Ads by Google Ads by Google

Tala I Vaifanua


O le aumalaga na masi'i mai a le fa'auluuluga o le Faletupe a le PenFed Credit Union i Virginia Washington DC lea ua latou tu'u avanoa fo'i mo le afioga le Sui o Amerika Samoa i le Konekeresi mo sana fa'amalosi'au i le latou fa'amoemoe ina ia tautuaina tagata uma o Amerika Samoa i le lumana'i ele o toe mamao. Sa fonference Room i le afiafi o le aso Tofi. [ata: Leua Aiono Frost]

PEN-FED CREDIT UNION - FALETUPE UA MANATU E FA'ATU IINEI

 

O le vaiaso ua te’a sa asiasi mai le ali'i Peresetene/CEO o le Pentagon Federal Credit Union (PenFED) i le teritori, fetaui ma le sisigafua 2019.

 

“Ona o le matauina o le to'atele o alo o Amerika Samoa olo'o ulufale i le Vaega Au, lea ua tulaga muamua ai lenei teritori matagofie o Amerika i le aotelega o i latou e ulufale i lea tausaga ma lea tausaga, ua manatu ai i matou e asiasi mai ma se'i va'ai i le teritori ma ona tagata, ae maise lana aganu'u matagofie,” o se saunoaga lea a le ali'i Peresetene/CEO o le PenFed, James Schenck mai McLean, Virginia.

 

E le gata i lea, a'o le'i avea o ia ma CEO, le taimi a'o avea o ia ma pule i le fa'agaoioiga atoa o le faletupe lea, sa ia mauaina ai le tusi mai se tasi o atali'i o Amerika Samoa ua iloga lana tautua i le Vaega Au fa'apea ma le FEMA, ua ia fa'afesiligia ai le pulega o le Pen Fed, "Aisea lava ua outou le manatu ai e fa'atuina se lala i Amerika Samoa, le teritori e le to'atele ona tagata e pei o se isi lava a'ai o Amerika atoa, ae sili ona to'atele ana tama fanau ua tauto e tau'avea tofi fa'afitafita aua le puipuiga o le Iunaite Setete o Amerika?"

 

O le sui lea, i le taimi na ia tusia ai lea tusi ma fa'ailoa atu lona fanoga, a'o avea o ia ma se fa'atonu sili o se tasi o matagaluega o le Malo o Amerika Samoa.

 

Aisea ua avea ai lenei tausaga ma taimi e asiasi mai ai le pulega a le faletupe? O le tali a Schenck, "Ona ua atoa nei le lima tausaga i le tofi Peresetene/CEO, ae o lo'o tata'i pea lona mafaufau i le tusi na ia faitauina. O fa'amaumauga taua o lo'o fa'ailo atu ai, ua ia sailia e moni lelei.”

 

Sa malaga mai ma le sui peresitene ia S. Jamie Gayton.

 

I lana folasaga i le ituaiga tautua e ofoina mai e le PenFed. "E matou te le manatu ina ia totogia le matou tautua o le teuina o au tupe. E mana'omia ona matua itiiti lava se totogi mo sau nogatupe, ae fa'atele mai se pasene e fa'aopoopo i au teugatupe."

 

"O teugatupe uma ua mae'a fa'ainisiuaina aua o le PenFed Credit Union o le faletupe a le Malo tele, e silia ma le $200Piliona ana Aseta."

 

Ua i ai lala o le Pen Fed i Hawaii, Guam ma isi vaega o le lalolagi. O le fuafuaga ua mae'a aiaia, o le a muamua lava tautuaina le mamalu ole atunu'u e ala i Masini Tupe ATMs. E tatau lava ona muamua fa'atu ATM i le AFES po'o le PX, fa'apea fo'i ma le US Army Reserve Center.

 

I le taimi nei, ua fa'aulu loa ma le fa'aiuga a le aumalaga a lona fa'auluuluga, o le a mua'i fa'atutuina ATMs e tautuaina Amerika Samoa, ae ua fa'aauau ona sailia se nofoaga lelei mo se lala ole Pen Fed i Amerika Samoa, e ao ina tatala ai ona faitoto'a i le fa'aiuga o lenei tausaga, po'o le amataga fo'i ole 2020 pe a tuai lava.

 

SAUNOAGA FA'APITOA - REAR ADMIRAL KEVIN LUNDAY & SISIGAFU'A 2019

 

Ina ua tu'uina le avanoa matagofie mo le sui ole Malo Tele e faaleo ai sana tima'iga i le Sisigafu'a 2019, sa fa'aleo e Rear Admieral Kevin Lunday o le US Coast Guard mai Honolulu, le fa'afetai i tama fanau a Amerika Samoa o lo'o lalamua ai le igoa o Amerika Samoa i le tautua i vaega au. O le fa'amoemoe fo'i o Amerika Samoa e fa'ataua ai ana Tupulaga Talavou i le sisigafu'a ua atili ai ona fa'afiafiaina o ia.

