Ads by Google Ads by Google

Tala I Vaifanua


O le va'aiga ia Stephanie Floor ua taua'aoina i ai lona fa'ailoga o le Most Improved in Wrestling i le Iunivesite o Gannon i le faaiuga o lenei tausaga a'oga. [ata foa'i]

FA'AMAU FA'AILOGA TAUMAFAI STEPHANIE FLOOR - PI'IGA GANNON UNIVERSITY

 

O le taumafai a le tama'ita'i o Stephanie Floor i ta'aloga Pi'i o lo'o tauva ai i le Iunivesite o Gannon, ua ia umia ai nei le Fa'ailoga Most Improved Female Wrestler ma sa taua'aoina ia te ia lea fa'ailoga e lana Faiaoga Pi'i o Dierken.

 

Ua fa'ailoa mai, o le filifiliga o ia e mauaina lea fa'ailoga na faia lea e le Au Pi'i ma o latou Faufautua ma Faia'oga a lea Iunivesite ma ua fa'ailoa mai le fiafia tele o Floor, ina ua ia mauaina se fa'aloga faapenei i lana taumafaiga.

 

Sa ia fa'ailoa mai, "Poo le a lava le faigata, ae ou fa'afetai tele ua mafai ona ou mauaina lea fa'ailoga. O lea fo'i fa'ato'a amata le taumafaiga i le Pi'iga iinei, ae le fo'i ai le naunau e fia fai mea sili e ta'ua ai le atunu'u pele o Amerika Samoa i se taumafaiga. O lea ua mae'a fo'i la lenei tausaga aoga, ae  taumafai mo se MVP ma fa'aleleia atili o'u togi ia lelei fo'i le GPA e tauva ai i lenei tausaga."

 

O lo'o tele lava isi ta'aloga sa tauva ai Floor e aofia ai ta'aloga o le U-17 Womens Handball Team a Amerika Samoa sa ia mauaina ai le 2016 MVP, ua ia umia fo'i le 2015 FFAS Summer Youth League Girls MVP, ma le 2018 American Samoa National Women's Beach Handball Team MVP & le fa'ailoga Top Female Player i lena lava tausaga.

 

Lea ua fa'aauau nei ona tauva i le ta'aloga Pi'i, ma ua va'aia fo'i lona ola tauva e le o mafai lava ona fa'avaivai, ua ia fa'atuina fo'i sana sini, ae mautinoa lava e le mafai ona fa'atamala ai o ia i lona ausia lea. O lo'o momoli mai ona alofa'aga i si ona tina matua i Iliili ma lona tama Carl Floor Sr., ma ana uo uma lava i Leone High lea sa ia umia ai le togisilia i le vasega fa'au'u o le tausaga 2018.

 

LITAEA LAULUSA ROY LAULU - OFISA O VA'AI TAU

 

O le aso Gafua na te'a nei, Me 13, 2019 na fa'amavae aloa'ia ai le susuga Laulusa Roy Laulu ua litaea mai lana galuega i le Ofisa o le Va'ai Tau i Tafuna. I lea aso sa faia se latou fa'amavaega ma lona Ofisa i lona tama'ita'i pule Elenior Lutu McMoore ma nisi o le aufaigaluega.

 

I lea fo'i fa'amavaega ma lea tama ua loa fo'i ona tautua i lea Ofisa o le NOAA a le Malo tele, sa taua'aoina ai se fa'ailoga fa'apitoa e taualoa ai lana tautua ma ua fa'ailoa mai ai lona sao i le vaitau na tupu ai le Galulolo i le atunu'u ia Setema 29, 2009. Ua le gata i lea ae ua toe fa'afetaia fo'i o ia i lona mataala i lana auaunaga i le vaitau o le Afa o Gita ia Fepuari 2018. O nei fa'alavelave fa'afuase'i fa'anatura sa tiute ai lenei tama ma ia fa'ailoa fo'i aluga o suiga matuia o le tau.

 

O le fa'afetai fa'apitoa ua tusia i lea fa'ailoga ua sainia lea e le Deputy Director National WEather Station, Pacific Region.

