Ads by Google Ads by Google

Tala I Vaifanua


O le meaalofa na taua'aoina e le Bluesky i le aoga maualuga a Matata Eseese ua taliaina ma le fa'afetai e le ali'i faia'oga sa ia talosagaina e faaleleia atili ai Masini Komipiuta mo polokalama fa'apitoa e a'oa'o ai fanau a le SPEd i le latou laumua. E $3,000. lea meaalofa. [ata: Leua Aiono Frost]

O sui nei o le PTA mai Samoana sa la'ua o'o ane e talia ma le fa'afetai le meaalofa tupe ua taua'aoina e le Bluesky Amerika Samoa mo le latou poloketi. O ali'i pule o le Bluesky i Amerika Saoa Raj Deo ma le CEO Bluesky i Samoa Toleafoa Douglas Greevey ua latou fa'atasi mo lea fa'amoemoe. E tolu afe lea meaalofa. [ata: Leua Aiono Frost]

O le vasega o fanau a'oga ma le tama'ita'i na suia mai le Laumua e taliaina le meaalofa ua taua'aoina e le Bluesky Amerika Samoa mo le latou poloketi. O le latou meaalofa e $1,500. [ata: Leua Aiono Frost]

O le ali'i talavou, o se tama a'oga i Tafuna ua o'o ane e talia le meaalofa mai le Bluesky mo le poloketi e tapena ai mo se meapu'eata e mafai ona tapu'e ai ata ma iloa ai nisi e sofa'ia le falea'oga ma Ofisa o le Laumua i Tafuna High. [ata: Leua Aiono Frost]

7 AOGA MAUALULUGA MAUA TUPE TAUVAGA POLOKETI BLUESKY

 

Ona o le aso patino ananafi atoa i ai le 20 tausaga o le Bluesky Amerika Samoa, o lea sa fa'atulaga ai le latou tauvaga i aoga maualuluga i le teritori, e talosaga atu ai se vaega o le $20,000 ua tu'u ese e le Bluesky e tauva i ai mo ni fa'atupega o latou poloketi fa'atino.

 

E i ai aiaiga tamau o lea fa'atauvaga, ma e ao ina usita'ia ma e fuafua patino i ai ma le aotelega o se seleni e maua mo lau talosaga. Ua fa'ailoa i le aso ananafi, e to'a fitu a'oga maualuluga na mafai ona ofi atu latou talosaga e tusa o le taimi atofa mo talosaga fa'aulu. O i latou fo'i nei ua faia i ai le fa'amasinoga.

 

O le taeao ananafi sa tufatufaina ai fa’ailoga. Tulaga muamua o le Pacific Horizons mo le poloketi e fia fausia se latou ROBOT, o lona uiga ua vave ona matau e le a'oga lea se isi si'itaga o le latou taumafaiga i le isi tauvaga a le STEAM i le tausaga o lumana'i. O latou togi na ausia e 74 ma le fa’ailoga tupe e $4,000.

 

Tulaga lua South Pacific Academy mo le 3D Printer ma se Mea Pu'eata Digital mo Fanau A'oga i lea a'oga maualuga. O togi maua e 72 ma le faailoga tupe e $4,000.

 

Tulaga tolu Fa'asao Marist mo se vaega tupe fa'aauupegaina ai ma fa'ameaafale le Potu o Suesuega Fa'asaenitisi fou ua fausia nei i le a'oga.  O le afioga le Loia Sili Talauega Eliasaro Ale, o se tasi o lo'o lalamua i le galueaina o le falea'oga Saenitisi a lea a'oga, aua o ia o le Tama Tuai a le Malisi, sa taua'aoina i ai lenei siaki e $3,000.

 

Tulaga fa, A'oga Matata Eseese i Nuuuli, ona o le talosaga sa fa'aulu mai e le ali'i faia'oga i le SPEd i lea a'oga, e fia maua ni masini Komipiuta e mafai ona fa'atautaia ai polokalama e a'oa'o ai fanau a le SPEd. E $3,000 le tupe mai le Bluesky.

 

Tulaga lima Samoana High ma o le poloketi ua fa'aigoaina o le Poloketi Finafinau. Ua fa'atulaga ina ia fa'atautaia ai se polokama fa'ailo ma fa'alauiloa fa'ala'ua'itele, ae aoga ona fa'aaoga ai metotia fa'atekonolosi fa'aonaponei. O le fa'atupega na maua e $3,000.

 

Tulaga ono Tafuna High mo le poloketi o le Masini Lolomi [Printer] mo fanau a'oga ma se Mea Pu'eata mo le A'oga, e mafai ai ona iloa patino i latou e sofa'ia le a'oga ma fa'aleaga le tele o mea i totonu o le Ofisa ma Potu A'oga. Ua taua'aoina le $1,500 mo lea poloketi.

 

Tulaga lona fitu Fagaitua High ma sa latou talosagaina ai se latou Zone Camera e mafai ona pu'ea ai ata o latou ta'aloga ina ia mafai ona fa'atulaga uma taumafaiga a le fanau ta'a'alo Football, e auina atu i fafo e mafai ai ona maua ni a'oga e fa'aauau i ai latou a'oga ma agava'a e tauva ai i le Football. O le susuga le Faiaoga & Fa'atonu o Ta'aloga, o le Pule A'oga fo'i, Pooch Suaese Ta'ase sa talosagaina lea poloketi. Peita'i e to'atolu sui o le au Football a le Vikings ma se tasi o tina na malaga mai e talia le tinoitupe e $1,500 ua fa'amatu'u atu e le Bluesky.

