Ads by Google Ads by Google

Tala I Vaifanua


O le aumalaga a le Measina Amerika Samoa ma latou faia'oga ma fa'atonu, ae maise o le vasega o matua o lo'o latou sapaia ma le atoatoa le taumafaiga a le fanau i lea fo'i fa'agatama. Ua pu'e fa'atasi ai ma le afioga le Lutena Kovana Lemanu Peleti Mauga i lona Ofisa i le EOB aua sa faia fo'i le sao o le malo mo lea taumafaiga, e ala i le foa'i tupe e totogia ai latou pasese ma le nofoaga e nonofo ai ma ta'a'alo i Hawaii. [ata: Leua AIono Frost]

MALAGA AU VOLLEYBALL TAMA'ITA'I - “MEASINA” AMERIKA SAMOA I HAWAII

 

O le au Volleyball a tama'ita'i Amerika Samoa ua fa'aigoaina "Measina" ua fuafua e malaga i le vaiaso fou i Hawai’i e tauva i le Liki a le Mixed High School Volleyball mai vasega 9 e o'o i le Vasega 11 i a'oga maualuluga. E atau ona fa'aulu atu i se Kalapu Volleyball, ae le o se a'oga.

 

O le 'au masi'i a le Measina, na asia le Ofisa o le Kovana i le aso ananafi e fa'afo'ia le fa'afetai, ona o le faimeaalofa a le Malo o Amerika Samoa i le latou taumafaiga, lea ua totogia atoa o latou pasese fa'atasi ai ma Faia'oga ma Fa'atonu Volleyball, ae maise le faletalimalo e nonofo ai i Hawaii mo le lua vaiaso o le ta'amilosaga Volleyball a le Aloha Summer Classic, lea e amata ia Iuni 14 & 20, 2019.

 

O le isi fo'i avanoa lea o le a auai ai i le ta'amilosaga Volleyball e faia ia Iuni 19 & 20, 2019, ae o isi taimi uma e taumafai ai ina ia a'oa'oina lelei e ala i a latou koleniga, i le malae o le a faia ai lenei ta'amilosaga.

 

O Koleniga fa'apitoa o le a fa'atautaia lea e Rev. Kapisi ma Coach Lydia Faleafine Nomura, Malia Lemafoe Sene ma Celise Kapisi a'o le Igilisi lea ua i ai Abish Schroeder Autele ma Pele Kruse.

 

O tamaita'i ta'a'alo e to’a 10 e aofia ai: Lene Kruse; Jade Fepulea'i, Tofi Asi, Delorrie Tovale, Eileen To'alepai Mariner, Chloe Marie Le'iato, Malia Lemafoe  Sene, Celise Kapisi, Abish Schroeder Autele ma Pele Kruse.

 

O le afioga le Sui Kovana, Lemanu Peleti Mauga, sa fa'afeiloa'ia i latou, "E ao ina outou fa'amuamua lava oe, le teine ta'alo, ia taua ia te oe lau amio ma au aga o le a faia, ia outou faaaloalo ma ta'a'alo tausa'afia, ae le tu'ua ai le ta'alo malosi ina ia manumalo. O le ala lea o le fa'alona lua o le ta'aloga o tou malaga atu ai, ina ia mautinoa e maua lava le malo, pe a outou faia uma mea ua fa'atonutonu ai outou e tou fa'atonu ma faia'oga o le Volleyball. Ia manuia la outou taumafaiga o le a outou auvasa atu e faia mo tou matua ma aiga, o tou ekalesia ma autalavou, ae o lou sao fo'i lea mo lou malo ma le tapua'iga mau ua ala ai lenei foa'i mo outou, ia outou iloa, sa i ai lava lo outou malo i a outou taumafaiga."

 

FOA'I McDONALDS LE $200,000 TALIGAMALO SAMOA TAALOGA A LE PASEFIKA

 

Ua fa'alauiloa le agaga fa'afetai o le Komiti o Ta'aloga a le Pasefika i Samoa ona o le meaalofa tele ua taua'aoina e le fale'aiga o McDonalds Family Restaurant i Apia mo le taligamalo. O le latou foa'i e $200,000 ua avea ai i latou ma se Pa'aga Ario po'o le SIliva a le latou Komiti o Ta'aloga a le Pasefika 2019.

 

O le Taitaifono o le Komiti o Ta'aloga a le Pasefika Loau Solamalemalo Keneti Sio, na taua'aoina ma fa'afetaia lea meaalofa ma le agaga fiafia tele, ua le tasi ai fo'i se sao o lea fale'aiga tautaua i le lalolagi, ua faia mo Samoa.

 

O le susuga le CFO a le McDonald's Family Restaurant, Fuimaono Pemerika Suemai sa avea ma sui o le McDonalds e taua'aoina atu le latou lea fesoasoani mo lea fa'amoemoe lelei, ma o se sao fo'i lea i le vasega o tupulaga talavou uma o le a tauva i so'o se faagatama mai Samoa na lua.

