Ads by Google Ads by Google

Tala I Vaifanua


Le tama'ita'i Amerika Samoa ua Valedictorian [Togisilia] Christina Ragina Maiava - Schaff, i lona fa'au'uga mai le American Military University. Malo le tauata'i ma le fa'aea aiga ma lou atunuu pele o Amerika Samoa. [ata: foa'i]

CHRISTINA REGINA MAIAVA SCHAFF - TOGISILIA AMU  FA'AU'UGA 2019 - WASH. DC

 

O se mea mataina i le mamalu o vala'aulia fa'apitoa a le tama'ita'i Amerika Samoa, ina ua matua tete'i i le o'o atu i totonu o le Maota tele sa faia ai le fa'au'uga o i latou ua agava'a mo fa'ailoga maualuluga o lo'o mafola mai le ata o le tama'ita'i Samoa ma lana ulafala, ua suipi i le fa'ailoga "Togisilia ia i latou ua ausia togi e pasia ai fa'ailoga Bachelor of Arts of Religion” i le American Military University.

 

O le tama'ita'i mai Leone, Christina Regina Maiava Schaff, ua ia ausia lea matati'a, ua matua fa'afiafiaina ai le uso o si ona tina, So'onafai Maiava, ona ua faiilagi le folauga a si ona tina o Lupelele Sofala Maiava mai Leone.

 

Peita'i o lona tama o Rhodney Entrekin, ua maliu fo'i o ia. Ae ua molimau lava Christina Regina, na tausi to'atasi mai lava o ia e lona tina ma fa'aa'oga, se'ia o'o ina mae'a lana a'oga i Leone Midkiff Elementary, fa’au’u i Leone High, ma ulufale i le US Army ina ia mafai ona fa'aauau ana a'oa'oga i le Kolisi.

 

O lona ausia o togisilia, ua maua ai le avanoa e faia ai le lauga mo le vasega fa'aiuaso. Sa ia fa'afetaia lona tina, sa una'ia malosi o ia ina ia ulufale i le vaega au, ma ia taumafai atili ia i'u le a'oga. Peita'i ua afenoa le folauga a si ona tina, ua avea fo'i lona olaga saili ma ala ua toe fetaui ane ai ma aiga o lona tama, ae o lona Tusi Pasi BA in Religion, ua avea lea suesuega ma ala ua ia silafia lelei ai lona Atua, ma fa'aleleia atili le la'ua mafutaga ma lona Atua.

 

O ia o se tama'ita'i Vetereni, fa'apea fo'i le tama o le la'ua aiga, Kevin Schaff, peita'i o lo'o galulue nei i le US National Security. O lo’o tiute Kevin Schaff i Aferika. Ua malaga mamao mai fo'i le tama, e talia le taumafaiga a le tina o le aiga, ma ua fa'afiafiaina ai si o latou aiga e to'alua le la'ua fanau, le aloali'i o Aleksander ma le tama'ita'i o Samara.

 

E fiafia tele Christina Regina i lana aganu'u na soifua a'e ma ia, ua iloga i le tele o mea na te fa'ama'ite ina ia aloa'ia ai lana agaifanua i nofoaga sa alaala ai i Kalefonia ma Hawaii fa'apea fo'i le Laumua i Uosinitone.

 

TOA - FA'AAUAU PEA ONA SI'I TOTOGI TA'AVALE LAITI LA'U PASESE:

 

E ui ina ua mae'a se'ia le laisene mo le pisinisi a le TOA: Taxi Owner's Association e le Matagaluega o Fefa'ataua'iga (DOC), ae ua fa'ailoa atu e le ali'i o lo'o avea ma latou ta'ita'i e 'aua lava le popole, e le o mafai e le Malo ona faia se fa'ai'uga ia i latou e tusa ma latou si'itaga o pasese e feoa'i i a latou ta'avale laiti la'u pasese.

 

O Me i le aso muamua na amata ai ona si'itia pasese a lea fale ta'avale - TOA Taxi Stand - peita'i, i ala o le tulafono o lo'o i ai le Komiti Faafoe fa'apitoa a le malo, o i latou na e mafaia ona si'itia pasese o femalaga'iga a le mamalu lautele i pasi ma ta'avale laiti la'u pasese.

