Ads by Google Ads by Google

Tala I Vaifanua


O le fa'amoemoe maualuga i le Samoa Baptist Academy (SBA), ia tuua e Lucy Tafao le galuega, ae ua tula'i fo'i Ruth Tuatoo e fa'aauau ia tele nisi vasega fa'aiuaso fa'apenei e tu'ua le SBA. O le vasega fa'aiuaso lea o lenei tausaga i le vasega 8. [ata: Leua Aiono Frost]

LITAEA LUCY TAFAO - FAIA'OGA, PULE AOGA SAMOA BAPTIST ACADEMY

 

O le toe fa'au'uga lenei a le Samoa Baptist Academy (SBA) o le a molimauina e le tama'ita'i Pule A'oga a'o le Faia'oga fo'i mo le 26 tausaga talu ona toe taliu mai i la'ua ma le susuga le Fa'afeagaiga Ta'ita'i o le Ekalesia Papatiso, e tautua i le atunu'u.

 

Ona o le tofi o le tama o le aiga, Rev. Tafao e avea ma ta'ita'i o le Ekalesia Papatiso i Amerika Samoa, lea sa o mai ai mai Amerika e galulue i le teritori, ae avea ai le faletua o Lucy Tafao ma Faia'oga ma fa'asolo ai ina Pule A'oga i le Samoa Baptist Academy.

 

O Mrs. Tafao sa faia se Upu fa'amalosi au i le fa'au'uga o le vasega 8. "Ou te fa'afetai i lenei avanoa, aua ou te iloa, e ui ina atoa le 26 tausaga a'o tautua i le Samoa Papatiso ma le tatou Laumua nei, ae o le tausaga lenei ua sili ona ou mitamita ai aua, o galuega ua fua mai. E to'atolu fanau sa a'oa'oina i le aoga, ua avea ma togisilia i vasega 12 i le teritori i lenei tausaga, o se galuega na tatou fa'afailele leleia mai le amataga o latou soifua aoa'oina. Lea ua fa'aalitino le aoga o le taumafaiga, ia vi'ia ma saga vi'ia ai le Atua, aua ua tali leleia le tatou taumafaiga."

 

I le vasega fa'aiuaso, "Ia taua ma ia outou tautatala lelei i le Gagana Samoa. O le tatou tofi na tu'uina mai mo i tatou e fa'asoa ai o tatou lagona, ma ia tatou ola feso'ota'i lelei ai.”

 

"O atu ia, ma ia fai outou ma sulu i le pouliuli, o lo outou malamalama ia avea ma se lamepa e susulu pea, ia tu'u i luga, ia malamalama uma ai le lalolagi o le a outou savalia, a'o outou tausaili pea ia fa'alautele lou atamai,” o sana tala lea i le au fa’auu e to’a 13.

 

E to'a fa i latou ua ausia togi maualuluga e avea ai ma sui o le National Honor Society: Precious Aguirre; David Apineru; Siannalai Kolone ma Deena Lutali.

 

O le sui na tulaga lua i togi maualuluga o Deena Lutali e 3.83 lana GPA. O le togisilia  o David Apineru i lana GPA e 3.84.

 

I lea fo'i vasega fa'aiuaso, na malaga mamao mai ai le talavou o Rachael Ioane, o se tasi sa amata a'oa'oina fa'atasi mai ma lenei vasega i le Level one, ae peita'i i le tausaga e 2015 ia Aperila, ae fa'ataotolia mo le masina atoa i le LBJ Medical Center ma ua fa'ailoa mai ai, ua maua i le Kanesa o le Toto po'o le Lukemia. Na si'itia ma’i i Hawaii. Ma o se vavega ia e ia le toe manuia mai i lea gasegase fita, o lea na tula'i ai e faia lana molimau, fa'afetaia le alofa o le Atua i lea vavega ua toe ola ai, ma ua ia fa'amalosi'au fo'i i lana vasega faau'u i lenei tausaga, ona o le soifua tausaili ma le filiga i le sailiga o le atamai lautele.

