Ua mae'a uma Koneseti na fa'atulaga a le Katina Brothers mo autalavou a Amerika Samoa, sa latou faia lava e leai ma se totogi, ma o se fa'afetai lea ua fa'alogoina i le to'atele o le autalavou sa auai.

Ua latou fa'ailoa mai, "O uso moni lava e fa'afiafia e le tau fa'atali i se taui. E fa'afetai aua e le gata i vi'iga sa latou peseina, ae o le sao fo'i o le ali'i fa'afiafia faimea malie o Tofiga Fepulea'i, ae maise o le au siva a ta'ito'alua ma fanau a le au uso Katina Brothers."

Fa'afiafiaga muamua sa faia i le DYWA, soso’o ai ma fa’afiafiaga i le Kanana Fou Gym.

Ua iloga le sao o lenei fanau i le atunu'u e ala i a latou pesega o vi'iga o le Atua i fatuga fa'aonapo nei, ma ua ta'uta'ua ai fo'i le tatou igoa pese Amerika Samoa i o latou sao o lo'o faia i fafo, e ala lava i pesega nei.

Na mua'i talaina pupule e le tama'ita'i o Ipu Pouesi, ma faia fo'i le sao o Tofiga Fepuleai e fa'afiafia ai le to'atele ma fa'alauiloa mai ai le fa'afiafiaga ua tapena i ai le Katina Brothers i lea ulua'i afiafi. E i ai a latou pese sa usuina o fatuga fa'aperetania ae o isi o pese ua usuina fa'asamoa, ma o pese na sa matua fa'afiafiaina le au talavou sa maimoa e pepese fa'atasi ai.

O nisi o ta'utinoga sa fa'ailoa mai ai e le auuso, "E le mafai ona galo ia i matou le ola a'e i Amerika Samoa nei, le olaga fa'aaloalo, le olaga e tatau lava ona auai i mea uma e faia a le Ekalesia i le taimi ua atofa, o le usita'i ma le olaga fa'aaloalo i tagata matutua, e le tu'ua lava aua o le a'oa'iga lea sa fa'atino mai e matua i fanau. E moni ai lava Tusi, "Aoa'i le fanau a'o itiiti aua e le toe te'a ese ai."

O le latou fautuaga, "Aua ne'i te'a le a'oa'i a ou matua mai ia te outou, po'o le a le mamao, po'o le a fo'i le umi, o upu lava na e tumau ma e le galo e sapaia lou fa'amoemoe na e tu'ua ai le tatou atunu'u pele, ae folau e sailia manuia. O le fa'afetai sili, o le mafai ona toe fo'i mai, fa'asoa mai, ina ia aoga mo nisi o tatou uso talavou i le taimi nei, ua sauni folau."

ASEPA - FUAFUA TULAFONO FA'ASA AI OLOA “STYROFOAM”

Ua mae'a le fonotaga a le Sosaiete a le Au Faipisinisi i Amerika Samoa, lea sa latou vala'aulia fa'apitoa ai vaega a le ASEPA ina ia latou fa'amalamalama atili aiaiga o se tulafono fuafuaina e tuuina atu i le Fono Faitulafono e fa'aopoopo ai Ipu Una, Sipuni ma Tu ae maise o Ipu Inu Vaiinu ma isi uma oloa o lo'o gaosia i le “styrofoam” ona aumaia pe faaaogaina foi i le teritori.

“Ua taumafai atili pea lenei pitola'au au, ua iloga, ua amatalia ma ua va'aia le fa'amalosiga fo'i o lea tulafono i nisi o teritori ma setete i Amerika, ae maise o nisi o malo fa'a-atumotu o le atu Pasefika o lo'o tatou aofia fa'atasi i le tatou sone i saute o le lalolagi.”

O le tama'ita'i Tumau Lokeni ma Peteru Mata'utia sa avea ma sui o le ASEPA e fa'atautaia le latou folasaga i le afiafi o le aso Tofi o le vaiaso ua te'a.

