TAUA'AO TUSI PASI AOAOGA DOH TOBACCO DIABETES COALITION MANU'A

Ua maea le a'oa'oga fa'apitoa na fa'atautaia i Manu’a e le vaega o le DOH Tobacco Diabetes Coalition, a'o le a'oa'oga faapitoa na saunia lelei e le Stanford University na fa'atautaia mai ia Iuni 24-28.

O le aoaoga na faia i Ofu ma Olosega, fa'apea fo'i ma le Faleta'u ma ua mae'a ane le a'oa'oga matagofie i tulaga o gasegase tumau ma ona mafuaga e vave maua ai tagata lautele.

"O le to'a 19 lenei o sui ua agava'a i a'oa'oga fa'apitoa, i afuaga o le maua o tagata lautele i gasegase tumau, e aotelega ai le Kanesa, Ma'i Suka, Toto Maualuga ma Ma'i Fatu, o gasegase e le faigofie ona togafitia,” o se tala lea a le tama'ita'i o Farrah Lesa, o le DOH Tobacco Diabetes.

O lenei a'oa'oga na fa'ato'a tauaofia ma fa'atautaia ina ua mae'a mai le fonotaga na tauaofia i San Francisco, Calefornia sa malaga ai fo'i le aumalaga e to'a lima a le tatou vaega lava lea e tasi.

O i latou nei sa latou auai atu i San Francisco ina ia latou molita'i lipoti fa'amaumau uma o le fa'agaoioiga o le fa'atupega mo le fa'alauiloaina o a'afiaga tuga o le taumafa tapa'a, ma le so'ona taumafa i mea'ai le paleni, e afua ai ona fa'ateleina le gasegase o le Ma'i Suka, So'ona Mamafa Pauna ma le tele o Ma'i Fatu i le tatou atunu'u.

"Ua aoga lava le auai muamua fo'i i lea fonotaga sa faia i San Francisco e le matou aumalaga, ua toe taliu mai amatalia le a'oa'oga fa'apitoa lea mo gasegase tumau a le Iunivesite o Stanford i Manu'atele, ae ua lava tapena fo'i i ala e fa'atino ai le a'oa'oga lea, ma fa'asoa atu fo'i i ala e mafai ona malamalama lelei ai le mamalu lautele o le atunu'u, i nisi o mea e ao ina fai e le faigofie ai ona a'afia tatou tagata i nei ituaiga o gasegase tuga,” o se tala lea a Lesa.

Na tomuli le aoaoga na faia fa'apitoa i Manu'a i le sailiga lea o se latou laulauatofi mo le Komiti Fa'afoe o le DOH Tobacco Diabetes Coalition i le Manu'atele. O i latou ua tutula'i mai mo le ulua'i taimi lenei ia aofia ai: O le Taitaifono ua tofia nei o Fa'avela mai le DOH i Ta'u; Sui Taitaifono o Olo Sefo, Failautusi o Martine ma le Teutupe o Rosie.

O le Komiti Fa'afoe a Ofu ma Olosega mo le DOH Tobacco Diabetes Coalition ua mae'a tofia ai Ula Tuiolosega, ma o ia lea o le a ia tofia nisi o lana laulauatofi mo lea itu o le Manu'atele. E to'a 15 i latou na fa'au'u ma taua'aoina i ai o latou tusi pasi ina ua mae'a fo'i le a'oa'oga na faia i lena itu o le Manu'atele.

I le masina o Aokuso 2019 o le a fa'atautaia ai le aoaoga lava lea e tasi i le Motu o Aunu'u ma  saunia ai fo'i ma latou Komiti Fa'afoe.

Peta'i o le Komiti Fa'afoe a le DOH Tobacco Diabetes Coalition i Amerika Samoa o le a faia le latou fonotaga fa'apitoa i le aso Faraile ina ia talanoaina ai le latou fa'amoemoe maualuga e ao ina fa'atautaia i lenei fo'i tausaga.

AUA LE GALO ISI TAGATANUU AMERIKA SAMOA SETETE UMA PEPA FAATUMU CENSUS

Ua fa'ailoa mai e Aumua Amata, le faipule i le Konekeresi, "O le a ou fa'amanatua fo'i i le loia sili o le Malo tele, William Barr ina ia aofia fa'atasi ma tagatanu'u Amerika Samoa uma lava o lo'o alaala ma papaa'ao i isi setete ma teritori uma lava mai le Tusiga Igoa o le tausaga 2020, lea ua alofaiva atu i ai."

Ua fa'ailoa e Aumua, "O le a ou fa'amamafaina le aofia ai ma tagatanu'u Amerika Samoa o lo'o alaala i so'o se vaipanoa o le Iunaite Setete i le faitauga o le atunu'u i le tausaga 2020. O le mea e tatau ona faia, aua afai e taumafai i tatou e suia le faitauga a le Iunaite Setete i le avea o Nesionale Amerika Samoa e avea ma Sitiseni, e ao ina latou va'ai toto'a i le aotelega o le faitauga o tagatanu'u uma lava o Amerika Samoa o lo'o soifua ma le fa'asinomaga Nesionale o Amerika."

"Afai o le a faliu le Faigamalo a Peresetene Trump ina ia latou aofia ai se fa'afesili i le pepa fa'atumu o le Tusigaigoa a le Malo Tele, ua mautinoa e i latou, ua aofia ai ma tagata Amerika Samoa o Nesionale o Amerika, o lo'o alaala i isi setete uma ma teritoti o le Iunaite Setete o Amerika."

“Pe afai o le a le aofia ai ma i latou nei mai Amerika Samoa i se fa'afesili o le Tusigaigoa 2020, o le a le aofia fo'i le latou faitauga i le tele o polokalama fa'atulaga mo le tausiga o i latou e le Malo tele. O se mea taua tele le aofia o i latou i se vaega o le faitauga."

"Ina ia mautinoa e i ai le fa'atupega e aofia ai ma i latou uma o tagatanu'u Amerika Samoa o lo'o alaala i isi setete ma teritori uma, e ao ina faitau atoatoa tagata uma,”  se tala lea a le tama'ita'i faipule.

Ua le alo ese lea tusi fa'ailo i le ali'i loia sili o le malo tele, e tusa o le "agaga mitamita o tagata Amerika Samoa i le avea o i latou ma nesionale o Amerika, o se faasinomaga taua mo i latou e soifua a'e o tagata Samoa, le maualuga o le latou tautua i vaega au, ma o i latou o se vaega lauolaola o le feagaiga maoti i le va o Amerika le malo tele ma o latou tua'a sa avea ma latou ta'ita'i talu mai le 119 tausaga."

O le faitauaofa’i mo i latou o lo’o Amerika Samoa e faia foi i le 2020, ma e galulue fa’atasi le malo tele ma le Matagaluega o Fefa’atauaiga a Amerika Samoa.