Ads by Google Ads by Google

Tala I Vaifanua


Le tama'ita'i ua a'e mai nei lona taumafai i le togi ma'a salafa i ta'aloga afeleti i Tacoma, Washington, Ho'oponokauilani "Pono" Fuiava mai Hawaii ma Samoa nei. [ata: foa'i]

Le tama'ita'i ua a'e mai nei lona taumafai i le togi ma'a salafa i ta'aloga afeleti i Tacoma, Washington, Ho'oponokauilani "Pono" Fuiava mai Hawaii ma Samoa nei. [ata: foa'i]

TAPUNIA E LEOLEO & DOC FAITOTO'A O LE "TOA TAXI"

 

Ina ua le fa'alogo pea lava le TOA Taxis i le fa'atonuga faamalosia a le Matagaluega o Fefa'ataua'iga (DOC) sa tuuina atu ia i latou, ia le toe fa'aauau ona fa'atautaia le latou tautua se'i vagana ua mae'a fa'atalanoa le mataupu tau si'itaga o totogi o ta'avale laiti la'u pasese, lea ua latou fa'amalosia ona si'itia, ona faia loa lea o le isi la'asaga e le vasega o Leoleo ma le DOC, tapunia ma loka loa le faitoto'a o lea pisinisi.

 

I le taimi nei ua loka ai le faitoto'a o lea tautua mo le mamalu lautele, ae ua amata ona o'o ane nisi o le au ave ta'avale la'upasese o ta'avale laiti ma latou talosaga i le matagaluega, ina ia alofagia, o lea fo'i le ala o lo'o maua ai e i latou le tupe e tausia ai nai o latou aiga.

 

I se tusi a le Commerce Commission (Komisi o Fefa'ataua'iga) ia Me 13 i le TOA Taxi, sa fa'ailoa manino ai ua se'ia le latou laisene e fa'atautaia ai pisinisi i Amerika Samoa, ma o lea tusi na fa'ailoa mai lava, ua taua'aoina lea i le a'ao o le ali'i o lo'o avea ma ta'ita'i o le Toa Taxis, po'o ia fo'i lea e fa'amauina e ona lea Taxi Stand.

 

Peita'i, e ui lava ina faia lea tulaga e tusa o ala o tulafono, ae le usita'ia lava e le TOA Taxi le poloa'iga tusitusia ua fa'ao'o atu ia i latou.

 

O le eleele o lo'o lisia e le TOA Taxis e fa'atautaia mai ai le latou pisinisi, o le eleele lea ua mae'a taua'ao fa'apitoa mo le Malo o Samoa lea ua fuafua e fa'atula'ia ai le  Ofisa o le Konesula o Samoa i Amerika Samoa.

 

Ua mae'a fa'atulaga e le Komisi o Fefa'ataua'iga le aso 3 o Setema e faia ai le fonotaga fa'apitoa e mafai ona o'o atu ai le TOA Taxi e talanoaina lenei mataupu.

 

TOGI MA'ASALAFA MAMAO HOOPONOKAUILANI FUIAVA - TACOMA, WA

 

Ua fa'ailoa mai ua matua manumalo a'ia'i le togi ma'a salafa mamao a le tama'ita'i Samoa na soifua a'e i Hawaii, ae o ona matua lava o Amerika Samoa mao'io'i, o Hooponokauilani Fuiava, i Mt. Tacoma High School, i Washington ma ua avea o se numera tasi i le setete atoa lea matati'a i le taimi nei.

 

O lenei tama'ita'i ua matele ina vala'auina o Pono, e fa'apu'upu'u ai lona igoa, ae o lana togi ua mae'a avea nei ma matati'a fou i le togitogi ma'a salafa i taaloga afeleti, ose 'ai fo'i mo Amerika Samoa.

 

Na faia ta'aloga afeleti nei i le aso Tofi o le vaiaso te'a nei. Ua fa'amauina lana togi e 146 futu le mamao i le vasega o Tamaita'i, ma e tasi le inisi ua sili ai lana togi nai lo le fa'amaumauga sa i ai a le Class 3A State Track & Field Championships.

 

O soloia nei e le togi a Fuiava le matati'a tuai e tusa ma le 44 tausaga o tula'i mai ale West Sound, ae maise fo'i o le matatia a se tasi o tama'ita'i a'oga o Angela Sampson mai South Kitsap i le 2000.

