Ads by Google Ads by Google

Au Uso Tamaitai - Taina La'ua Malofie & Sama Lelei


O le ali'i foma'i Manu Dr. Bret Grover ua mae'a le vaiaso atoa talu ona ia faia taotoga o meaola fa'afagafao a le tatou atunu'u, ma ua fa'afetaia tele lona sao i lenei vaitau. O le afioga le Faipule i le Konekeresi Aumua Amata ua o'o atu ma lana fagafao o Smiley mo lana siakiga. [ata: Leua Aiono Frost]

O le susuga le Matuaofaiva Li'aifaiva Lavea Levi ma le auuso na matua malaga fa'apitoa mai i Samoa ina ia la'ua la'eia le malofie a tama'ita'i Samoa, ma ua matagofie fo'i ona faiva. Na sama ai lava i la'ua i lea lava aso, Aso Gafua na te'a nei, ma ua fa'afiafiaina ai matua ma aiga. [ata: foa'i]
Tala I Vaifanua

O alo tama'ita'i mai le afio'aga o Pago Pago ma Fagatogo ua mae'a nei ona taina la'ua malofie a tama'ita'i Samoa ma ua avea fo'i o se mitamitaga i nai o la'ua matua Valerie ma Dean Adams fa'apea le aiga.

 

O le aso Gafua na te'a nei na alofaiva ai le susuga le Matuaofaiva Li'aifaiva Lavea Levu mo la'ua la'ei Samoa moni ma e ta'i fa itula na ta ai i la'ua ae mae'a lelei ma sama ai loa lava i lona maota i Samoa lea.

 

O Ala Danita Adam ma Davina Adam o se 'auuso na a'o'oga ma fa'au'u mai a'oga maualuluga i le tatou nei malo.

 

O Danita ua 23 tausaga o le soifua ma sa amata mai a'oa'oga i le aoga tulaga muamua i Pago Pago, ma fa’au’u mai i Samoana High. O le taimi nei, o lo’o aoga i le Iunivesite o le Pasefika i Saute ma faigaluega i le Televise 1 i Samoa.

 

O Davina e atoa lona 21 tausaga i le aso Faraile nei, ae sa amata mai fo'i ana a'oga i Pago Pago Elementary ma sa fa’au’u mai Fa'asao Marist High. O lo’o a'oga nei o ia i le Auckland University i New Zealand ma ua faigaluega o ia i ona taimi avanoa i le Mall i Manukau, Aukilani.

 

O Valerie ma Dean Adam o lo'o nonofo pea ma faigaluega i la'ua i Amerika Samoa.

 

O le o'o mai o lea auuso, aua ua i ai o la'ua fa'anaunauga e la'eia e i la'ua Laei Samoa Moni, aua ua la'ua iloa lelei ona tau'ave o le mamalu ma le tofi ua fa'ae'e ia i la'ua, le malofie a tama'ita'i.

 

"Ua o'o fo'i i vaitau e faia ai malologa a le fanau, ma ua la'ua fa'ailoa mai, ua manatu i la'ua ua agava'a ia i la'ua ona la'ei le malofie a tama'ita'i, ina ia iloa fo'i tu ma aga fa'atama'ita'i Samoa moni. O se fiafiaga aua o ai ea na ilu pe talu o le a manatu le fanau i se mea fa'apenei, ae pau fo'i le faiva o lenei tina, o le sapaia o so la'ua mana'o,” o se tala lea a le tina o Valerie Adam.

 

TO'ATELE AUINA FAGAFAO MO TAOTOGA - VET DR. BRET GROVER:

 

O le vaiaso na te'a nei na amatalia ai ona faia taotoga ma siakiga o Fagafao e le susuga le Foma'i Manu ua i ai nei i le teritori. E le o se tasi ua fa'akonekarate e faia siakiga ma tui e agava'a ai mo le puipuiga o le soifua laulelei o meaola, ae peita'i, o ia ua ofoina mai lana tautua mo lenei vaitau e na'o le lua vaiaso, olo'o malolo mai ai i lana galuega i Amerika.

 

O Dr. Bret Grover, ua ia faia uma nei ta'otoga o meaola ina ia le toe fanafanau, pusi, maile ma pua'a. O nisi fo'i o mea o lo'o ia fa'atautaia o le suesuega lelei lea o le tausiga o meaola fa'afagafao po'o maloloina i latou i le taimi nei.

