Ads by Google Ads by Google

Tala I Vaifanua


[ata: shutterstock.com]

ASO SA O TAMA FA’AMANATU IA IUNI 16 - ASO SA NEI

 

Ao fegai ai Amerika Samoa i lenei vaiaso o fa’au’u a aoga maualuluga a le malo, e le galo ai foi i le mamalu o le atunu’u, o le aso Sa nei, Iuni 16, e fa’amanatuina ai le Aso Sa o Tama, i Amerika Samoa, ae maise teritori ma setete o Amerika i lenei tausaga.

 

“O le Aso Sa o Tama, ua tatou manatunatu ai i tama uma ua fa’afaileleina fanau i ala e a’oa’oina ai i latou i ala tatau o le olaga, aua e mafai ona ta’ua so’o se tasi o se tama, ae fa’apitoa lava ma fa’asilisili  se tama e na te a’oa’o le fanau i ala tatau,” o se vaega lea o le saunoaga tusitusia a le afioga i le Lutena Kovana, Lemanu Peleti Mauga, mo lana fa’amanuiaga o le Aso Sa o Tama i lenei tausaga.

 

“E taua tele le matafaioi a le tama i le olaga o le fanau.  E ono a’afia i ni tulaga faigata le olaga o le fanau pe a le lotolotoi ai le a’oa’oga a le tama,” o a Lemanu lea. “Ua tatou molimauina nisi fanau o lo’o feagai ma faigata ona ua misia le lagolago fa’atama i a latou taumafaiga.

 

Sa toe fa’amanatu mai e Lemanu upu a le poto o Solomona, “E matua ‘oli’oli lava le tama o le ua amiotonu; o le na fanaua le atali’i poto, e fiafia o ia ia te ia.”

 

Sa fa’ailoa e Lemanu, “E a’oa’oina le fanau i a tatou mea e fai; e pele lava i a i latou o latou tina, ae naunau lava ia fa’apei o latou tama.  ‘Aua e fa’apei ona avea tinā ma fatu o le aiga, o le tama fo’i ua avea ia ma ulu o le aiga.”

 

“E ola ma soifua le fanau i fa’ata’ita’iga ma a’oa’oga lelei a le tama o le aiga, e iai fo’i taimi o le olaga e tatau ai i le tama ona fa’atonu ma a’oa’i le fanau ina ia avea i latou ma la la’au e ola mafala e ono malu ai nisi tagata i aso faigata.”

 

Ua avea Lemau ma sui o ia ma le afioga i le kovana, mo o la aiga, e fa’amanuia ai le Aso o Tama i le atunu’u.

 

TALIA TUVALU TALIGAMALO MO LE FONOTAGA TA'ITA'I MALO POLENISIA

 

Ua talia e le Malo o Tuvalu le talosaga e talimalo i le Usugafono a Taitai a Malo Polenisia (PLG)  lea sa tu'u e talimalo ai Amerika Samoa ia Iulai, 2019.

 

Ua tali aloa'ia e le sui o le malo o Tuavalu, Iakopa Italeli, le talosaga i sana lauga fa'apitoa e fa'aamanatu ai le aso soifua o le Tupu Tamaita'i o Peretania Elisapeta, i le fa'aiuga o le vaiaso na te'a nei.

 

O lana tautalaga fa'apitoa lea ae fa'ai'u ai i lana fuaitau fa'alaua'itele i lona malo, o le a latou talimalo i le Fonotaga PLG ia Aukuso, 2019.

 

Ua mae'a fa'atulaga e i ai ni pili e totogia e Amerika Samoa mo lea fo'i taligamalo a Tuvalu, ma ua fa'ailoa mai e ta'ita'i o Tuvalu, e le'i mae'a ona soalaupule na tulaga uma i le taimi nei, peita'i ua sauni i ai Tuvalu mo le fonotaga lea.

 

O le ala fo'i o le fa'amatu'u mai o lenei fonotaga e talimalo ai Amerika Samoa, ona sa talosaga Kovana Lolo Moliga ina ia faia e tatou lea sao mo lea fonotaga taua i le tausaga nei, aua sa taumafai fo'i e avea i tatou o se tasi o totino o lea fa'alapotopotoga.

 

Peita'i, ua fa'ailoa manino o le masina o Aperila na talosaga ai Lolo i le Palemia o Tuvalu, Enele Sopoaga e talimalo Tuvalu.

 

O le tausaga ua te'a sa fa'atula'ia ai e Lolo se Komiti Fa'apitoa ina ia latou va'ai toto'a ma aiaia tulaga uma tau lea taligamalo ma sa ia tofia ai le afioga le Lutena Kovana Lemanu Peleti Mauga e avea ma ta'ita'ifono o lena taligamalo.

 

O le asiasiga mai a le Sui Sinia o le Matagaluega o le Initeria, Nikolao Pula  na ia fa'ailoa ai le $350,000 e fesoasoani i le talimalo a Amerika Samoa i le fonotaga a le PLG.

 

Ua fa'ailoa mai e se tasi iloga o le Ofisa o le tatou kovana, "E le tagofia le tinoitupe lea na fa'amatu'u mai e le Initeria mo le taligamalo lenei. Ele mafai. O lo ua i ai le fa'amoemoe i le fonotaga lenei, e talosaga ai Amerika Samoa e talimalo i le tausaga a sau, 2020, ma o iina loa fa'ato'a fa'aaogaina ai lea tinoitupe."