FAUTASI FIVA - FA'ASOLOGA O VA'A & TU'UGA ASO TO'ONA'I

Ua mae'a le fa'afitiga aleaga, ua autasi fo'i le tofa i le Komiti o le Tu'uga Fautasi o le Fu’a 2019 e tasi lava le tu'uga o lenei tausaga.

E lima maila le tu'uga ma ua mae'a fo'i ona fa'amautu mai, e leai se suiga o lea fa'aiuga ua mae'a faia. E amata mai le tu'uga i le gutu o le ava e aga'i mai i totonu o le uafu i Fagatogo, peita'i, e i ai le Meli tele ma lana pasese, ua fa'atulaga e to'ai taunu'u mai i lea taeao.

"O le avanoa lelei fo'i lea e maimoa ma tapu'e ai ata o le tu'uga lenei e turisi o le a malaga mai i lea meli, ae o le 'auga fo'i lea o faigamea i le tai, o le anoanoa'i o e maimoaina le fa'agatama e le faigofie i lenei fo'i tausaga,” o se tala lea a le kapeteni o le Sa o Nuuuli, ina ua fa'ailoa atu i ai lea tulaga.

O le vaiaso na te'a nei, sa auai Kapeteni o Sa uma e 11 ua mae'a fa'amauina o latou avanoa e tutu'u ai i lenei tausaga, ise fonotaga ma le komiti o fautasi.

Fa'ailoa e le Sui Failautusi o le Ofisa o Mataupu Tau Samoa, Malemo Tausaga, "E leai nisi tu'uga amata e faia, e tasi lava le tu'uga e pei lava o le mea sa masani ona sau ai mai le amataga o le filigamaea i le tai."

Pau le mea ua fa'ailoa mai mo le silafia a le mamalu lautele ae maise auva'a, "Afai o le a fa'afaigata tulaga o le tau i lea taeao, o le a toe tolopo le tu'uga e fa'ato'a faia i le aso Gafua e soso'o ai."

O le lisi o Fautasi ma lo latou fa'atulagaga amata mai le pito i le Malae Va'alele: Fealofani Samoa mai Fagasa; Fetu o le Afiafi mai Faga'alu; Aeto mai Pago Pago; Taema II mai Leone; Fuao mai Vatia; Manulele Tausala ll mai Nuuuli; Iseulaolemoana mai Fagatogo; Manulele Tausala 1 mai Nuuuli; Matasaua mai Manu'a; Fono ma le Paepaeulupo'o mai Aua.

TOE ITIITI MAE'A AVANOA MO PISINISI FAAALIA OLOA BIZFEST FU'A 2019

I le aso Faraile o le vaiaso na te'a, ua latalata i le 20 pisinisi ua mae'a lesitalai le Fa'aaliga o Oloa a le Aufaipisinisi mo le Fu'a 2019 i le Malae o le Suigaula a le Atuvasa, lea e amatalia ia Aperila 12.

"O le a fa'atautaia lenei Fa'aaliga o Oloa a le Aufaipisinisi mo Fefa'ataua'iga, o se aso fiafia mo le aiga atoa. O le a faia ai fa'afiafiaga, faaalia uma fo'i oloa o lo'o fefa'ataua'i i totonu o Amerika Samoa e le vasega o pisinisi, ma o le a fa'aemoemo ai fo'i mea fa'apapa e fa'ailoga ai lea foi afiafi o le aso 13 o Aperila,” o se tala lea a se tasi o le Komiti mo le Fa'aaliga.

O nisi o pisinisi fou e fa'atautaia mai tua i aiga, o le a auai fo'i e fa'aalia a latou oloa. O nisi o nei pisinisi o lea fa'ato'a fa'alauiloa i le lautele e aofia ai le Tutuila Greens , ZP Pacific, Kuaea Group, ma le Flying Fox Brewery.

Ua aofia i lenei fa'aaliga tele, se kamupani ua latou fa'aaogaina oloa po'o toega o oloa ua lafoa'i, ma ua fa'aaoga mo nisi o mea e aoga tele i totonu o le lotoifale o aiga.

