Ads by Google Ads by Google

Tala I Vaifanua

FAIA TALAVAI MAMALU LAUTELE HOPE MINISTRIES E LE TOTOGIA

 

O lenei tausaga ua toe fa'aauau mai fo'i le aumalaga a foma'i ma tama'ita'i tausima'i fa'atasi ai ma i latou e mafai ona siakia gasegase e fa'aaogaina ai latou masini fa'apitoa e pei lava ona faia pea e le "Mission of Hope" e ala mai le latou galulue feso'ota'i ai ma le "Sosaiete a Tama mo le Folafolaga i Amerika Samoa."

 

O i latou nei ua matele ina fiafia i ai le vasega o tagata matutua o le atunu'u, ma o se mea lelei fo'i le failaina o latou gasegase ma togafitiga ua fa'atautaia e i latou i o latou faila i lenei fo'i tausaga.

 

Ona o tulaga fa'aletonu i le feavea'iga o latou mea faigaluega ma vaila'au ma fuala'au mo togafitiga, o lea o le a faia ai na'o le tasi lava le talavai i Amerika Samoa.

 

O lea fa'ato'a mae'a talavai i Samoa. e to'a 4 fomai fa'apitoa mai fafo, ae to'alua foma'i mai le tatou nei malo ae ese ai le vasega o isi e lagolagosua i le fa'atinoga o galuega ma togafitiga o le a latou faia i lenei talavai.

 

O le "Mission of Hope" o lo'o feagai pea ma le taumafaiga ina ia fa'atula'ia se falema'i e fa'atagata faigaluegaina mai e i latou e ala i foma'i ma tausima'i pasi ua a'oa'oina lelei i gasegase ua mataituina nei i talavai faifai pea nei e asiasi mai ai i latou ma va'aia i tausaga ta'itasi.

 

O le susuga Rev. Afalupetoa Uta'i o le “Men of Promise" a Amerika Samoa, o ia lea ua avea ma fofoga fo'i o lea fa'amoemoe ina ia fa'alauiloa fo'i le aso patino mo lea talavai masani i le atunu'u. Ua fa'atulaga nei le talavai lea e faia i le Aso Lulu i le TAOA i Pago Pago.

 

FAAALIA LO TATOU SAO FA'AALIGA TA'AVALE SOLAR: 2019 NATIONAL TSA

 

I le tauvaga a le 2019 National TSA Association Conference lea ua auai atu i ai i latou na togisilia i le tauvaga e fausia ma fa'agaoioi se ta'avale e fa'aaogaina ai le malosi'aga o le la e miti'ia e le panele, ma ua fa'aigoaina lea tauvaga o le STEAM [Science, Technology, Engineering, Arts Mathematics.]

 

Sui o Amerika Samoa i lenei tauvaga - Edrik Scanlan Gaisoa, Daniel Hyuk Wang, Bianca Alenna Serrano and Petania Fou Sagaga. O le tauvaga lenei na amata ia Iuni 28 e o’o ia Iulai 2, 2019 i National Harbor, MD.

 

I le latou tapenaga mo lenei fa'amoemoe talu mai ona mae'a le tauvaga ma ua manumalo ai i latou e fai ma sui o le autalavou uma i Amerika Samoa, sa matua galulue fa'atasi ai i latou ma le latou faia'oga Kendra Pinsker ma le lagolagosua fo'i a le tama'ita'i na fa'atautaia lea tauvaga Edna Noga mai le ASPA.

 

I le tala mai le nofoaga o lo'o faia ai lenei tauvaga, e to'a 500 sui ua mae'a i ai i le tauvaga ae siia ma le 100 poloketi nei e fa'atauva i lea vaega o le tauvaga. O le auau o le tauvaga i lenei tausaga ua fa'ailoa mai, "Taitaitama po'o le Model the Way!!"

 

O le vaega la o le tauvaga lea e fa'aaogaina ai le malosi'aga o 'ave o le la ua miti'ia mai e le panele, lea ua avea ma fa'aautu o le galuega fa'atino a le tatou au tauva ua fai ma tatou sui i lenei tausaga.

 

Fa’ailoa e Noga, "Ua tele se mea ua maua mai e lenei vasega o le fanau o tauva nei. Ua si'itia fo'i lo latou iloa aua ua fetufa'i ma isi o fanau o lo'o latou tauva fa'atasi, pe fefa'asoa'i fo'i o latou iloa a'o taumafai e fa'atula'ia latou galuega fa'atino. O le isi itu, e tu'ufesili i latou ma maua ai tali o latou agaga fia iloa ma tausaili, o le ala lea o le atamai."

 

"Ua tele lava se fa'amalosi'au ma fesoasoani fo'i tau le malamalama fetufa'i mai a le asosi lea e ona lenei tauvaga, ua faapena foi ona fa'asoa ane nisi o le vasega o faipisinisi o le tatou Malo, ina ia agava'a ma si'itia le malamalama lelei o le fanau i le latou poloketi o lo'o fa'atautaia.”

 

Ua fa'afetaia tele fo'i le vasega lagolagosua a aiga o lo ua i ai nei i DC, lea e aofia ai Jewel Gaisoa, Geraldine Serrano, Judy Wang, Margaret Sagaga-Metai, Lilieni Sagaga ma Sopoaga Sagaga, ae maise o le mataalia fo'i o le ali'i faia'oga i le fanau Miss Kendra ma le tapua'iga mau a Amerika Samoa.

 

FA'AALIA ATA TUSIA MANUMALO: KATIE GODINET - LAUMUA UOSIGITONE DC

 

Ua tula'i le tama'ita'i Faipule o Amerika Samoa i le Konekeresi, Aumua Amata, i talaane o le ata ua fa'atautau nei i le Ofisa o le Konekeresi i le Laumua o Uosigitone DC.

 

O lea ata na manumalo i le tauvaga tusiga ata a le fanau a'oga maualuluga sa fa'atautaia e Aumua.

 

O le tama'ita'i o Katie Godinet, o le fa'alua ai lenei ona ia mauaina lea fa'ailoga o le fa'atautauina sana ata i le puipui o le Maota o le Konekeresi a le malo tele.

 

E tasi le tausaga o le a fa'apipiia ai lea ata i le Laumua, ona fa'ato'a toe aumaia lea e faatautaui i le ofisa o Amata.  O le ata na manumalo i lenei tausaga ua fa'aalia nei, o le Paluga o le Ava Samoa.

 

Fa'aalia e Amata, "E fa'apitoa le fa'afetai i le sogasoga o le tama'ita'i o Katie Godinet i lana taleni, aua ua le tasi ae ua fa'alua ona ia maua lenei fa'alauiloaga tele o ana taleni i le Laumua o le Iunaite Setete, ae o sona sao aoga tele fo'i i lona atunu'u e tusa o auau o ana ata o lo'o tusia, a'o se fa'aea i ma lona malo, tainane nai ona matua ma aiga."

 

"I so'o se taimi ou te savalia ai lea ala savali e aga'i atu i le potu fono tele a le Konekeresi, e toe fa'amanatu mai ia te a'u lo'u atunu'u ma o'u tagatanu'u uma, a'o le'i o'o ina fai faiva fa'aupufai o malo, ona o le toe fafagu ma le fa'atepa a nei ata matagofie ua saunia e fanau i tausaga ta'itasi. Fa'afetai Katie ma outou uma sa autova'a mai a outou galuega e fa'alauiloa le matagofie ma le tumati'e o la tatou fo'i fa'amanatu e ala i galuega alofilima taua fa'apenei."