 

Saunoa Pemerika, "Ua tatou iloa o ituaiga fa'atasiga nei e matua maua ai fo'i e faletalimalo, fale'aiga ma le tele o ituaiga o pisinisi e tautuaina le mamalu lautele le fa'amanuiaga. O lea e tatau lava ona matou tali atu fo'i i le tapenaga o lenei fa'amoemoe aua e le faigofie ma e le taugofie fo'i. Tau ina ia sao ma uli le fa'amoemoe o le tatou malo i Samoa nei, ia maua fo'i ni tatou manumalo se tele i tauvaga o le tomai ma le malosi i fa'agatama eseese o le a tatou tauva ai. Ia fai se 'ai o lenei taligamalo, le tupulaga ae, saga'i ane ni 'ai o le tai!"

 

FA'AAOGA FA'ALELEI ELEELE - MAI LAFU MOA I LE VA O LAINA FA'I:

 

Ia Me 22, 2019, na tatala ai le fa'ato'aga a le tama'ita'i o Sagaia Lefe'e i Vaitogi e maimoaina e le mamalu lautele o faifa'ato'aga fa'apea ma nisi o a'oga sa fa'ato'ai atu, ina ia maimoa ma fa'ailoa ia i latou le faiga o lo ua ia fa'aaogaina ai fe'au a moa e fa'aleleia ai le eleele mo fa'ato'ga fa'i i Vaitogi.

 

O lenei poloketi sa fa'atautaia e Lefe'e, sa fa'atupe e le USDA-WSARE (Western Sustainable Agriculture Research Education).

 

O le faiga o lo'o faia ai, ua tu'ua ni pa uaea o lo'o loka ai moa i le va o laina fa'i o fa'ato'aga, ma o fe'au uma lava a moa, fa'atasi ai ma le latou sae'ua esea o le otaota pito a luga o le laueleele i le vaifa'i lava lea, ua mafai ai ona ulu le maniua po'o le fa'alelei eleele i totonu o le palapala pe a timuga fo'i. 

 

Sa asia fo'i lea fa'ato'aga e le ASCC Land Grant ae maise aoga a Nuuuli VocTech ma Iakina SDA Academy Level K4.

 

Na fa'amatala e Lefe'e le amataga ona gaosia o pa uaea fa'apitoa lea e tu'u ai moa mo le aso atoa, ina ia faia latou fe'au ma latou saeua fo'i palapala i le vai fa'i. Mai le amataga o lana taumafaiga sa ia mua'i talosagaina le fa'atupega mai le USDA / WSARE, ona ua fiu lava e taumafai atu lana togafa'i, ae va'aia lava e le o olaola lelei ma e tele fo'i ona mama'i fa'i.

 

Na malaga fa'apitoa atu le sui mai le vaega lea sa talosaga i ai, e fa'atalanoa le mataupu ma va'aia fo'i foliga mai o lana togafa'i.

 

"O le manaoga ia lelei mai fua o le togafa'i ia mafai ona pasia lelei mo le polokalama lea e fa'atautaia nei o le Meataumafa a le fanau A'oga SLP, lea e fa'atau atu i ai, fa'apea ma le maketi mo tagata lautele. Pau le mea ua mautinoa e tatau ona lelei le fa'alelei eleele po'o le maniua,” o se tala lea a Lefe'e.

 

"Sa ou manatua lava e masani ona tele lava matou moa e tata'a solo i le fanua, ma e le tau mana'omia lava le fa'atumau o moa i le vaifa'i i na vaitaimi, aua e fai lafu moa e 'aina e le matou aiga i vaiaso ta'itasi. E o lava moa latou saeu solo le otaota, ma e le mau ai ni manu nini'i fa'alafua a e ono fa'aleagaina ai fua o fa'aeleeleaga i luga o le eleele. Peita'i e mafai ai ona ulu sa'o atu le manuia mo'omia i le eleele pe a o'o ina timuga aso."

 

Ua fa'aaogaina fo'i le pa uaea mo moa ina ia le fa'aumatia moa e maile ma tape fo'i e nisi e fa'aaogaina mo meataumafa pe a o'o ina o mamao.

 

O le saogalemu fo'i lea o le poloketi ina ia mautinoa lava o fa'aauau i aso ta'itasi ona fa'aleleia le eleele. E le tumau ai la le pa moa i le nofoaga e tasi, ae ua fa'asolosolo ia tofusia le fa'ato'aga fa'i atoa o fa'atutu solo ai i aso ta'itasi.

 

Ua suisui fo'i ituaiga mea'ai mo moa ina ia iloga fo'i o suisui ituaiga maniua e maua mai latou fe'au mamao lea e avea ma fa'alelei eleele.

 

Fa’ailoa e Lefe’e "E aumai moa o moa sa tu'u fuamoa, sa le tele se taimi e mafai ai ona latou saeua le eleele, peita'i e le'i umi lava ona tu'u i latou i pa moa i luga o le tele o otaota i le vailaina fa'i ae va'aia loa, ua alu ma le atoa le saeu moa nei. O lo'o i ai i o latou natura lea amio, ma e fiafia fo'i ua toe fa'afo'i mai le olaga fa'anatura o Moa i le mea na foafoa ai e le Silisili ese mai le amataga."

 

Ua le gata la ina tu'u mai fuamoa e nei moa, ae ua toe fa'afetaia ma le tulaga ua saeu fa'asolo atoa le eleele ma latou 'aina manu nini'i fa'alafua, ma ua aoga fo'i latou fe'au e avea ma maniua po'o le fa'alelei eleele aoga tele mo le togafa'i.

 

Afai e te fia asia lea fa'ato'aga e mafai ona e vala'auina Lefe’e.