia nei, e ese fo'i le taimi na fa'atino ai nei soligatulafono.

A mae'a loa suesuega ma fa'amaumauga uma a le Matagaluega o Leoleo a Samoa i nei ali'i leoleo, ona fa'ato'a fa'ao'o lea o la'ua mataupu i le fa'amasinoga.

O lea tamaitai Viet Nam sa malaga mai Singapore, afea Fiti, ma Samoa ma le fa’amoemoe e ulufale mai i Amerika Samoa, ae taofia loa i Samoa.