 

"Na lagona lava i o'u tino ou te gafatia le 140 pe ou taumafai atili i le ta'amilosaga lenei, ae fa'afetai i le Atua o lea ua ata mai se taumafaiga e fa'afiafia loto i nai ou matua, mai Hawaii ma Samoa, lea ua tatou gafatia le 140, se'i toe taumafai atili ia sili atu i le isi ta'amilosaga o soso'o mai,” o se tala fiafia lea a Fuiava.

 

I le taimi nei ua tula'i Fuiava ma le Class 3A State Title Ladies Discuss at 146ft, tasi le inisi ua silia ai mai le matati'a tuai sa fa'amauina i le West Sound Track & Field Record.

 

Na fa'ailoa mai e Fuiava, "Sa tiga lo'u tuli i le amataga mai o lenei ta'amilosaga o ta'aloga Afeleti, ae sa taumafai lava e le fa'alogologo tiga i ai. Peita'i, i la'u togi lea ua sili nei, na pei lava ua ou le toe mafaufau i lea tiga, aua o le tuli lava lea na mafua ai ona ou le tauva i le isi ta'amilosaga muamua i le amataga o le tausaga aoga."

 

"E leai se isi e avea le vi'iga o le Atua i mea uma, fa'afetai ua ia aumaia le malosi ma le iloa e tauva ai,” o lana tala lea ma le fiafia tele, ina ia mautinoa ua ia soloia fo'i ma le matati'a ua atoa le 44 tausaga o tutula'i ma le matati'a fo'i a le latou itumalo ua 19 tausaga o tula'i.

 

Fiafia tele fo'i lona faia'oga Bill Braun, ma sa ia fa'ailoa mai, "Na ona sa'o lava o le fa'aolioli ma le fa'atonutonuga o lana tamo'e ma togi, sa'o loa ma le lele a le ma'a salafa.”

 

TAOFIA OFISA MA TAUTUA "WORLD TEACH" - AUKUSO 2019

 

E ui ina ia fa'ailoa mai fa'alaua'itele o le a tapunia aloa'ia le tautua a le "World Teach," ae ua iloga ona fa'afetaia le sao o lea polokalama mo fanau a le atunu'u, ma le malo fo'i i lana Matagaluega o A'oga.

 

O le 2008, na tatala aloa'ia ai le avanoa o lea polokalama e fa'auia mai ai nisi o faia'oga, e i le Matagaluega o A'oga i le a'oa'oina lelei o fanau a le atunu'u. Ae ua fa’ailoa mai e tapunia aloaia lo latou ofisa i Amerika Samoa ia Aokuso 2019, ma o le a leai nisi faia'oga e toe fa'aulu mai i le tausaga a'oga fou ia Setema 2019.

 

O faiaoga mai le WorldTeach e le totogia, o volenitia ma e silia ma le 80 i nisi tausaga faiaoga i le teritori.

 

I se tusi aloaia, e ala i se fa’asalalauga fa’alauaitele i le vaiaso ua te’a mai le komiti fa’afoe o le WorldTeach, sa fa’ailoa ai le tapunia o le latou tautua.

 

"O le a faia se suesuega i le agava'a o lea polokalama ma lona fa'amoemoe ia fa'asoa le atamai i so'o se malo o faigata ona aoaoina fanau aua le lumana'i. Pe afai e maea faia lea sailiiliga, ma toe fetu'una'i muniao, atonu e toe tatala le avanoa e fa'aauau ai ona auina mai nisi faia'oga e pei ona masani mai ai talu mai le 2008."

 

"Peita'i, afai e leai, matou te fa'ailoa atu ia Amerika Samoa mo matou agaga faafetai, le agaga fiafia fo'i e tautua ma a'oa'o fanau a Amerika Samoa. Ia manuia lava le fa'asologa o a'oa'oga a le fanau, e ui ina matou tu'ua outou, ae le galo Amerika Samoa le atunu'u matagofie ia i matou i aso uma.”

 

“Fa’afetai tele lava Amerika Samoa mo le taimi ma le avanoa mo matou WorldTeach. Ua tele a‘oa’oga lelei sa matou maua mai i le taimi sa matou i ia i Amerika Samoa. Faamoemoe ia iai se taimi i luma e tatou toe feiloai ai.”