Ads by Google Ads by Google

Tala I Vaifanua


[ata: foa'i]

SUIGA DONGWON ENTERPRISES & STARKIST LONA OFISA ULU

 

O le susuga Kim Jae-chul, o se tasi ua iloga ona tulaga a'ao i Kamupani I'a, ua faia le fa'aiuga o le a tu'ua e ia lona tofiga Taiulu po'o le Peresetene sa galue ai i le Dongwon Enterprise i Korea i Saute,  o le kamupani fo'i lea ua latou mae'a fa'atauina le StarKist Co., e aofia ai ma le StarKist Samoa.

 

O le fa'aiuga a Kim 84 tusaga le matua, ua fa'ailoa mai e nisi o le pulega, e ao lava ona avea ma faufautua malosi i lona atali'i, Kim Nam-jung, 46 tausaga le matua lea ua fa'aeaina nei i lea tofiga taua i le Dongwon.

 

E le fou fo'i le atali'i ia Kim Nam-jung i lea tofiga, sa avea fo'i o ia ma sui peresetene i le Dongwon Enterprise.

 

O le atoaga o le 50 tausaga o le Dongwon Enterprises lea sa faia ai lenei fa'alauiloaga i lona tu'ua o le tofiga peresetene ae tu'u atu atoa le fa'atuatuaga i le tupulaga talavou, aua ua talafeagai fo'i o latou tomai ma lenei vaitau o talutalufou ua faatautaia ai pisinisi ma fefaatauaiga.

 

2 AMERIKA SAMOA FA'ASIKOLASIPI - AVANOA MAIKOMISI O FAIGAFAIVA

 

E to'alua tama'ita'i Amerika Samoa ua maua sikolasipi a le Komisi o Faigafaiva ma le Gataifale (Council) e totogia ai la'ua pili uma e a'o'oga ai i le Iunivesite o Hawaii - Hilo mo le lua tausaga e sailia ai la'ua Bachelors of Marine Science.

 

O nei tama'ita'i ua fa'amanuiaina e to'atasi na fa'au'u mai le Manu'atele,  Alphina Sifaleula Liusamoa, alo e fa'asino i le susuga Porotesano ma Puaolagi Liusamoa, ma le tama'ita'i o Fuamai Ativalu Tago, alo e fa'asino ia Ativalu Ativalu Tago Jr.ma le faletua o Tipesa Siaosi Tago o Nuuuli, na fa'au'u mai fo'i i le Nuuuli VocTech High.

 

I se talanoaga vavalalata a matua, le fanau fa'asikolasipi ma le susuga le Fa'atonu o le DMWR, Va'amua Henry Sesepasara fa'apea ma le sui o le Council Nate Ilaoa, na fa'ailoa ai mea o le a fa'amamafa ina ia tautuana ma i la'ua ua pale i lenei fa'atupega mo fa'ailoga maualuluga mai leKomisi o Faigafaiva ma le Gataifale.

 

"E taua tele le lua silafia e matua leai lava se lua pili e toe totogia pe a maea mai le lua tausaga ae ua maua fo'i lua fa'ailoga Bachelors. E totogia uma lava e le Komisi o Faigafaiva & le Gataifale. Peita'i e ao ina ausia e oulua togi ua fa'atulaga, aua lava ne'i misia. Afai e mae'a lea lua tausaga, e tatau ona lua toe fo'i mai i Amerika Samoa ma galue ai mo le lua tausaga e tauia ai lena fa'atupega. O lona uiga e le tau sailia ni lua avanoa faigaluega, e uma mai lua fa'ailoga na, ua saunia atu le avanoa faigaluega ma le totogi lelei e te lua galulue ai."

 

"A uma le lua tausaga, e mafai ona lua toe apalai mo se isi avanoa e fa'aauau ai le sailiga o le Masters i le Marine Science lava po'o isi Kosi tau le Gataifale ma Fagotaga. A mae'a fo'i lena avanoa pe a lua toe maua, ona toe taliu mai fo'i lea e faigaluega mo le isi lua tausaga."

 

"O le tausaga nei, ua pasia ai i le fonotaga o lea fa'aauau lea avanoa i le tausailiga o le Doctorate, ma e mafai ona mae'a le lua tausaga pe a maua le Masters, ona talosaga lea i se isi avanoa e maua ai le fa'ailoga Doctorate."

