Ads by Google Ads by Google

Tala I Vaifanua


O le foa'i a le American Samoa Community Cancer Coalition mo le tina o le tama'ita'i faia'oga o Lua'ipou, ua ia fiafia tele e talia mo si ona tina, ma ua fa'afetaia e ia lenei foa'i i taimi fo'i o feagai ai si ona tina ma togafitiga. [ata: foa'i]

O le tama'ita'i o Uatea Autele lea ua ia taliaina le fesoasoani tupe a le American Samoa Community Cancer Coalition (ASCCC) mo lona tama, le afioga Senatoa Faufano Autele, aua sa talosagaina e ia le fesoasoani a'o taumafai e malaga i fafo ina ua po'ia o ia i le Kanesa mo ona togafitiga. Ua faafetaia fo'i e lenei tama'ita'i talavou le a'ao fesoasoani o le ASCCC. [ata: foa'i]

FA'AAUAU PEA FOA'I AMERICAN SAMOA COMMUNITY CANCER COALITION

 

I lenei masina ua fa'ailoa mai ai le agaga fa'afetai tele o nisi o aiga ua o'o i ai le fa'asoa a le American Samoa Community Cancer Coalition (ASCCC). O le fanau a le afioga le Senatoa mai le Manu'atele Faufano Autele, ua fa'ailoa mai lo latou agaga fa'afetai tele, aua sa malaga atu le tama mo ana talavai ina ua po'ia fa'afuase'i i le kanesa i Hawaii, ma ua tu'ua ai le Malo a'o faia pea ona togafitiga.

 

O lona alo tama'ita'i o Uatea Autele sa ia mauaina lea fesoasoani tau tupe mo le totogia o ona pili falema'i ma ua fa'afetaia e ia lea fo'i fesoasoani, ae sili ona taua ia i latou o le agaga alofa ma fa'amaisega ua latou maua mai fo'i lea ASCCC ona o lea i faiilagi lea taumafaiga a le tama.

 

Ua faapena fo'i se talosaga sa fa'auia mai e le tina o le tama'ita'i faia'oga o Lua'ipou, ma ua ia taulimaina fo'i le foa'i mai le ASCCC mo si ona tina, ma ua fa'afetaia fo'i e ia lea fesoasoani taua tele i taimi o le mana'omia.

 

"O le tala o le Tusi, e sili le taui e maua e le foa'i ma le agaga fa'amaoni nai lo le na te talia. Fa'afetai fo'i ia i latou uma na foa'i e ala i fa'atauga i le Ace Neil Home Center, lea e fa'atupeina le foa'i taua i le American Samoa Community Cancer Coalition mo nei foa'i taua, e fesaosoani malosi mo i latou ua a'afia i le Kanesa. Ia fa'amanuia le Atua i lau foa'i ma le loto i lenei fa'amoemoe."

 

SIITIA TOTOGI PAKA MO TOLAUAPI AUTALAVOU MA FA'ATASIGA

 

I le taumafaiga e fa'amautu fa'aiuga o ni fa'atasiga mo le fa'aaogaina ai Paka ma Malae a le malo, ua maua a'e ai, ua suia fo'i le totogi e ao ina totogia ai nofoaga faitele pe afai o le a fa'aaogaina.

 

I le Paka Liona i Tafuna pe afai o le a manatu e faia ai se fa'atasiga a Aiga ae moea, po'o se Tolauapi a le Autalavou mo ni nai aso, ua fa'atulaga mai ai le totogi e ao ina fuafua toto'a i ai le fa'amoemoe.

 

I le o'o atu i ai mo se fiafia a aiga ma toe o ese ae le momoe ai, ua fa'atulaga le totogi e $100.

 

I le o'o atu i ai e tolauapi mo se vaitaimi, ua fa'ailoa mai e $200 i le po e tasi. Afai la e 3 aso o lea tolauapi, o le totogi e $600.

 

Ese mai lena, e i ai le $25.00 le totogi o le Vai e faaaoga mo ta'elega ma isi mea uma. O le Eletise e le totogia i le Matagaluega o Paka ma Malae Ta'alo, ae talosaga lava e outou se sapalai Eletise mo lou aiga po'o le Autalavou i le ASPA, ma totogi ai.

 

Ese mai lena, afai e fa'atutu ni faleie tetele mo le fa'amoemoe, e $25 i le faleie e tasi, ae a lua fo'i pe tolu ona totogia lava lea o lena totogi i lona fa'atelega.

 

Ua fa'ailoa mai fo'i, afai lava fo'i ua fai si taugata mo le autalavou po'o le pa'ia o aiga, e mafai lava ona fa'atalosaga se pa'u mai le aotelega i le susuga le Fa'atonu, ae le fai a'i, aua e na'o ia lea e mafai ai se mea fa'apena.

 

Ua matauina fo'i e le tatou nei nusipepa, e le'i faia se fa'asalalauga fa'alaua'itele, o le a si'itia totogi o lea tautua a le malo mo ona tagata lautele, ae o lenei lava vaitau, ua tele fo'i tautua a le Malo, ua oso mai lava i le totogi sa i ai e na'o le ta'i $5 oso i le $100.

 

TOAI TAUNU'U MAI AFIOGA AUMOEUALOGO TE'O

 

Ua to'ai taunu'u mai i fanua le faigamalaga a le afioga le Tamaalemalo Aumoeualogo Te'o J. Fuavai ma ua fa'ailoa mai fo'i e le fanau ma le pa'ia o aiga le polokalama fa'asolo ua fa'ataoto mo ona toe sauniga ma lagomau ai i lona maota i Nuuuli.

 

Na tu'ua le malo e lana afioga le Tamaalemalo ia Iuni 12, 2019 i Seattle, Washington i le atoaga o le 82 tausaga o lona soifua. E tusa ai o le fa'atulagaga a le pa'ia o fanau ma aiga, ua fa'ailoa mai ai le fa'asologa o ona toe sauniga e faia i le aso Sa nei, Iulai 14, ma le aso Gafua, Iulai 15.

 

O le afioga Aumoeualogo o se tasi ua iloga lana tautua ua mae'a fa'auia i le Malo o Amerika Samoa ma ona tagatanu'u, lona aiga pele, afio'aga, itumalo ma lana Ekalesia sa fa'auia ai ana taulaga i lona Atua.

 

O ia sa avea ma Senatoa i lona itumalo i le fono faitulafono, sa avea fo'i ma Fofoga Fetalai o le Maota o Sui a le atunu'u mo se vaitau o lona soifua tautua i lona itumalo a'o avea ma Faipule o lona itumalo, na avea fo'i ma Komesina o Leoleo ma sa iloga lana nofoaiga i le atoaga o le 100 tausaga o le Faigamalo Fa'ateritori o Amerika Samoa i le lalo o le puipuigamalu a le Iunaite Setete o Amerika i lona lea tofiga.

 

Na tautua fo'i o ia o le Fa'atonusili o le Matagaluega o Galuega Lautele a le Malo o Amerika Samoa, o le Peresetene fo'i o le Iuni Lakapi a Amerika Samoa, aua o lana lea fa'agatama sa tauva ai a'o talavou. Na avea ma ta'ita'ifono o le Pule'aga Samoa Pago Pago o le Ekalesia Katoliko Roma i Amerika Samoa nei, ina ua faliu o ia e tautua i lea Ekalesia ina ua mafuta ma le tina o le aiga, le faletua o Fatuiva Aumoeualogo Te'o Fuavai.

 

O ia o se tasi ua loa o avea pea ma Faipisinisi tumaoti ma le tina o le aiga Fatuiva Aumoeualogo Te'o Fuavai.