 

Ua mae'a fa'alauiloa i nisi tala tusia i le lomiga Samoa News Me 6, nei lapata'iga uma i le mamalu lautele o lo'o feoa'i i so'o se ta'avale laititi la'u pasese, e leai se suiga o i ai, ma e tatau fo'i ona latou lipotia mai i le DOC pe afai ua taumafai nisi o fai pisinisi ta'avale laiti laupasese e si'itia le totogi o pasese.

 

I le aso Lu o lenei vaiaso, na toe lipotia mai ai e se tasi na malaga i le ta'avale la'upasese mai le TOA, o lo'o tumau pea lava le si'itaga o pasese a le latou Pisinisi o Ta'avale Laiti La'u Pasese.

 

O le susuga Uili Le'auanae mai le DOC na fa’ailoa i le Samoa News, ua mae'a ona se'ia le laisene o le Pisinisi Taxi a le TOA mo le 120 aso, ma o lo ua fa'atulaga fo'i ma le fonotaga fa'apitoa ia Setema 3 ona o lenei mataupu.

 

Ua ma'ea ona fa'ao'o le tusi i le TOA Taxi, ua se’ia lona laisene pisinisi ma le aso o le fonotaga fa’apitoa e finau ai lenei matapu.

 

Na fa’afeso’ota’i e le Samoa News le TOA Taxi Stand i le itula e 3:30 i le afiafi o le aso Tofi, ae na tali mai lava le Talitelefoni lea e totogi e le TOA, sa ia fa'ailoa mai, e le o taofia lava le matou pisinisi e le'i o'o mai se tasi ma se tusi e taofia ai le matou pisinisi. Sa taumafai fo'i e talanoa atu i le susuga Emmanuel Ulberg o le TOA, le peresetene ma le taitaifono fo'i o lea pisinisi o le TOA, ae le'i talia maia lana telefoni.

 

I le taimi nei, afai e te mana'omia tele ona fa'ailoa mai lau fa'asea, ua vala'au oe ina ia fa'amau lou suafa moni ma a outou malaga i aso na faia ai ma le mamao na e malaga ai i le taavale la'u pasese, ma le pasese na manatu lea ave ta'avale e te totogia. Fa'amau mai le numera o le ta'avale o lo'o e malaga ai. Ia tuuina atu nei fa’amaumauga i le DOC.

 

Ua talanoa le tusitala al e Samoa News i nisi o sui ave ta'avale La'upasese laiti ma ua fesiligia i so latou iloa e tusa o lea mataupu. Ua fa'ailoa mai se finagalo o se tasi e faia lana pisinisi taxi i Nuuuli ma ia fai mai, "Ua tasi'i uma lava totogi o Inisiua o Ta'avale La'u Pasese i le tausaga atoa, ua si'itia fo'i ma le totogi o laisene o ta'avale La'u Pasese i le OMV, ae a o'o mai la i Taxi ua le si'itia totogi, aua ua mae'a ona fa'amalosia lava le $1 mo pasi i so'o se mea e oso atu ai le tagata matua. E le'i faia lava se suiga i totogi o Taavale Laiti talu mai lenei umi o tausaga. Ua si'isi'i fo'i le totogi o le Suau'u ma Oloa tau suau'u e aofia ai le Kesi o Ta'avale. Ua tatau ona si'itia le totogi o ta'avale la'u Pasese Laiti."

 

Fa'ailoa atu loa e le tusitala, "Ua e iloa lau pasese lea e ave i le taimi nei, e le'i si'ia lava sona totogi mai le taimi na amata ai ona faigaluega e o'o mai lava i le taimi nei. Afai foi la o lo'o te'ena e le Malo le fa'auia mai o le Totogi o Fa'atulaga ai Si'itaga o tagata faigaluega a isi uma setete ma Teritori, aisea o le a si'i ai e le Malo ala o feoa'iga. E fa'apefea ona fa'apaleni e oe le fua fa'atautau lena o le totogi mo feoa'iga e malaga ai le tagata faigaluega e galue ma sili lona totogi maulalo o i ai, si'i atu ma tau o mea'ai e pei ona i ai nei, ma le totogi o le pilisuavai ma le eletise ua si'itia fo'i, ae toe si'i ai ma le totogi o lana taumafai e oo i le galuega. O lo'o i ai lava ta'ita'i tau le tamaoaiga, o lo'o latou fuaina lea tulaga i le DOC, ala lena o lo'o taofia ai le totogi o ta'avale la'u pasese laiti, ua fa'aaogaina tele outou i taimi o le afiafi ma le po, atoa ai ma le aso Sa e foa'i ai tgata lautele."