Ads by Google Ads by Google

Mataina le Tautua Pfc. Washington Pou Ameperosa - Air Defense


PFC Washington Pou Ameperosa - Air Defense 94th Army Air Missile Defense Command - Joint Base Pearl Habor-Hickram Honolulu Hawaii. [ata: foa'i]
Tala I Vaifanua

O se tasi o alo o Amerika Samoa o lo'o tautua i le Air Defense Unit a le 94th Army Air Missile Defense Command i Hawaii, PFC Washington Pou Ameperosa ua fa'ailoa le fiafia tele o i latou o lo'o avea ma ta'ita'i i lea vaega o le Vaega Au, ona o lana tautua matavela.

 

"E fa'aaloalo le ali'i fitafita lea, fa'alogo ma mataalia e fa'atino ona tiute i taimi uma. E tele ni mea lelei e maua e lea ituaiga o ali'i talavou i lona ola fa'aaloalo fa'alogo i e ta'ita'i ma tautua lelei,” o se tala lea a Sgt Alex Hilstro, se tasi e va'aia lea vaega i le Joint Base Pearl Harbor-Hickam i Hawaii.

 

O Ameperosa e sau mai o Lauli'i, ma lona tina o Michelle Schwenke, ua fa'afiafiaina o ia, ona ua le ta'uta'ua si ana tama i se isi lava mea, a'o lona ola fa'aaloalo ma tautua ma le usiusita'i i ona pule, o se mea e tatau ona faia e le fanau ua mae'a a'oa'oina lelei i lona aiga ma lana aganu'u o le fa'aaloalo i tagata matutua ma e pule.

 

O lo'o soifua mai pea nai ona matua matutua i Lauli'i, o i la'ua o lo’o avea ma Fa'afeagaiga i le afio'aga ma ua silia ma le 20 tausaga o galulue ai pea i lea afio'aga - Rev. Elder Siitupe Peko ma Suafa'asisina Peko.

 

O ia fo'i o le ulumatua o le fanauga e to'atolu  ma e fiafia tele o ia e tausi ma va'ai nai ona tei laiti. Na amata mai lona olaga e fiafia tele e ta'alo Lakapi, Volleyball ma e to'aga tele e auai i sauniga a le Ekalesia, o le a'oa'oga lea sa fa'atonuina ai e ona matua matutua, "Ia le galo le Atua e fa'amuamua i mea uma o le olaga.”

 

Ua fa'aalia e ia, "O lo'u tina matua lava e fa'atonuina a'u ia oso tatau i so'o se mea e fai, po'o mea e fa'atino mo le Ekalesia pe o mea fa'aleaiga po'o le nu'u fo'i. Ia iloa le tulaga e tu ai i taimi o fe'au e mana'omia ai le malosi ma le vave ona fa'atino."

 

"O lo'u tina ou te va'aia lava e matele ina fesoasoani lava so'o se tasi e i ai le mana'omia i le matou ekalesia ma le nu'u, o nisi fo'i e tau leiloa lava e ia po'o ai e ofo atu lava lona a'ao fesoasoani i le to'atele o i latou."

 

Na a'oa'oina o ia i KananaFou ma fa'au'u mai i Kanana Fou High i le 2015. Ulufale lea i le Kolisi Tu'ufa'atasi o Amerika Samoa, ma maua ai lona fa'ailoga o le AA i le Criminal Justice i le 2017.

 

Ina ua mae'a umia le fa'ailoga, sa ia manatu e sailia se auala e mafai ai ona fa'alautele lona iloa i le Iunaite Setete, ma ulufale loa US Army.

 

"Ina ua filifili e sailiili se mea e aoga ai i Matua ma aiga ae maise o le Ekalesia ma le malo na ola a'e ai, na ou iloa lava e tele na'ua avanoa i le Army mo na mana'oga, e le o 'asa lava, ua tele se aoga o le Vaega A'u mo a'u ma lo'u aiga,” o sana tala lea.

 

O Ameperosa o le ulua'i fitafita lea ua tula'i mai lea aiga, ma ua ia manatu tele, ia avea o ia ma se fa'ata'ita'iga lelei i nai ona tei laiti e to'alua, ma ia tausia ona matua.

 

E tusa lava pe ua ese le nofoaga ua i ai nei le olaga o Ameperosa, ae le o taofia ai lana tu ma le aga sa a'oa'oina ai o ia e ona matua a'o soifua i Samoa, e fa'aauau lava ona auai i mea e fai a lona aiga, ae maise o le alu i le Lotu i aso Sa uma, e le misia ia te ia fa'atasiga a le Autalavou a le Ekalesia o auai i Hawaii, ma e fa'amasani ma fa'auo gofie i so'o se tasi i le galuega ma lana ekalesia a le One Mission Church i Hawaii.

 

"Pe afai lava e fa'atino ni fa'atasiga a le Ekalesia, e matele lava ina ou auai, pe afai o lo'o talafeagai ma taimi o malolo mai ai i tiute fa'alegaluega. E tatau lava ona fa'amasani e fa'aauau le tautua ua mae'a a'oa'oina ai e nai o'u matua a'u e faia,” o se fa'asoa mai lea a Ameperosa.