 

Ua fa'avasega e ia togafitiga e ao ina tu'uina atu i meaola ua matauina ua i ai ni ma'i o meaola fagafao ua maua ai. O nei mea uma e ala lava ona fa'atulafonoina togafitiga o meaola e pei lava fo'i ona aiaia le tausiga lelei o le soifua maloloina o tagaga soifua.

 

Ua fa'ailoa mai ua silia ma le 200 o meaola ua mae'a faia latou taotoga ma siakiga e le foma'i manu lenei, ma sa i ai fo'i se sao o le afioga le Faipule i Uosigitone, Aumua Amata, na te fa'aoo atu ai se tausiga lelei mo le aufaigaluega ae maise lava Dr. Grover i le ulua'i vaiaso na faia ai lona sao agalelei tele mo tatou meaola fa'afagafao i Amerika Samoa.

 

Na maua se avanoa o Aumua Amata e fa'ao'o atu lana ta'ifau o Smiley, ua silia i le 20 tausaga lona matua, ina ia va'aia fa'apitoa e Grover, ia toe fa'aopoopo nisi tausaga e ola ai pea Smiley ma lona aiga i Mulinu'u, Nuuuli.

 

Ua fa'ailoa mai fo'i e Aumua Amata lana fa'afetai i lenei ali'i foma'i manu, ona o le alofa i meaola, ua sau mamao ai, ua le malolo ai, ae fa'aaoga lona taimi malolo mai ona faiva, na te va'aia ma galue ai e faia taotoga o tatou fagafao e silia ma le 400 o i latou ua mae'a lisia mo nei tautua mana'omia tele.

 

TULA'I MSGT POUSIMA, AMASIA MCKAY - TALIA FA'AILOGA SGT MAJOR

 

O se tasi o alo o le atunu'u MSgt Amasia Pousima mai Afono ma Tula Amerika Samoa ua atoatoa nei ana taumafaiga i le US Army ina ia avea ai o ia ma "Major Sergeant"

 

Ua matua fa'afiafiaina ai lava si ona to'alua o Pua Pulou Pousima. "Ua fa'afetai lo'u agaga i le Atua ona o lenei fa'aea ma le malosi ae maise o le atamai ua ia aumaia e mafai ai ona tausinio mo la'asaga aga'i i luma o lenei fo'i faiva ua tofia ma galue ai. O ai na ilu ma talu e maua se avanoa fa'apenei e ausia nei ai nei tulaga, ua na'o le Atua na te mafaia ona fa'amanuia i le tagata ma ana taumafaiga uma. O le fa'afetai fo'i i matua ona ua mafai ona matou fa'atasi i lenei taimi fa'apitoa o le auaunaga,” o se tala lea na fa'auia mai e Major Sgt Pousima.

 

O le sauniga sa fa'apine ai o ia na fa'apine ai o ia e lana manamea Pua Pousima, ma si ona tina i le isi itu o lona la'ei fa'apitoa e iloga ai le si'itaga o lona tofiga i le US Army.

 

R.J. AIAFI - A'OGA SAMOA COLLEGE ULUFALE SIKOLASIPI FOOTBALL

 

Ua maua lipoti e fa’apea o le ali'i talavou o R. J. Aiafi ua fa'amanuiaina o ia e to'alua i ai sui talavou tama ua fili fa'apitoa mo le avanoa e a'oga amata atu i Hawaii, ma ta'alo ai i le ta'aloga Football, po'o le Lakapi Fa'a-Amerika. O le isi sui o le susuga Belford Viali mai le St. Jospeh's College i Samoa.

 

O Aiafi ua fa'ato'a 15 tausaga o lona soifua, ma ua o'o fo'i ana a'oga i le Tausaga 12 i le Kolisi o Samoa. O ia o le atali'i ui'i o le Sui i le Palemene mai Faleata i sisifo, Lealailepule Rimoni Aiafi ma le faletua o Sharon Aiafi. Tasi le fa'amoemoega atoa o tama, "Matua'i fa'atutu le taumafaiga ia maua ni fetu o lona pale."

 

O Aiafi ma Viali o sui e to'alua mo le 2020 All Star Football Polynesian Bowl, lea e faia le ta'aloga i Hawaii.

 

"O le avanoa lenei sa ou moemiti i ai, lea ua tu'ulima mai ia te a'u, e ao ina ou fa'aaogaina tatau. Tausailia ai se manuia mo lo'u lumana'i, ae maise mo nai ou matua ma aiga,” o se tala lea a Aiafi i le Upega tafailagi ma lana fa'afetai tele ina ua ia mauaina lea avanoa.