FAAU'U O'RILEY SIONA LE'AU, NEW MEXICO MILITARY INSTITUTE

Ua fa'afiafiaina matua ma aiga ina ua mae'a mai le a'oa'oga a se tasi o fanau a le atunu'u, le ali'i talavou o O'Riley Siona Le'au mai le New Mexico Military Institute ma sa a'oa'oina ai fa'atasi i latou ma nisi fo'i o fanau mai Amerika Sama. O ona matua o John Le'au ma Fatima Siona Le'au o Aua ma Leone. O lona tama matua Siona Sauafea o se tasi o ali'i faia'oga ma sa avea fo'i ma Pulea'oga i le tele o tausaga mo le matagaluega o A'oga a le malo. O nisi o ona matua matutua o Vou ma Tagiilima Simi mai Leone.

Na aoga O'Riley i le A'oga Tulaga Muamua i Aua ae fa’au’u i le Aoga Maualuga a Fagaitua i le 2017, ma sa ia mauaina le togi tulagalua i le vasega faaiuaso i lena tausaga.

Ina ua mae'a le fa'au'uga na sa fa'aauau atu ai loa i a'oga fa'amiliteri i New Mexico. Ua fa'ailoa mai fo'i le fiafia tele o nai ona aiga uma i Tacoma Washington ma fa'apea ma isi uma i Hawaii ma le tatou atunuu nei.

ALISSA PILI - MAUA "MAXPREPS TEINE TA'ALO AOGA MAUALUGA ALASKA"

Le tama'ita'i Samoa ta'alo malosi i le Volleyball, Basketball ma Ta'aloga Togi Ma'a Salafa ma le Togi Pulu Mamafa mamao, ua ia mauaina ai le aotelega e 13 Pine a'ia'i i lenei tausaga i le Setete atoa o Alaska.

O ana pine nei e aofia ai le 4 Pine mai le Volleyball, 2 Siamupini mai le Basketball, 4 mai le Ta'aloga Togi Pulu Mamafa, 2 mai le Togi Ma'a Salafa mamao, ae tasi mai le Pi'i fa'apolofesa.

O lea ua pale nei o ia i le fa'ailoga o le MaxPreps, ma ua fa'alua nei o ia umia lea fa'ailoga. Ua na'o le to'alua fo'i i ai ni sui mai Alaska atoa ua latou maua lea fa'ailoga fa'alua.

E tusa ai o se fa'amatalaga a lenei tama'ita'i na soifua a'e i Alaska, "O a'u ou te fiafia tele e ta'alo fa'atasi ma tama, aua e vave toe ta'a'alo malosi i latou i taimi uma. Ua atili ai ona si'itia ma le la'asaga e ta'alo ai a'u i so'o se taimi e taa'alo ai ma tama'ita'i i liki o ta'aloga ou te iloa ta'alo fa'atauva ai."

O Alissa Pili ua na'o se tausaga lua lea i le Dimond Anchorage ma e ta'alo fo'i o ia i le Alska Lady Hoops i le masina o Iulai 2019. E le tasi se tulaga e mafai ona ta'alo ai o ia i le Basketball ma ua iloga e matua lelei fo'i i le foueki ae agava'a fo'i i le puipui mai o isi tulaga i le ta'aloga.

Ua 17 tausaga o lenei alo o le atunu'u, e 6futu lona umi, ae iloa so'o se tulaga e ta'alo i ta'aloga uma ua lisia e tauva ai, o lo'o ta'alo mo lana a'oga Dimond High School i Anchorage, Alask. Ua fa'ailoa e ia, a lelei le Matematika, e lelei fo'i lou silafia o so'o se ituaiga posisi e ta'alo ai.

O ona amtua o Billy ma Heather Pili ma to'a fa ona tuagane, o le ali'i o Brandon lea ua taalo football mo le Trojans a le USC ma o lo'o ta'alo i le tulaga o le Defensive Tackle, ae to'alua ona uso. Afai e mae'a lana aoga maualuga i Anchorage o lo'o ua ia mana'o lava e ulufale fo'i i le USC e ta'alo ai ma fa'aaoga sana sikolasipi mai le Basketball. O lo'o a'e mai fo'i le taumafai a lona uso la'ititi o Kayla Pili i le ta'aloga Volleyball ma le Basketball. O lona uso la'ititi o Alyna e na'o le 4 tausaga ma lona tuagane ui'i o Billy Pili lea na'o le 1 le tausaga.

Na tali ata le tama'ita'i o Alissa Pili ina ua fesiligia pe matamata la i ta'aloga i le Televise ona o lea e fiafia i ta'aloga a le ESPN, ae fai mai, "E leai ma se taimi e matamata ai i se televise, e pisi uma lava i latou e feoa'i solo i a matou ta'aloga. Poo le a lava se iuga o nei mea uma e feoa'i ai, ae ou te iloa, o nai o'u matua o lo'u fa'amoemoega sili lea ou te tua atu i ai."