Ads by Google Ads by Google

Tala I Vaifanua


O le aufaipese a le EFKAS i Faga'alu na latou usuina vi'iga e lua o le sauniga fa'afetai i le aso Faraile ua te’a, aua ua taliu mai ma le manuia le siiga ma'i a Kovana Lolo Matalasi Moliga. [ata: Leua Aiono Frost]

O nisi o ta'ita'i o le Tafatolu o le Faigamalo a Amerika Samoa lea ua aofia fa'atasi le Fa'amasinoga ma le Fono Faitulafono i lea itu o le Maota Tapua'i i Faga'alu fa'apea ma nisi o ta'ita'i o Fatafaitaulaga eseese i Amerik Samoa nei. [ata: Leua Aiono Frost]

SAUNIGA FA'AFETAI - TO'AI I FANUA  KOVANA LOLO I LE MANUIA

 

O le sauniga mamalu sa si'itia i le Malumalu "La'au o le Ola" EFKAS i Faga'alu sa ta'itaia lava e le susuga le Fa'afeagaiga Rev. Pa'au ae na auai i ai le to'atele o taiulu o Ekalesia Eseese i le tatunu'u, aua o lea ua toe to'ai taunu'u mai le faigamalaga sailiga togafiti a le afioga i le kovana sili, Lolo Matalasi Moliga.

 

"O le sauniga e toe fa'afo'i ai le fa'afetai i le Atua ina ua faliu lona finagalo, ma manatu mai e toe fa'afo'i le malosi i le ta'ita'i o le atunu'u, e fa'aauau ai galuega ua mae'a fa'au'uina e fa'atino mo le atunu'u. O le fa'afetai fo'i i le mamalu lautele o le atunu'u, ae maise o vasega o Failauga o fata faitaulaga eseese i le atunu'u sa nofo tatalo ma tapua'ia le aso lenei. Ia tatou ave le fa'amua ma le vi'iga i le Atua,” o se fa'afeiloa'iga lea a le ta'ita'i o le sauniga Rev. Pa'au i le amataga o le sauniga i le taeao o le aso Faraile ua te’a.

 

I le sauniga sa ta'i lua vi'iga o le Atua na saunia ma usuina e le Aufaipese mai le Matagaluega o Alagamanuia Lautele mo Tagata Lautele ma le Aufaiepse a le EFKAS Faga'alu.

 

I le talosaga molia sa si'itia lea e le susuga le Fesoasoani Katolika i le afio'aga lava o Faga'alu, ae o le faitauina o le Tusi Pa'ia ma le Upu fa'amalosi, na si'itia lava e le susuga le ta'ita'i,

 

E fai tusi o le Tusi Pa'ia na toina mai ai le Upu fa'amalosi e Rev. Pa'au. Tusi a Iona, tusi a Salamo a Tavita, tusi a Paulo ia Roma ma le tusi a le Evagelia na siitia mai ai le Ma'i Supa ia Iesu.

 

O le Mau na maua mai i le Roma 2: 9 "A'o a'u ou te faitaulaga ia te oe i le Upu fa'afetai, ou te faia le mea na ou tauto ai, mai lo'u Ali'i lo'u olataga." Peita'i na fa'aautu e le failauga le auau o lona manatu, ma ia fa'apea ai, "O le Mana o Tatalo!"

 

"E ui ina itiiti le fa'atuatua, ae a malosi le fa'atuatua itiiti lena e suia mai ai le fa'aiuga a le Atua, i le mea ua e augani fa'atauanau atu ai. Aisea e suia ai fa'aiuga a le Atua? Ona o tatalo a ona tagata fa'atuatua ia te ia."

 

Mai le Salamo 27 ua fa'apea ai Tavita, "Ana ou le fa'atuatua, ou te le iloa le Atua i le nu'u o tagata ola." Aisea e asiasi mai ai le Atua ma toe suia lona mafaufau i mea ua tau olioli e o'o mai, aua ua tatalo fa'atauanau ona tagata fa'atuatua ia te ia. E afe ane le Atua, e pa'i ane fo'i o ia e tali mai fo'i i le tatalo atu a ona tagata fa'atuatua moni ia te ia."

 

Na saili Iona i lona Atua ina ua ia lagona lava, po'o le a le loloto o le moana, ma totonu o le manava o le i'a o lo'o ua tanumia ai, ae fa'afofogaina e lona Atua lana tatalo. O lona fa'atuatua lena sa tali ai Ieova ia te ia, e le asa lava le tatalo na si'i atu, ma le tali mai.

 

"Na ou manatua oe Ieova i let aimi na ou mafatia ai..." O le Atua e galue i le mea lilo mai le va'aiga a tagata, e fa'aalia fo'i lona mana i mea ua uma ai le iloa o le tagata soifua.