O lo ua fa'ailoa mai ua toetoe lava uma loa avanoa, peita'i e taumafai lava ina fa'aofiofi tagata uma, ia tofu avanoa ina ia auai i latou uma ua naunau mai mo se avanoa e fa'alauiloa ai latou oloa mo fefa'ataua'iga.

O le auau o lenei Fa'aaliga o Oloa a Pisinisi ua fa'alauiloa mai "O Tatou Ua Tasi!" Ae o le afiafi loa o le a faia ai le fa'aaliga o Mea Fa'apapa a le Bluesky Communications McConnell DOwell ma a latou pa'aga.

TOE FA'AOLAOLA LE "PAGO PAGO YACHT CLUB" FOLAUGA I VA'A

Ua toe i ai nisi ua matua toe galulue maumaua'i mai nisi o totino tuai ma ni sui fou fo'i, ina ia toe fa'aolaola mai le Pago Pago Yacht Club.

I se tala fa'alaua'itele mai lea Kalapu ua latou fa'ailoa mai ai, "E tatau lava ona fa'aauau le Pago Pago Yacht Club ae maise o le latou anava sa tau'ave mai i tausaga e tele, ‘Soifua fiafia fa'atasi ma ia olaola le taleni o folauga ma ta'aloga e faia i le Moana’."

"E le gata i lena, ae o le tele fo'i o polokalama sa fa'atautaia e i latou ina ia fa'aleleia atili le tomai e iloa ai ona ta'a'alo fa'atauva i fa'agatama i le tai ma le saogalemu o i latou uma fa'apea ma va'a folau."

Ua amata galulue nei lea komiti fa'ata'ita'i mo le taimi nei, ina ia toe galulue i loto o sui totino tuai ma nisi fo'i o lo'o ua i ai le fiafia i fa'agatama i le tai ma le folau i va'a i luga o le sami, ina ia auai uma i le latou ulua'i fonotaga fa'alaua'itele lea e faia ia Iuni 2019.

Na fa'atula'ia lea Kalapu i le tausaga 1964 ma sa latou sapasapaia lava tulaga tau folauga o so'o se ituaiga, fa'ase'e i galu o le sami kayaks ma isi uma ituaiga o ta'aloga e faia i le sami.

Afai o oe o se sui totino o lea kalapu, e faigofie fo'i ona e ofu atu i so'o se isi lava asosi a tagata folau i va'a faila tutu'u i si malo tetele o le lalolagi e aofia ai ma le Iunate Setete o Amerika.

Mo nisi lava mataupu e te mana'omia ona fa'apupula atili e tusa o le Pago Pago Yacht Club e mafai ona e feso'ota'i i le Uepesite : americansamoappyc@gmail.com.

MAE'A TULAUELEELE MAI SUI VA'ALELE FOU SAMOA AIRWAYS

Mai Samoa, ua taunu’u i le malae va’alele i Faleolo, o le va'alele ua mae'a aiaia e Samoa e lisia mo a latou feoaiga i le ea, o le ituaiga Malindo Air 737-800NG.

I le taimi nei ua toe taumafai le Samoa Airways e toe fa'atulaga tonu a latou faigamalaga ae maise malaga o lo ua mafai nei ona soso'o e lea va'alele tele ona sa toe faia feuiuiaiga ma maliliega ma isi kamupani va'alele e fa'aaoga lava pepa malaga a latou pasese e malaga ai i taimi na le i ai ai se va'alele mo le Samoa Airways.

O le tala mai o le latou malaga muamua lava lea na toe faia mo Aukilani Niu SIla i le aso To'ona'i na te'a nei.

O lea va'alele ua aiaia e lisia mo le ono masina mai le Lion Air i Indonesia mo lenei taimi, ae o lo'o ua galulue fo'i Samoa mo se isi feagaiga fa'alisi mo se taimi umi atu i se isi va'alele tele atu i lea va'a ua fa'aaogaina nei.

E to'atele fo'i pasese mai Amerika Samoa sa fuafua e femalaga'i i le Samoa Airways i le va o Niu SIla ma Samoa, fa'apea ma Brisbane ma Samoa sa tu'u e o'o mai i le aso Faraile na te'a, ae na fa'ato'a to'ai taunu'u mai i le aso To'ona'i, ona o a'afiaga o le taofiga o le va'alele tele lea sa lisia e le Samoa Airways.