 

"O le fa'aeaea a Amerika Samoa i ona tupulaga, ua iloga ai ona fa'afiafiaina ana tama fanau uma e tautua ma le loto, faia ma le fa'amaoni o latou tiute, ma le fa'aaloalo i le ta'ita'iga o galulue ai, ae maise o le malosi atoa o lo'o latou ofoina ai lea tautua, e matua mata'ina ma tumati'e i le Malo tele! Fa'afetai Amerika Samoa mo lo outou sao iloga, i le puipuiga o le saogalemu ole Iunaite Setete atoa ma ana pa'aga fa'avaomalo."

 

Sa ia fa'afetaia le faigamalo ma lona pulega, ona o le tu'u avanoa i fanau talavou o le atunu'u e faia ai o latou sao, a'o alaalata'i matua matutua uma e talia le sosia o fa'amanuiaga, ma toe fa'afo'i atu ia i latou le fa'amanuia fa'amatua ua malie i le tausiga.

 

"O agaifanua ia e soifua ai tagata Samoa ua iloga mai e le to'atele, ua ese ai lava le ola tautua punoua'i, tautua malosi a ona tupulaga o lo'o matou pale feagai i tiute ma faiva fa'afitafita ma leoleo o le saogalemu ole tatou malo tele."

 

"O lenei tausaga ua iloga e le mama le taumafaiga a Amerika Samoa ina ia fa'amautu le tele o galuega lelei i lona talafatai ma ona laufanua, ina ia mautu le lumana'i o tupulaga talavou. Fa'afetai galulue i le faigamalo ma ana pa'aga, fa'afetai tausaili i mea e lelei ai, fa'afetai fo'i le manatu ina ia aluga lelei le lumana'i pe afai o lo'o fa'afaigata mea i o tatou nei taimi."

 

O le polokalama o lenei sisigafu'a, o se polokalama sili ona pu'upu'u lea mo Sisigafu'a uma ua mae'a. I le itula e 2:30 i le aoauli ua amata tufatufaina fa'ailoga ma faia fa'aaloaloga mo malo fa'aaloalogia. O le 'aiga ma le siva sa faia i le afiafi i le Tradewinds Hotel.

 

O le aso Tofi na tuua ai e malo fa'aaloalogia le atunu'u, ma ua fa'apea fo'i ona toe malaga taliu le fa'atina o le atunu'u, Cynthia Moliga i Uosigitone ona olo'o tatalia mai ai le afioga le Kovana SIli Lolo Moliga e fa'aauau ana talavai.

 

O lo'o malaga fo'i le afioga le Sui Kovana Lemanu Peleti ona o fonotaga a Sui Kovana. O lo’o avea nei le afioga le Loia Sili Talauega Eliasaro ma ta'ita'i.

 

ULUA'I TAUVAGA TEUTEUTINO A'OGA MAUALUGA AMERIKA SAMOA

 

Na tapena le IFBB Sau Ia Bodubuilding Federation mo le latou Ulua'i Tavuaga Teuteutino ma sa faia lea i le Faleta'alo fou a le IFBB Sau Ia i le lotoa a GHC Reids i Petesa.

 

O le tauvaga lea na faia i le aso To'ona'i na'o le vaega U18 pe o le fanau e i lalo ane o le 18 tausaga le matutua i Tama ma Tama'ita'i.

 

"Ona o le lumana'i lava o ta'aloga i so'o se atunu'u o le tupulaga talavou, o lea ua tapena ai lava le tatou faleta'alo lea, ina ia fa'afaigofie ona fesoasoani i tupulaga talavou, tama ma teine, ia mafai ona soifua ma koleni fa'apitoa e Teuteu Tino ia manaia ma ia agava'a ai fo'i mo lea fa'agatama. O tatou tino e matua mo'omo'o lava i ai le to'atele, aua e faigofie ona matagofie ona teuteu lelei mo tauvaga fa'apenei,” o se tala lea a le ali'i Peresetene Peter Reid lll.

 

E to'a 12 i latou na tauva, e to'alima o tama'ita'i ae to'afitu ali'i. Na muamua lava tu'u avanoa i nai fanau ia e tima'ia ai i le faiga fo'i o lea tauvaga ma aga e mafai ai ona fa'ailoa mai le lelei o lou tino ua i ai. O lea vaega o le taumafaiga sa tu'u lea i le tama'ita'i sui peresetene o le IFBB Sau Ia, Sala McMoore.

 

Sa i ai le laina o fa'amasino mo le fa'amoemoe. O i latou ia na fa'atulaga e aofia ai Ed Imo; Floyd Scanlon ma Aunese Tauinaola.

 

O lenei tausaga o le taumafaiga muamua lea, ae ua fa'amautu atoatoa mea uma mo le isi tauvaga o le a soso'o mai, ma ua lava tapena fo'i fanau i o latou tino e tauva ai. O le ama'ita'i faia'oga o Pesi, lea sa to'atele ana tamaiti ua tauva nei i le ulua'i taumafaiga lenei.

 

Na fa'atauva tama ma teine ma ua mae'a fo'i ona fa'amauina iuga olea tauvaga amata a le IFBB Sau Ia Bodybuilding Federation.