 

O ia o le alo Faife'au Papatiso o Fola Ioane ma le faletua o Finau, ma ua avea lona si'itia i Hawaii ua avea fo'i ma avanoa lelei e malaga atu ai ma le fa'afeagaiga ma si ona aiga atoa, ua galulue ai nei i le Ekalesia i lea fo'i setete.

 

Na malaga mai i la'ua ma si ona tina e molita'i mai le fa'amalo i lana vasega mo lana saunoaga fa'afetai fa'alaua'itele i lana ekalesia Papatiso i Happy Valley, ae maise i ona uso ma tuagane i lana vasega.

 

Ua le gata i lea lana fa'afetai,  a ua fa'asalafa i le vasega o Sosaiete Fesoasoani mo e gasegase Kanesa i le atunu’u, aua ua fa'ao'o atu fo'i fesoasoani tau tupe mo ia i lana sailiga malosi, fa'afetai Galea'i Cancer Foundation ma le Amerika Samoa Community Cancer Foundation.

 

"O a'u o le va'aiga ma le fa'amau mautinoa, o le vavega ua faia e le Atua, ona o le to'atele o outou na outou vala'au mo a'u e ala i talosaga, fa'afetai tele,” o sana tala lea ma loimata o le fiafia.

 

O Deena ma David sa saunoa i le fa’auuga ma sa la'ua fa'afetaia fa'atasi ai le vasega o matua ma aiga i le latou titi faitama ma le tausiga lelei o i latou, ae maise o le sapaia o mea uma sa mana'omia mo latou a'oa'oga. Na fa'afetaia faia'oga ma le pulega o le SBA, ae maise le pule aoga ma le faiaoga History ma le Holy Scripture ia  Mrs.Tafao.

 

"Ia manuia le olaga litaea, o le a feagai ma oe, matou te iloa e te misia i matou e pei ona matou misia oe,  A'o Upu ua e a'oa'oina ai i matou, o le matou Ola lea!" O le autu fo'i lea o le fa'au'uga i lenei tausaga, ua latou avea ma upu fa'amavae mo le latou tina i le Laumua i Happy Valley.

 

O le pule a'oga fou ua mae'a fa'atulaga mo le amataga o le tausaga a'oga fou, o Ms Ruth Tuato'o.

 

O nisi o fa'ailoga fa'apitoa sa taua'aoina i nisi o le vasega fa'au'u e ese mai le togisilia ma le tulaga lua sa maua ai e Johannah Sovea le fa'ailoga o le Taitai Kerisiano. O le fa'ailoga mo le sui sili ona fiafia ma agava'a i ta'aloga ua mauaina lea e Davina Toafa. O le fa'ailoga fa'apitoa mo le togisilia i le Numera ua mauaina lea e Siannalai Kolone. O le toe tatalo e maea ma o ia fo'i sa tatalo e amatalia ai le sauniga mamalu o lea fa'auuga na tu'uina lea i le tama o le galuega Papatiso i Happy Valley, Pr Elise Tafao.

 

$1.4 MILIONA AOFAI - TAMAOAIGA FA'AALU NATIONAL PARK TAUSAGA 2018

 

Mai se lipoti fou ua fa'ailoa mai e le Laufanua Fa'asao o Amerika Samoa - National Park of American Samoa, ua fa'amauina ai le aotelega e $1.4miliona le tupe ua faaaluina e i latou na asiasi i le National Park i le tausaga 2018.

 

O lea aotelega e tu'ufa'atasia ai laufanua fa'asao i Tutuila ma Manu’a

 

Mai lea vaega tupe fa'aalu,  e $784,000 sa fa'aalu i le totogia o tagata faigaluega ae $2.2 miliona ua fa'aalu mo tautua eseese o lo'o faaaogaina i Laufanua Fa'asao i le teritori.

 

O i latou na saunia lea lipoti e aofia ai le tama'ita'i ua fuaina faatatau le tatou tamaoaiga tausi Catherine Cullinane, Thomas ma Egan Comachione, ma Lynne Koontz o le National Park Service.

 

O le tele o tupe fa'aalu, ua fa'amauina o mea tausami lava e fa'aaogaina e tagata faigaluega, faatasi ai ma nofoaga e nonofo ai a'o faigaluega i latou.