AMATALIA TAUVAGA FAGOTA FA'AVAOMALO "I'A LAPO'A VAIASO FOU

O le aso ananafi na tatala ai le lesitala i le tauvaga a le Pago Pago Game Fishing Tournament lea e faia ia Me 6 -11.

O lenei tauvaga ua fa'atulaga mo i latou e fagota mai Samoa, Amerika Samoa, Tonga, Fiti, Hawaii, Niu Sila ma isi atunuu.

Ua fa'ailoa l fa'afetai tele a le Pago Pago Game Fishing Association i le vasega o Pisinisi ma Matagaluega o le malo o lo'o avea ma latou pa'aga i lenei tausaga.

A maea le lesitala ona faia lea o se sauniga e tatala ai le tauvaga. Ona soso'o loa lea ma le tauvaga fa'apitoa e fagota mai ai le I'a Lapo'a e Tautai Fagota. Peita'i o le aso 8 Me, ua fa'atulaga mo le vasega o tamaitai ma Fanau talavou, ae o'o loa fo'i i le aso 9 Me, ua toe tatala fo'i mo fagotaga o le I'a Lapo'a, ma fa'amauina ai loa le tauvaga i le aso 11 Me, e fa'amae'a ai mea uma.

I tausaga taitasi, o le to'atele lava o tautai matapalapala mai so'o se atunu'u o le vasa pasefika e latou te mataituina lea tauvaga ma lona vaitau e amatalia ai.

MAE'A SUE'A TUSI A LE AMERICAN SAMOA LEGAL AID

Ua fa'ailoa mai le pasia o teugatusi a le American Samoa Legal Aid (ASLA), po'o le Ofisa o le Loia mo tagata Lautele lea e i Pago Pago, ma ua fa'ailoa mai ia i latou, "Ua lelei mea uma, o lo'o fa'aalia fo'i teugatusi o lo ua agatonu mo le pasiga a le Deloitte & Touche,” le kamupani suetusi sa latou sailia lo latou agavaa i le tausaga fa'aletupe ua te'a nei.

O le susuga le Fa'atonusili Fainuulelei Ala'ilima Utu sa ia fa'ailoa maia lona fiafia tele, ona o lea tulaga. O le kamupani e latou te fa'avasega ma saunia tusi uma a le ASLA, May & Associates.

"Ua iloga mai o lo'o faia lava le tautua ma le fa'amaoni, ma e le vale lava fo'i se tali mai i taimi e sailiilia ai le agavaa ma le fa'atautaiga o galuega na feagai ai ma lena tausaga atoa ua tuana'i,” o se tala lea a le ali'i Fa'atonusili.

O Tausaga uma ua mae'a sailia nei e afua mai le 2015 se'ia pa'ia mai le 2018.

“O le tausaga 2018, ua atili ona fa'ateleina le seleni toina mai mo galuega fa'atino, ma sa latou toe iloiloa nisi o mataupu ua fai si leva o ta'atia, ma faia nisi o sailiiliga mo le aotelega e 889 talosaga e aofi ai ma le 261 mataupu na fa'atalanoaina muamua e le FEMA ina ua latou o'o mai e fesoasoani mo aiga, pisinisi ma le malo ina ua laveia i tatou i le Afa o Gita.

"O le fa'aiuga ua iloga mai i lenei lipoti, ua agava'a le ASLA e fa'atulaga, fa'agaoioia ma toe fa'avasega a latou teugatusi i so'o se taimi o latou fa'atino ai tautua mo le mamalu lautele o le atunu'u,” o se tala lea a Alailima-Utu.

"E matua aoga lava le tautua a le ASLA ia Amerika Samoa ma na tagata e le lava le tamaoaiga tausi, aua e taugata tele loia i le taimi nei.”

AGAVA'A AMERIKA SAMOA MO LE $154,000 GALUEGA O LE VAI

Ua agava'a Amerika Samoa mo le vaega tupe e $154,000 mo galuega o le suavai taumafa, lea e faamatu'u mai e le ASEPA.

O le fa'atupega le mai le tinoitupe e $87miliona mai le USEPA ina ia fesoasoani atili ai i Setete, afio'aga ma teritori ina ia fa'aleleia atili le suavai taumafa i o latou lotoifale.

