O lenei vaiaso ua patino lea mo polokalama fa'asolo a le TAOA e fa'afiafiaina atili ai tatou Matua Matutua uma i le teritori. O le amataga lava o le taeao po - Aso Gafua na te'a nei - sa usupo ai i le latou talotaloga fiafia i le mamalu lautele fegasoloa'i ma sa latou fa'ataunu'uina lea vaega o le latou polokalama amata i lumafale lava o le Malae Ta'alo i Pago Pago ma fa'asolo mai i lumafale o le latou Lotoa ma le Faletupe o Atina'e. Na amatalia lea fa'amoemoe i le itula e 7:00 se'ia pa'ia le itula e 8:00 i le taeao lava.

O le taeao o le aso Lua, o ananafi lea Me 22, na amata ai loa Ta'aloga Fa'asamoa sa masani ai matua nei ua matutua ona fa'atautaia i o latou vaitau. Ona ua le toe mafaia tele ona fa'ate'a Kirikiti ma tamomoe e tuli 'ai, o lea ua le faia ai lena ta'aloga, ae ua faia Lalaga Mailo na amata ai le taeao. Soso'o loa lea ma le tauvaga O'a Popo ma toe Valu le Penu o popo nei na o'a.

“Ua va'aia o lo'o i ai pea lava le taleni i matua, matua agava'a lava i latou i nei mea uma sa tauva amata ai i le taeao,” o se tala ata lea a le tofa Kurene Paopao.

Ina ua mae'a toe oso le lalaga ato, fu'e umu Samoa se'i toe fa'atepa i ai po'o agava'a lava tamatama'i lima o i latou nei i lea faiva.

"E le'i taitai lava fo'i mou lea tulaga, o lo'o matua sipoki lava tamaiti i le lalaga o ato fu'e umu. Masalo e manumalo a'ia'i i latou nei pe a tauva ma tamaiti talavou o le atunu'u i lea faiva,” o se tala lea a le tama'ita'i o Lorelei Haleck Siua, mai le ofisa o Tagata Matutua, TAOA.

O le tosoga maea na fa'ai'u i ai a'o le'i faia le tausamiga o le aoauli. Na muamua lava fetaui Sisifo ma Sasa'e manumalo Sasa'e. Uma lea fetaui Sasa'e ma Ogatotonu malo ai le Central, Oso mai lua ma le SCEP, le polokalama mo matua e le'i matutua tele o i ai agava'a fa'apitoa e faigaluega ai, fa'atoilalo loa ma Central. O lona uiga ua tofu lava i latou uma ma le manumalo.

Malo le faiva o le faiva, ma ua tapenapena fo'i mo le tou aso tele i le aso Faraile a sau nei, lea ua fetaui uma ai fola i le Malae o Suigaula a le Atuvasa i Utulei.