Peita'i ina ua fesiligia, sa i ai se taimi o le tama'ita'i loia fa'apitoa a le ASEPA, Mrs McGuire-Ale, e saunoa ai i le fa'amalosiga ua fuafua e fa'atautaia, sala fo'i o le a fa'asalaina ai faipisinisi e uma le taimi atoa o lo'o ua tuuina mai e fa'auma ese atu ai oloa ua mae'a oka mai i le taimi nei ona fa'aaoga, ae toe maua o faaaogaina pea nei oloa i a latou tautua mo le mamalu lautele o le atunu'u.

E ese mai le ituaiga o fa'asalaga, ua fa'ailoa mai fo'i le aoga ona fa'aaogaina o oloa ua mae'a saunia e suia ai nei ituaiga o oloa e tautuaina ai le atunu'u. "E fai si taugata, ae le tele se eseesega, peita'i e tele le eseesega pe afai o le a fa'aauau pea lava ona tatou fa'aaogaina oloa nei e a'afia ai le tatou siomaga."

Ua tu'uina mai le tasi le tausaga, pe afai e mae'a pasia lenei tulafono e le fono faitulafono ma sainia e le Kovana ina ia fa'amalosia, ina ia fa'aaogaina ai uma ai oloa una ua mae'a i ai i le atunu'u ma lau fa'aputugaoloa, ona amata loa lea ona fa'atau mai oloa e talafeagai ma le siosiomaga mama.

FA'AMAU FA'AILOGA FESOASOANI A LE PULE McCONNELL DOWELL

O le ali'i pule sili o le McConnell Dowell o Stuart Pilat na mafai ona taua'aoina aloa'ia i ai le fa'ailoga fa'apitoa a le Hope House i le Fatuoaiga e lana afioga Epikopo Peter Brown, e fa'amau ai lana tautua alofa e faia so'o mo lea Nofoaga o Fa'amoemoega lea e tausia fa'apitoa ai tagata matutua ma e ua gasegase tumau e tausia fa'apitoa ai.

"O le tautua a lenei ali'i e masani ai ona latou fa'aleleia le auala e aga'i atu i le Fatuoaiga ma e faia lava o lona agalelei i le to'atele o tagata matutua o tausia ai, fa'apea fo'i ma i latou o lo'o ua fa'agasegasea tumau i le tino ma le mafaufau, ma e ao fo'i ona tausia fa'apitoa lava i latou. Fa'afetai Pilat i lau foa'i e ala i nei tautua e masani ona e fa'atonuina e faia,” o se tala lea a le Taitai o le Pule'aga Samoa Pago Pago.

Na taua'aoina aloaia lea fa'ailoga e le susuga le Taitaifono o le Hope House, Faipule Larry Sanitoa ma faia fo'i se latou aiga fiafia e fa'amavae aloaia ai ma le susuga Stuart Pilat ma le faletua o Helen, i le aso Lulu o le vaiaso ua te'a. O le umi o le la'ua tautua iinei e 6 tausaga.

E tusa ai ma se tali fiafia mai fo'i a le susuga Pilat sa ia fa'ailoa mai ai, "Ua ou fa'afetaia lenei fa'amau fa'ailoga o se mea na fai ua aoga mo nisi. E iloga lava e le tau faia se fa'amau fa'ailoga i se galuega lelei, aua o mea e fai ma le loto lelei, e i'u lelei ma aoga lelei mo tagata e to'atele. Peita'i, i le ono tausaga ua mae'a nei, sa ou fiafia e faia galuega na fa'atulaga mo le McConnell Dowell i se lelei a'ia'i, ia umi fo'i o aoga ma fa'aaoga e tatata o lea atunu'u lalelei o Amerika Samoa. Peita'i, o le a ou toe taliu nei i NZ ma ua i ai le fa'amoemoe e fa'atuina sina pisinisi la'ititi e tausia ai le aiga. E le o mamao lava a'u ma Samoa, ou te iloa toetoe lava a tofu aiga Samoa ma latou pelega i Niu SIla, ia fai fo'i ae asiasi atu, a leai ou te toe asiasi mai fo'i ma le tina o le aiga."

O lo’o iloga le tautua a le McConnell Dowell i le teritori i le tele o tausaga.