 

Ua o'o lava i le totogia o le nofoaga e alaala ai nei sui ua totogia e le sikolasipi lea, fa'atasi ai ma 'aiga, totogi o tusi a'oga, totogi o le a'oga, ma le pasese e malaga ai nei i lenei tausaga, ma toe taliu mai pe a mae'a le kosi i le lua tausaga o lumana'i, ua taua'aoina fo'i lona fa'ailoga Bachelors.

 

E mafai ona nonofo i potu o le Iunivesite, ua mafai fo'i ona alaala i la'ua i so la'ua lava fale e ese mai le Iunivesite. O i la'ua nei ole a malaga, e fa'au'u mai le ASCC ma la'ua fa'ailoga ASCC in Marine Science ia Me 17, 2019, ae tu'ua le atunuu ma aiga ia Me 27. Ia manuia o oulua faiva.

 

GALUEGA TOE FA'ALELEIA LEE AUDITORIUM AO LOMA FONO IA IULAI:

 

Ua faailoa mai o lo'o loma le fonotaga tele e tauaofia mai i le tatou malo ia Iulai, a ta'ita'i o malo o motu Polenisia Polenisia (Polynesian Leaders Group), ae o le tatou Maota o lo'o ua fa'atulaga e fa'atautaia ai lea fonotaga o le Gov. Rex Lee Auditorium, lea o lo’o tapunia aloaia mo ona galuega toe fa'aleleia.

 

E aofia i mea e ao ina toe fa'aleleia, o le Ea malulu, o le Taualuga ua matua tulu'ia lava, o lona fa'alo fo'i ua sosolo mai ai le limu ma ua iloga mai ua palapala, o ona pupuni ma i luga o le fata ae maise o pupuni tetele uma o fa'amalamama faitoto'a o lea lava maota.

 

O le tala mai, e le'i faia lava se tauofoga amata mo lenei galuega, ona e le'i fa'ao'o maia e le Matagaluega o Galuega se tau fa'atatau, aemasie fo'i o mea patino e ao ina fa'aleleia o le Maota e mafai ona fa'atulaga mai i ai le tau o le galuega mo tauofoga a kamupani faufale.

 

E ui ina ua taofia mea o lo'o fa'atino i totonu o le Fale Laumei, ae o lo'o fa'aaogaina le isi itu e le Maota o Sui mo a latou galuega.

 

Ona ua tulata le taimi e ao ina mae'a ai le toe fa'afouga o lea Maota tele, ua le fa'atalia ai le DOC i se tau fa'atatau mai le Matagaluega o Galuega Lautele, peita'i ua amata ona latou va'ai patino i vaega ta'itasi o le galuega, ma fa'avasega ai le tauofoga mo le galuega toe faaleleia o le Lee Auditorium.

 

"O le vaiaso fou lea una'ia lava e alu atu ai le fa'asalalauga o le galuega lenei, ae ua vaevaeina i ona vaega eseese. Ua fai ese le tauofoga o Pupuni o Fa'amalama ma le Fata i luga, ua fai ese fo'i le tauofoga o le faaleleia o le Taualuga, ae maise le tauofoga o le Ea Malulu ma le  tapenaga o Mea fa'aleotele Leo ma Moli,” o se tala aloa'ia lea mai le Ofisa o le DOC.

 

O le galuega toe fa'aleleia o le Fale Laumei, e le'i faigofie ona maua mai ma e le'i i ai fo'i se fa'atagaga e toe fa'aleleia ai le Maota lea i sona vaega tupe na toina mai. Pau le mea sa fa'atagaina ona totogia ai, o lona galuega fa'amama ma ia mautinoa o tumau lona lelei o le fale ma lona anofale.

 

Peita'i ua loa tausaga, ma ua va'aia le toe faaletonu ua i ai,ma e ao ina fa'aleleia ae maise ai lava o Laina o Mea fa'aleotele Leo, laina o Moli, Pupuni o Fa'amalamama ma le Fata, ae maise o lona taualuga. Lea la ua toe fa'amatu'u mai ai le isi avanoa e toe faaleleia ai lenei maota aoga tele o le atunu'u.

 

O le tausaga ua te’a sa filifilia ai Amerika Samoa e tauaofia ai le fonotaga a taitai o malo o motu Polenisia.