Ads by Google Ads by Google

Tala I Vaifanua

39 ALI'I & TAMAITAI A'OTAU E AVEA MA "MALU O LE MALO" - POLICE ACADEMY

 

O le taeao ananafi na amtalia ai a'oa'oga ma koleniga fa'apitoa mo le Academy a le Matagaluega o le Puipuiga o le Saogalemu Lautele, lea ua agava'a ai le to'a 39 o ali’i ma tamaita’i. Na fa'atautaia se sauniga pu'upu'u i le Potufono o le OMV i Tafuna mo le academy fou.

 

Mai le to'a 140 o i latou na fa'atalatalanoa, su'ea le su'ega fa'apitoa atoa ai ma le fa'atautaia o latou suesuega tau fuala'au fa'asaina ma vaila'au o'ona, ua na'o le pau lea o i latou ua agava'a  i le academy.

 

O le Komesina o Leoleo, Le'i Sonny Thompson, sa mua'i fa'afetaia le fa'amalosi a le Fa'afeagaiga, i upu na ia saunoa i ai, e tima'i ai le vasega. O le isi vaega o le fa'afetai, mo matua ma aiga sa auai o fanau ua fili fa'apitoa.

 

"E matua mana'omia la outou fesoasoani, aua e le o taitai ona lava le galuega a le Malo e taui a'i le tautua lea e mana'omia ona fa'atino mo le Malo atoa, o ona tagata ma ana meatotino. E avatu ai fa'atalosaga, ina ia alofagia e aiga, ua tu'u atu o outou tau'au e fesoasoani ai e fa'amalosi i agaga ma lagona o le fanau lenei ua filifilia mo lenei Vasega. E mautinoa e le o lo'o maulalo o latou totogi, e tele fo'i o latou taimi e ao ina galulue ai, ae ia alofa ma sapaia lo latou mana'omia, ona o lo matou fa'amoemoe maualuga, ia avea i latou ma Malu o le Malo!"

 

Sa ia saunoa fo'i e tusa o le avea atoatoa ma Leoleo o le Malo. "E le o mautinoa o i latou nei e to'a 39 ua filifilia nei e amatalia ona a'otau, o le a avea ma Leoleo e tautua le malo i le mae'a ai o lenei vasega. E mautinoa e i ai nisi o le a le a'e manumalo, aua e le o fa'afaigofieina le sailiga lenei. Peita'i, ia mausali le fa'amoemoe, ia suesue ma tausaili ma le filiga, ma ia mau fusi o le fa'amaoni, ona fa'ato'a mafai lea ona a'e manumalo le tausinioga lenei."

 

Mai le vasega atoa, o le a mafai ona fa'aopoopo ai se isi faitauga i le na'o le 98 o Leoleo i le matagaluega. Fa’ailoa e Le’i, "E le o taitai ona lava lea faitauga, e fa'aatoatoa ai le galuega Puipui ma Tautua le Malo ma ona tagata fa'apea meatotino uma ua aotelega i le atunu'u."

 

FA'AMALOSIA AOAOGA AOTAU AI E MUAMUA NOFOAGA O TAFANA AI NISI

 

Ua i ai nei le vasega o faia'oga fa'apitoa mai le Malo Tele ina ia latou a'otauina le vasega o i latou e Ta'imua i Galuega Lavea'i pe a o'o ina lutia le atunu'u i ni faiga tau fa'amata'u o se tasi e tafanaina nisi i totonu o so'o se nofoaga i le atunu'u.

 

O i latou nei ua fa'atulaga e fa'atautaia le a'oa'oga faapitoa lenei mo sui ua fili fa'apitoa mai le Matagaluega o le Puipuiga o le Saogalemu Lautele, Le Matagaluega o le Puipuiga o le Saogalemu Fa'alotoifale (ASDHS), Vaega Tinei Afi ma le EMS.

 

E ui ina o lenei ituaiga o fa'aletonu e le'i a'afia ai le atunu'u, peita'i ua iloga i isi atunu’u o le lalolagi, e pei o Amerika.

 

"Ao le'i tutupu mea fa'apenei i le atunu'u, e mua'i fai le faiva o le Matagaluega o le Puipuiga o le Saogalemu Fa'alotoifale, ia a'oa'oina lelei i latou e "Ta'imua Atu e soloia le fa'afitauli!" ma avatu se fesoasoani ina ia taofia fa'afitauli ma ia taofia fo'i le aotelega o i latou e ono maumau ai le soifua, a'o nisi fo'i o le a fa'amanu'alia i se fa'alavelave fa'apea e ono alia'i mai i le atunu'u,” o se tala lea a le fa’atonu sili a le ASDHS, Samana Semo Ve’ave’a. "O le aoga lea o lenei ituaiga o a'oa'oga fa'apitoa.”