 

Fa'ailoa e le CEO o le Bluesky, Toeafoa Douglas Greevey, "Ua matua fa'afiafiaina i matou, ona o le fa'amanatuga o le matou 20 tausaga ua matou faia ai se galuega lelei mo le lumana'i o Amerika Samoa, aua o le faia o foa'i nei mo poloketi a a'oga, o le va'ai toto'a fo'i lea o i tatou i le soifua laulelei o le atunu'u, ae maise i tulaga tau tomai i tekonolosi o le talutalu fou lea e vave lava ona fesuia'i ma si'itia i luga i taimi uma ala e fa'aleleia atili ai.”

 

"E ese mai lenei taumafaiga mo tatou tupulaga talavou ia fa'aleleia atamai patino i tekonolosi fou, ua i ai fo'i ma isi mea uma ua tapena e le Bluesky mo ana tagata faigaluega ua loa le tautua, mai lava le amataga se'ia o'o i lenei tausaga, ae maise fo'i o le taumafaiga o lo'o lomaloma mai e mafai ona fa'afiafia fa'atasi uma ai tagata faigaluega o le Bluesky, o ana kamupani fa'apa'aga, le malo o Amerika Samoa ma ona matagaluega uma, ae maise le mamalu lautele o tagata o le atunu'u, ua fiafia lava i latou ua fa'aaogaina a matou tautua. Ia te outou uma na, fa'afetai, aua ana le outou mana'omia la matou tautua, e le mafai fo'i ona matou tutumau i Amerika Samoa nei."

 

Saunoa le pule o le Bluesky American Samoa, Raj Deo, "O le aso e tatou te fa'amanatu ai ma le fiafia tele le tautua a le Bluesky Amerika Samoa ua atoa le 20 tausaga o fa'aauau pea mo tagata uma i le tatou nei malo, ma fa'asolo atu ai i si malo o le Pasefika. Ua ala ona mafai ona faia lea tautua, aua ua lagolagosua i ai le to'atele o tagatanu'u ma pisinisi, ae maise le Malo o Amerika Samoa ma ona matagaluega eseese, fa'afetai mo lo outou talia o a matou tautua e avea ma ala o a outou feso'ota'iga tau telefoni ma initeneti.”

 

SOLOA'I ATU TATOU 'AU BEACH VOLLEYBALL TA'ALOGA PINE AURO

 

O tatou a'u Beach Volleyball a tama'ita'i ua manino lava le soloa'i atu taumafaiga i le Pine Auro ina ua latou fa'ato'ilaloa le 'au malosi a Ausetalia i le 2 seti i le tasi a Ausetalia i le aso Lua i Samoa.

 

O i la'ua o lo'o tauva mo Amerika Samoa o Litara Keil ma Deveney Pula na matua iloga lava ona mata'ina le la'ua sofa'ia o le 'au mai Ausetalia i le taimi na fetaui ai nei 'au malolosi e lua. Na soso'o mai ma le ta'aloga faitaulia fo'i a Amerika Samoa ma le 'au mai Solomona lea sa matua latou fasia fa'aleleia lava i seti e lua i le leai.

 

E ese mai lena, na fetaui fo'i le Au Beach Volleyball a Tama Amerika Samoa ma le 'au a Solomona ma ua tigaina fo'i nai uso na i le tatou 'au lea ua manumalo.

 

Peita'i, o le tatou 'au a tama lava lea e ta'a'alo ai Sigalu Aitui ma Tauvela Fagaima na faia'ina muamua ia Tonga.

 

I le soka, ua fa'ailoa mai e leai se 'ai o le tatou au soka a tama i le 9 a Fiti i le ulua'i ta'aloga o le Pasefic Games. Peita'i i le tatou 'au a Teine i le Soka lava lea, na tutusa ma Samoa e tau fai leai ni sikoa ae ua uma le taimi o le la'ua ta'aloga faitaulia.

 

I le tu'uga a'au lea e tauva ai Tilali Scanlan e fa'alua ona a'au o ia i tu'uga e fili fa'apitoa ai nisi e ofi atu i le tauvaga mulimuli e agava'a ai mo pine i lenei tausaga. Na tulaga fa o ia i le tu'uga a'au breast stroke 200 mita le mamao ae tulaga 7 i le tu'uga butterfly 50 mita le mamao.

 

O le aso ananafi i Samoa lea ua toe fa'avasega ai isi ana tu'uga a'au e auai ai, ma maua ai se tala pe ofi atu o ia i toe tu'uga mo pine i lana fo'i fa'agatama. O le fa'atolu ai lea ona auai Scanlan i ta'aloga a le pasefika.

 

O le aso ananafi fo'i ua lua i ai aso o lo'o tauva ai le tatou au ta'a'alo Tapolo. E lua aso e tatau ona tauva ai i latou fa'ato'a maua se tala mai pe a mai a latou taumafaiga mo ni pine e agava'a ai. Fa'apena fo'i ona talosia le malosi ma le tomai i lea fo'i fa'agatama o le fanau tauva ia fa'aauau atu i lea fa'amoemoe maualuga.