 

E tatau ona fa'aalia le tele o lou faatuatua patino i le Atua, ona tali mai lea. "Le Atua e, a aunoa ma oe, ua le aoga lava a'u. O le taimi ua e iloa lelei, o lou fa'atauva'a, e toe fa'aea ai oe e le Atua, ona ua e tatalo atu ia te ia ma se suiga. Ua e loto atoa i lena suiga, ua naunau lou loto ia te ia. E ave oe e lou fa'atuatua i lou Atua e faliu ai e fesoasoani mai, fa'atino lou mana'o."

 

I le saunoaga a le kovana sa ia fa’apea ai, "Fa'afetaia le atunu'u atoa ona o le nofo tatalo mo a'u. O ai lava lea ua outou manatu mai ai? Mai le taimi atoa sa ou ma'i ai, ou te le'i lagona fa'atasi se tiga i lo'u tino, o le mana lena o a outou talosaga. Mafanafana atu ai ma lo'u loto, o lo'o fa'amanuia le Atua i le sailiga togafitiga."

 

Sa ia fa'afetaia le atunu'u atoa, sa ia fa'afetaia fo'i ta'ita'i ma Fatafaitaulaga e fia i totonu o le atunu'u, ona o le nofo tatalo mo ia, ae tainane le vasega o matua matutua o le atunu'u ma le mamalu lautele.

 

"Ua tatou o'o atu i le 70, o tausaga ia o le malosi e pei ona fa'ailoa mai e le Tusi Paia, ae a sili atu, o le alofa faivavega lea o le Atua aua o tausaga ia o ma'i ma mea tiga o le tino,” o sana tala fa'afaufautua lea i le mamalu o e ua tino matutua o le atunu'u.

 

SUI NUSIPEPA IAPANI - ASAHI SHINBUN - SAILI TALA 'MV WISE HONEST'

 

O le vaiaso ua te’a sa taunu’u ai i le teritori se sui o le nusipepa Iapani, Asahi Shimbum i Tokyo, e sailia fa'amaumauga e tusa o le va'a la'u oloa a North Korea, Wise Honest, o lo’o taofia i Amerika Samoa i le va’avaaiga a le malo fetarale.

 

O lea sui tusitala Koji Sonoda, e fa’amautu i Washington D.C ma ia tusia ai tala mo le Asahi Shimbum.

 

O nisi o ana fa'afesili, sa ia fia iloa pe na manana'o lava tagatanu'u ma le Malo o Amerika Samoa e aumaia lea va'a i le teritori? Pe o i ai fo'i se finagalo o le Malo o Amerika Samoa e fa'afinauina se mataupu e ao ina malilie fa'atasi ai i latou ma le Malo Tele ina ia toe ave'esea le va'a lea mai lo tatou gataifale.

 

Fa’ailoa e Sonoda i le Samoa News o lo'o i ai fo'i fitafita Iapani o lo'o faapagotaina i Korea i Matu, ma o se taumafai mai a Iapani e iloa le afuaga o le toso mai o le Wise Honest i ogasami e pulea a e Amerika, o lo'o taumafai ai ona latou iloa, pe alagatatau fo'i ona latou fa'ata'ita'ia, ina ia tatala atu ai fo'i se avanoa e feutaga'i ai latou fitafita o vaega au o lo'o saisaitia i lea malo.

 

Sa ia fesiligia pe mata sa tete'e nisi o le mamalu o faipisinisi va'a oloa ona o le fa'alavelave o le tulaga o taula ai le Va'a i le ogasami tonu e aga'i mai ai i totonu o le Uafu tele mo fefa'ataua'iga o oloa? Peita'i i lea fa'afesili, sa fa'ailoa i ai le Uepesite a le Samoa News ma isi fo'i alaleo fa'asalalau eseese i le atunu'u, ina ia faitau i ai o ia i tala tusia ma fa'amaumauga.

 

Fa’ailoa ia fa’ailoa foi ua mafua ona sau, ona o le matauina e le latou Nusipepa ua tatala nei le avanoa e fa'aulu le tagi a le aiga sa fa'afalepuipuia lo latou alo i Korea i Matu. O lea tagi, faaulu i le fa’amasinoga fetarale i New York, e talosaga ai e lea aiga, le tuuina atu o le Wise Honest, e totogi ai le sala a Korea i Matu, sa faia e se tasi o fa’amasinoga fetarale.

 

E 15 masina na nofosala ai lea atali'i Amerika e 21 tausaga i Korea i Matu, ae toe tatala, peita'i e na'o le ono aso na o'o ai lenei atali'i i lona aiga, i Amerika ae maliu. Ua matua vaivai lona tino, leaga lona mafaufau.

 

Ua fa'auia fo'i i le Ofisa o le Kovana le ali'i tusitala, ina ia fa'afesiligia e ia se lagona fa'aalia o le ali'i Kovana e tusa o lea mataupu.