Ads by Google Ads by Google

Tala I Vaifanua


O se va'aiga ia i latou ua mae'a lelei ona aotauina i tomai e toe faate'i mai ai i latou ua mou atu le manava, pe ua matapogia fo'i. O i latou nei o lo'o faigaluega i le DHSS ma ua piki fa'apitoa e lea matagaluega, ina ia fa'aauupegaina i lea tomai. [ata: Leua Aiono Frost]

AUAI DHSS - AOAOGA O LE "HANDS ONLY CPR" KOLUSE MUMU

 

Ina ia matua faataua le fa'asaoina o le soifua i so'o se taimi e pagatia ai se tasi ma matapogia a'o e i ai, ua mafuli le Koluse Mumu e aoao le lautele o tagata, ae maise fo'i i latou e tautuaina le lautele, e ala i le polokalama, "Hands Only CPR".

 

Ia i latou na a'oa'oina mai le Matagaluega o Alagamanuia mo Tagata Lautele (DHSS), ua latou toe fa'afo'i atu le fa'afetai tele i le aufaigaluega a le Koluse Mumu. "O se fa'afetai tele, aua ua toe fa'amanatu mai ia i matou le taua o le ola maloloina lelei, le ala e toe mafai ai ona fa'ate'i i latou ua tau mou atu le ola, ma o se meaalofa sili e mafai ona faia mo so'o se tasi ua pagatia i lea tulaga, pe a o'o ina a'afia ai."

 

"Peita'i, o le toe fa'amanatu fo'i ia i matou le aufaigaluega, ina ia tausia lelei le soifua maloloina, tusa po'o le a le pisi, i fe'au ma tiute fai i aiga ae maise faiva ua galulue ai. O lea toe fa'ate'i ua aoga mo i matou o a'oa'oina le Hands Only CPR, fa'apea ma matou uma o tautua i lenei Ofisa, aua e tumutumu aso uma i le mamalu lautele o le atunu'u o le matou ofisa,” o se tala lea a Poutoa Leituala mai le DHSS.

 

Sa fa'aiu lana saunoga i lona toe fa'atepa o i latou uma i le sini o le aoaoga, "Tau ina ia mautu i o matou mafaufau, ia manava pea, fa'amama mea i le mafaufau ma ia mautinoa o fa'afiafiaina oe e ola fiafia pea!"

 

O le aoaoga a le vasega lea o e faigaluega i le DHSS e tolu vaiaso, ma ua taua'aoina fo'i a latou Tusi Pasi ua agava'a ai, ona ua mae'a lelei itula lautogia mo lea a'oa'oga. O i latou fo'i nei, ua agava'a i so'o se taimi e avea ma Volenitia e galulue mo le Koluse Mumu, aua ua latou maua lea agava'a mo'omia.

 

FA'AU'U TOGI MAUALULUGA RIVERVIEW HIGH - SIKOLASIPI I TAMPA UNIVERSITY

 

O se tasi o tama'ita'i sa a'oa'oina i le Manumalo Baptist School i ona tausaga o Elementary ua fa’ailoa mai lona fiafia ina ua mafaia lava e ia ona fa'atumauina ona togi i le a'oga na fa'aauau, Riverview High School i Tampa Bay, Florida. O ia lea o Estelamerity Toto'a Fouvale Papali'i-Tui.

 

O lenei tama'ita'i o lona tama o le Fitafita Samoa i le vaega au, Visala Tony Tui mai Pago Pago, ma lona tina o Emma Papali'i Tui mai Vailima ma Sapapali'i i Samoa.

 

O togi o Estelamerity i lenei tausaga ua fa'au'u ma ia e 3.95GPA ma ua naunau o ia e fa'aauau ona ia faaea pea Amerika Samoa fa'atasi ai ma le tapua'iga mau a nai ona matua matutua mai Savaii o lo'o latou nonofo fa'atasi i Tampa Bay. E le gata ai ina a'oga o ia i Manumalo, ae o lona amata mai ona a'oa'oina o ia i vasega laiti sa amata mai lea i Hawaii a'o tiute fo'i si ona tama i Schofield Barracks, ma Texas El Paso ma Colorado Springs i Fort Carson.

 

O ona aiga i Pago Pago mai le itu o lona tama, ae maise o si ona aiga mai Nuuuli lea e i ai le aiga o si ona tina.