 

“O le isi itu, ia nofo sauni so'o se matagaluega a le Malo, ae maise ai o le Matagaluega o A'oga, lea e tumu i le fanauiti latou te mana'omia tele le saogalemu a'ia'i, a'o fa'atautaia a latou a'oa'oga, aua ua tupu i fafo, e leai se pa pupuni e le tupu ai i le tatou atunu'u."

 

Ina ua fesiligia pe sa ia fa'ailoa lea tulaga i le Matagaluega o A'oga, ae fa'ailoa e ia, "E lua lava Matagaluega na ave i ai le fa'amuamua, o le Matagaluega o le Puipuiga o le Saogalemu Lautele, i le afioga le Komesina o Leoleo, fa'apea ma le Matagaluega o A'oga, aua e tatau ona mua'i iloa e i la'ua nei le taua o le soifua o e o tautua e fa'auia le saogalemu i le to'atele, ae maise le Matagaluega o A'oga i le taumafaiga e i ai se polokalama faapitoa e usita'ia e i latou pe a o'o ina tupu fa'afuase'ia se fa'aletonu fa'apea i totonu o se a'oga."

 

Ae peitai e le’i tali mai le Matagaluega o Aoga i le valaaulia mo lea aoaoga, o lo'o fa'atautaia mo le tolu aso o lenei vaiaso, ananafi se'ia o'o i le aso Lulu.

 

I le a'oa'oga faapitoa sa matua iloga ona fa'ailoa mai e ali'i mai fafo, le ala e silafia lelei ai e i latou o ta'imua mai ai se fesoasoani o le saogalemu i fa'aletonu fa'apenei, mea e ao ina faia. O le nofomau o se fuafuaga fa'ataoto i le mafaufau o i latou, e mafai ai ona sofa'i atu ma le mautinoa e fa'asaogalemu nisi o lo ua lamatia le soifua.

 

Ua fa'ailoa mai, "Afai e te fa'alogoina le papa o le fana, ia sofa'i ma le mautinoa, ulufale i le nofoaga ma le matau lelei, mata'alia ma ia va'ai solo ia mautinoa e le o misia ia te oe le nofoaga tonu o lo'o fa'apogaia ai le fa'aletonu. Ia fa'amaumau ma fa'aauau ona fa'ailoa e ala i auupega o feso'ota'iga o ia te oe, le mea ua e faia, ma le mamao i totonu o le nofoaga o tupu ai le faalavelave ua e o'o i ai. Ia avea pe ma mata o i latou o lo'o mulimuli atu ia te oe, ma ia e fa'ailoa atu fo'i mea o e va'aia."

 

O le afiafi o le ulua'i aso, na fa'atino ai se fa'ata'ita'iga i ni ituaiga faiga ua matauina, ua fa'aaogaina e i latou o tau fa'amata'u i le soifua o le to'atele, ma ala e mafai ai ona e fanaina ia le toe i ai se isi e na te fasiotia pe fa'amanu'aliaina.

 

O le vaiaso a sau e fa'aauau ai le a'oa'oga fa'apitoa tau le ATIRC po'o le kosi e fa'amasani ai i latou e "Ta'imua i fa'alavelave ua Tutupu", o se fa'atulagaga e ao ina usita'ia e i latou, ina ia fa'asaoina lo latou ola, fa'atasi ai ma le fa'asaoina o le to'atele mai le fa'alavelave ua sofa'i mai. E lua fo'i aso o lea a'oa'oga faapitoa mo i latou uma mai matagaluega e ao ina galulue fa'atasi pe a o'o mai nei ituaiga o fa'aletonu i le atunu'u.

 

Ua fa'ailoa e ali'i faia'oga mai fafo, "O le mea e ao ina usita'ia e so'o se Kamupani Tumaoti, Matagaluega o le Malo, ae maise i le Matagaluega o A'oga, ona o le lumana'i o le malo ma le atunu'u atoa o lo'o latou fa'afailele i aso ta'itasi, Matagaluega o le Soifua Maloloina, "Ia i ai lava se latou Fuafuaga ua mae'a tamau mo le Lokaina atoa o le latou A'oga atoa po'o le Matagaluega atoa pe afai ua lagona se fa'ailo fa'afuase'i. O lea e faailoa e ao ina mautinoa ma faitauina tonu e faia'oga po'o le pulega, ina ia le sasi lava ona loka atoa le falea'oga ma le matagaluega i le taimi e lagona ai le taina o se logo po'o se sailini i le latou lotoa."

 

E mautinoa ua i ai le fa'ailo mo le Tsunami, ae tatau fo'i ona i ai le fa'ailo, O le Loka Mau atoa o falea'oga ma Ofisa po'o Matagaluega! Ina ia fa'asaoina lava le ola e le toe sao mai i ai se tasi o lo'o ia fia fa'aumatia le soifua o nisi.