Ads by Google Ads by Google

Tala I Vaifanua


[ata: foa'i]

FA’AALIGA FALETUSI FELETI BARSTOW - FA'AILOGA ULUA'I TAGATA I LE MASINA

 

Ua mae'a fa'atula'ia le fa'aaliga o ata ma tusitusiga fa'apea ma ata fa'asolo a le faletusi Feleti Barstow Library, e fa’amanatu ai le 50 tausaga talu ona tulaueleele le ulua'i tagata i le Masina. O lea ali'i Saeanisi o Neil Armstrong.

 

O le meaalofa e fa'ailogaina ai lea taimi na fa'ao'o mai 'fasi ma'a o le masina e tolu' ia Amerika Samoa, ona o le latou sao i le taligamalo i sui o le Iunaite Setete na auai mai e fa'afetauia le toe fo'i mai o ali'i Asitoronoti i le lalolagi, na fa'apa'u mai le latou sela i le ogasami o le Vasa Pasefika, lata mai i Amerika Samoa.

 

O le Tina o le Atunuu Cynthia Malala Moliga sa auai faatasi ma le Taitaifono o le Komiti Fa'afoe o le Faletusi, Tapaau Dr Dan Aga sa auai fa'atasi  ma nai tagata fo'i ua latou silafia lea faamanatuga taua, na auai ma molimauina le tatalaga fa'apitoa o lea fo'i fa'ailo fa'amanatu a le tatou Faletusi.

 

O le va'a o le Apollo 11 lea sa malaga ai nei ali'i saeanisi i le Masina, o se tasi o matati'a na ulua'i ausia e Amerika.

 

O le a fa'aalia lea fo'i poloketi matagofie mo le masina atoa ina ia fa'aaogaina e le fanau a'oga ma le mamalu lautele o lo'o latou fia faitau ma maimoa ai. O le tele o nei mea uma, e aoga ona toe fafagu mai ai i le fanau ia ola finau i a'oa'oga, ae maise ia mafai fo'i ona fa'aaoga e le fanau i a latou poloketi fa'atino o le Tala Fa'asolopito lea e masani ona fa'atauva ai a'oga maualuluga ma a'oga tulaga muamua i tausaga ta'itasi.

 

Faailoa mai o lo ua fa'ailoa ai fo'i le ata o le ali'i Peresetene o Nixon lea sa ia taua'aoina le fu'a a Amerika Samoa ina ia fa'ao'o atu i le Masina e ali'i asitoronoti. O le fa'aaliga lea ua fa'alauiloa nei i le Faletusi i Utulei ua faia fa'atasia e le Feleti Barstow Public Library ma le Jean P. Hayden Museum ma le Ofisa o Faamaumauga

 

"TALANOA MAI" - FETUFAIGA MA SOALAUPULE I NI MEA E LELEI AI

 

O lo'o ua fa'aa'e nei se polokalama fa'atalatalanoa i ni manatu e soalaupule ai ni mea lelei e tatau ona fa'aleleia atili ai le tulaga o atina'e o pisinisi ma fa'aleleia atili ai le tamaoaiga o le atunu'u, ae maise lava i ona tagata lautele.

 

O le polokalama lea ua fa'aigoaina o le "Talanoa Mai!" O le tama'ita'i taitaifono o se komiti laititi a le Sosaiete a le Au Fai-Pisinisi o le atunu'u, Tisa Fa'amuli, sa ia fa'aa'e lea taumafaiga, ina ia maua le feso'ota'iga ma tagatanu'u o le atunu'u o lo'o galulue i eleele, fagota i le gataifale, ma o le alagatupe foi e tausia ai aiga, e saili mai i le siomaga.

 

Na amata lea taumafaiga i le Aso Sa ua te'a i lona itula e 2:00 se'ia o'o i le 5:00 i le afiafi, ma ua fa'ailoa mai fo'i e Tisa Fa'amuli, "E le o toe mamao le palotaga tele a le atunu'u, e tatau fo'i ona talatalanoa i mea e ao ina faaleleia o le Malo, a'o loma fo'i lea filifiliga tele i ta'ita'i e tula'i mai o le atunu'u."

 

FUAFUAGA FA'ATAOTO MO LE SAOGALEMU O LE  AUFAIGALUEGA

 

Afai o oe o se faipisinisi ae leai se fuafuaga fa'ataoto a oe mo au tagata faigaluega ina ia saogalemu i taimi uma lava e ono a'afia ai i latou i ni fa'alavelave fa'afuase'i ae o loo faigaluega, o le fonotaga i lenei aso Tofi ua tatau ona e auai.

 

O le folasaga fa'apitoa o le a fofogaina i le fonotaga a le aufaipisinisi i lenei vaiaso o le a talanoaina ai le Saogalemu i Taimi o Galuega fa'atasi ai ma le Tausiga lelei o le Soifua Maloloina o au tagata faigaluega."

 

O le a faia lea fonotaga i le aso Tofi 25 Iulai, 2019 i le Ofisa o le Kamupani Suau'u i Utulei, ma e faia i le itula e 5:00 - 7:00pm.

 

O le folasaga o le a tapena lelei e Mata'itusi Marshall, ma e aoga tele fo'i lana folasaga e mafai ona fa'aaoga e nisi o le aufaipisinisi ana fautuaga mo le aga'i i luma o lau pisinisi ma lona olaola saogalemu ma tausia lelei fo'i le soifua maloloina a'o faigaluega.

 

Ua tausoa lua e Pacific Energy ma le Harbor Maritime & Stevedoring Co. le fonotaga i lea fo'i afiafi.

 

Ua toe fa'amanatu mai lava, ina ia tima'ia i latou uma e autova'a mai i le fonotaga, o lo'o fa'asaina le ulaula i lea lava Ofisa e faia ai le fonotaga a le Chamaber of Commerce.