 

Ina ua fesiligia le tama i sana galuega o le a faia i lenei vaitau ua malolo mai galuega e masani ona tiute po ai, ae fa'ailoa mai e ia, "O le u'umi o itula i le galuega, ona o le naunau i le saogalemu o le atunuu, ae ua le ano fo'i i le matata fa'atama, o le va'aiga lelei o le aiga, lea la ua mae'a le auaunaga mo le atunu'u atoa, ua tatau ona faliu e matua va'ai le lotoifale o le aiga, ae maise le tina ma le fanau."

 

O se meaalofa sili fo'i lea ua mafai ona maua e le faletua, ina ua taua'aoina aloa'ia le lea fa'amau fa'ailoga o le tautua a le tama o le aiga, ma ua fa'afiafiaina lona loto. Sa auai fa'atasi i la'ua ma Laulusa i le taimi na faia ai le fiafia mo le fa'amavaega.

 

ROBERT "UTI" GEBAUER - OFISA REFIT, VOLENITIA KOLUSE MUMU AMERIKA SAMOA

 

Ua fa'atula'ia se tofiga fou a le Koluse Mumu Amerika Samoa ua fa'aigoaina o le REFIT Officer, ua nafa ma tulaga tau le tupe, fanua ma fa'amaumauga, ma ua tofia sa'o mai lea tofiga e le Kolise Mumu i San Diego, ina ua mae'a fa'aulu atu le pepa talosaga a le susuga Robert Uti Gebauer e avea ai ma Volenitia i le Koluse Mumu.

 

O ona tiute i lea galuega fou, e fesoasoani lea e fa'aleleia atili ala o feso'ota'iga a le Koluse Mumu ma isi matagaluega po'o vaega o tautua eseese e ono mana'omia ona galulue feso'ota'i ma le Koluse Mumu i taimi e lofia ai nisi i puapuga fa'anatura po'o a'afiaga fa'aterarisi.

 

Ua le gata i lea ae ua fesoasoani malosi i le Ofisa i le fa'afeso'otaiga o nisi e avea ma Volenitia, fa'aleleia o ni mea fa'aletonu i feso'ota'iga tau tomai mo'omia e volenitia e fa'atautaia ai latou galuega mo le Koluse Mumu.

 

I se talanoaga ma le susuga Gebauer ua ia fa'ailoa ai, "O a'u ou te naunau ia faia galuega o so'o se ituaiga ina ia tautuaina le atunu'u, ma ua le gata ai ina tofia mai a'u e avea ma REFIT Officer a le Koluse Mumu i Amerika Samoa, ae o lo'o i ai lava fo'i la'u pisinisi o lo'o fa'atautaia i le taimi nei, e matele ai ina ou malaga atu i isi teritori o le Iunaite Setete e faatautaia."

 

O Gebauer, o lo'o avea o ia ma se tasi e faufautua i Pisinisi tau atina'e e fa'afeso'ota'ia ni ala e fesoasoani i pisinisi laiti e fa'aleleia ai latou tautua mo le lautele i ituaiga o pisinisi o latou fa'atautaia.

 

O lo'o nafa Gebauer ma le vasega o tupe toina mai le Malo tele, e atofaina lea mo isi fo'i teritori o le malo tele, ma ua ia fa'ailoa mai fo'i, "O lea fa'ato'a mae'a atu lava le isi poloketi sa ou galue ai mo le Ministry of Health a le motu o Majuro, i le Atu Malesala. E silia ma le 2 tausaga le taimi atoa na fa'atautaia ai lea polokalama, lea sa fa'atalosagaina mai e le Pacific Island Health Officers Organization."

 

"E ese mai lena galuega, ae ua  fa'afa ai lea ona ou alu ma toe taliu mai i Micronesia, ona sa ou taumafai ina ia a'oa'oina lelei i latou o lo'o talosagaina Tupe mai le Malo Tele, i ala e fa'aaoga tatau ai ma ia fa'amaumauina a'ia'i nei vaega tupe ina ia pasia lelei ma fa'aauau ai isi fa'atupega mulimuli o poloketi lava nei ua toe soso'o ma fa'alautele galuega."

 

E lua fo'i tausaga o ia fa'asoloa ituaiga aoaoga nei tau Grants Management Consultant i Majuro, RMI ma ua fa'afeso'ota'ia fo'i ma ituaiga a'oa'oga tau tomai e mana'omia faapitoa mo nei galuega ia fa'ataunu'u lelei mea uma, mo le Ministry of Health i Pohnpei, FSM.