 

Ua fa'amanuiaina o ia e ulufale i sana sikolasipi ua mae'a ofoina mai e le Tampa Bay University.

 

$2.9 MILIONA AOTELEGA SIAKI LAFOGA TOTOGIA MO TAGATA I LE ASO

 

Tala fiafia i lenei vaitau o le tele o tapenaga a matua i fa'au'uga o le fanau, ae o'o mai le avea'i a le Teutupe a le tatou Malo, Ueligitone Tonumaipe'a, o le a talaina lafoga a tagata faigaluega i le aso Faraile nei, Me 31, 2019, i lona aotelega e $2.9miliona.

 

I lea aotelega ua tu'ufa'atasia i ai lafoga a le fanau e $1.9 miliona ma lafoga loloifale e $1.04 miliona.

 

O lenei aotelega o lafoga ua fa'atulaga e totogia mai, ua aofia fa'atasi i ai i latou na faila ia Ianuari 30 e o’o ia Fepuari 04. Ua fa'alauiloa mai ai fo'i, o le ulua'i taimi lenei ua faia ai siaki o lafoga mai i teugatupe a le malo i le Territorial Bank of American Samoa.

 

Afai na faila lau lafoga i lenei vaitau ua fa'ailoa atu, ae le maua lau lafoga, e tatau ona e toe fesiligia le Ofisa o Lafoga.  Ua fautuaina foi le mamalu o le atunu'u faila lafoga, ia siakia muamua lava i le ofisa o Lafoga pe mata o maua lau siaki, ona faato'a e tu ai lea i le laina, aua e mautinoa lava le tumutumu fo'i o le atunuu, ae tiga fo'i lagona pe a o'o atu i le fa'amalama ae le maua sau siaki.

 

GUAHAN AIONO TE'O MARTIN - FA'ATA'ATIA PALE I LE TU'UGAMAU

 

O le aloali'i Samoa o Guahan Aiono Te'o Martin, 10 tausaga le matua, sa ia molita'ia le pale o fugala'au manogi ma fa'ata'atia i le tuugamau o se ali'i fitafita e le o tusia lona suafa, i le fanuatanu a le fetarale i Arlington, Virginia.

 

O le pale lea ua gaosia lelei i fugala'au papa'e, mumu ma le lanu moana, o lanu o le Agiagia a le Malo o Amerika, ae na gaosia fa'alelei e le fanauiti, o se poloketi fa'atino a se tasi o Fa'alapotopotoga Tumaoti ua fa'aigoaina o le TAPS - Tragedy Assistance Program for Survivors.

 

O le tama o Guahan, Col. George Anthony Martin, na maliu a'o ma'itaga si ona tina, Ursula Aiono Te'o Martin o Faleniu, i le ali'i o Guahan, ua na'o le valu masina o lona ma'itaga.

 

O le maliu fa'afuase'i o Col. Martin ona sa esikegi le va'alele B52 ia Iulai 2008 ao i ai i luga o lea va'a, ma e leai se tasi na sao mai i lea faalavelave fa'afuase'i i Guam

 

Peita'i ua lauiloa Ursula Aiono Te'o Martin ona o lona avea ma ulua'i tama'ita'i Amerika Samoa ua manumalo mai ana taumafaiga o le Teuteutino ma o se tasi fo'i ua mae'a pasia e avea ma Fa'amasino i lea lava fo'i fa'agatama.

 

Talu mai ona atoa le 9 masina o le matua o Guahan, e malaga fa'apitoa lava Ursula ma si ana tama e fa'ailoga le aso Fa'amanatu o Fitafita i Arlington, ina ia tu'uina le pale i le tu'ugamau ua leai se suafa o fa'amauina ai, ma latou fa'amanatu fa'atasi ma le TAPS lea aso tele mo pelega ua maliliu.

 

"Ua tatou o mai fa'atasi o matua, o ta'ito'alua, o uso ma tuafafine, o fanau ae maise o uo mamae ina ia tatou toe fa'afetaia le sao o i latou na maliliu a'o tautua pea, ina ia fa'amautu lo tatou saogalemu,” o se fa'amatalaga lea a le tama'ita'i fitafita tuai  Ursula Aiono Te'o-Martin, e tusa o lea fa'amoemoe.