“Ua faia pea lava le galuega ma le tiute o le USEPA, ina ia mautinoa lava ua fa'aleleia le tulaga mama pea o le Suavai Taumafa o le atunu'u, lea o lo'o nafa nei ma le ASPA,” o se tala lea a le EPS Administrator Andrew Wheeler.

"O le alagatupe lenei, ua avea ma fa'ailoga taua, o le fa'aauau pea e le USEPA ona faia o latou tiute ina ia mataituina le tulaga mama lelei o le Suavai ua ta'ia atu i Maota o le teritori o Amerika Samoa, ma ua fa'ailo o le Suavai Taumafa Mama. Ia mautinoa a'ia'i ua leai ni siama e ono fa'ao'o atu ai ni gasegase pepesi, gasegase tumau, i le lautele o le atunu'u."

O le vaega lea o le auaunaga a le USEPA ua fa'ailo fa'alaua'itele o le Water Infrstructure Improvements for the Nation [WIIN].

TUFATUFAINA PA'U MO FEUSIA'IGA, E LE TOTOGIA - TA'ALOGA A LE PASEFIKA

I se lipoti mai Samoa, ua fa’ailoa ai e fa’apea, ina ia mautinoa e saogalemu le to'atele o le a soloa'i atu i Samoa mo Ta'aloga a le Pasefika ia Iulai 2019, ua mae'a pasia e le Matagaluega o le Soifua Maloloina a Samoa, e ao ina maua le avanoa o i latou uma e mana'omia "pa'u mo feusua'iga" e aunoa ma se totogi.

E le gata i lea, ae o le a mafai ona maua i so'o se nofoaga, ia va'aia ma pikia ai e i latou o mana'omia lea ituaiga o puipuiga.

"E le fa'apea o le a va'aia ma maua e le to'atele ona o ai lea e fa'aaoga, pe taumafai e fa'aaoga, e leai, ua na'o se ala o le puipuiga o le soifua maloloina, e fautuaina ai i latou uma e fa'amasani ina ia fa'aaogaina i taimi e mana'omia ai, ae le fa'aalu ai se tupe,” o se tasi lea o manatu fa'aalia, Dr Talalelei Tuitama, i le polokalama fa'asalalau fa'alauaitele ua mae'a fa'alauiloa i Samoa ma atunu'u uma o avatua a latou au ta'a'alo i lea tauaofiaga.

Ua fa'ailoa mai fo'i i se tasi o ana saunoaga, "O le naunauta'iga o le Matagaluega o le Soifua Maloloina a Samoa, ina ia le a'afia se tasi o 'au ta'a'alo ina ua le saogalemu i tulaga o feusua'iga, ma o le a tu'ua'ia ai fo'i le puipuigamalu a le taligamalo. Ua manatu ina ia faia lava tiute uma e ao ina fa'amautu muamua, a'o le soifua faitalia o le tagata latou ia e le ave'esea e nei taumafaiga uma."

I le taimi nei ua mae'a fa'atulaga oka o nei pa'u mo feusua'iga i le 1,000 pusa ua tapena i ai le taligamalo, e fa'aaogaina tonu i vaitau o ta'aloga nei. O fea lava o le a alaalata'i ai 'au ta'a'alo mai atunu'u ta'itasi o le a auai, e fa'apena lava ona i ai uma pusa o nei pa'u e fa'ailo fo'i lea tulaga, ina ia o'o uma i ai i latou, pe a mana'omia.

Ua fautuaina fo'i le mamalu o atunu'u ta'itasi, pe afai o le a i ai ma i latou ua mae'a suia lo latou ituaiga, e ao lava ina fa'aaogaina nei pa'u mo feusua'iga. Pe afai fo'i e le fa'aaogaina nei pa'u e sui uma o le a malaga mai mo ta'aloga ma maimoa i ta'aloga pe tapua'ia fo'i faiva i malae o latou fanau, e tufatufaina pea nei pa'u, aua o le matafaioi e ai ona fa'atino e le matagaluega o le Soifua Maloloina a Samoa a'o avea ma malo talimalo.