Ads by Google Ads by Google

Tala I Vaifanua

FAITAU TUSI I FANAU A'OGA - LE'ATELE ELEMENTARY FAGASA:

 

I le taeao o le aso Faraile na te'a nei sa o'o atu ai le Tausala Lalelei o Amerika Samoa, Magalita Johnson, i Le'atele Elementary i Fagasa, ina ia fa'aauau ai lana polokalama "Faitau Tusi i le Fanau Aoga."

 

O Johnson, na vala'aulia fa'apitoa e avea ma se tasi e lauiloa i le atunu’u, iloa tele e tagata, e faitauina se tala tusia i le gagana peretania i le fanau a'oga.

 

"O le fa'aosofia o lagona fiafia o fanau e faitau tusi, o le mea sili lea ona taua, aua e matele ina maimoa i latou i le televise, ae le faitau tusi i ai fo'i matua mo i latou. O le ala fo'i lea o le taumafai i le isi auala e fa'aosofia ai le fia faitau tusi o le fanau,” o se tala lea a Johnson e faitau le tusi i lana vasega.

 

"O le a fiafia la oe e faitau tusi?" na fesili atu ai a Johnson i le vasega.

 

"Ioe oute alu e ave i lo'u tina le tusi e faitau mai ia te a'u, pe a ou sauni ou te moe,” o le tali lea sa se tasi o le fanau a'oga.

 

O le lona tolu ai lea o a'oga ua malaga i ai Johnson e faitau tusi ai. O Pavaiai ma Masefau sa ia faia ai fo'i lenei faiva, ma o se auaunaga ua ia fa'ailoa mai, "Ou te fiafia tele e faitau tusi i le fanau, aua o le ki atoa lea i le olaga a'oa'oina lelei, ia faitau ma le malamalama. A lelei le faitau tusi a le fanau, e faigofie fo'i ona malamalama i a'oa'oga uma lava e tu'u ia i latou i lo latou olaga a'oa'oina atoa."

 

Na malaga fa'atasi atu o ia ma le Peresetene o le MASI, Mrs Fou Imo e talia lea vala'au.

 

E tusa ai ma lona aga'i atu i a'oga laiti i afio'aga i tua, sa ia fa'ailoa ai, "O a'oga nei e pele ia te a'u, e tatau lava ona tofusia lelei a'oga uma ma le tatou fa'amuamua. Matele lava ina faigofie ona aga'i atu i a'oga e tulata i nofoaga e tumutumu i ai tagata e to'atele i le taulaga, ae fa'afaigata ona o'o mai i nai a'oga lea e afio'aga i tuamauga. Ae sili atu le usita'i ma le fia fa'alogo fo'i o nei fanau uma, i sa tatou taumafaiga e fa'asoa atu,” o se tala ata lea a Johnson.

 

30 FANAU A'OGA LAUTOGIA TAUVAGA TUSI TALA I LE FA'APERETANIA

 

E to'a 210 fanau a'oga sa mafai ona tauva i le tusiga tala sa fa'atautaia e le Matagaluega o A'oga, ua mae'a faia le fa'aiuga, ma ua fa'amauina ai le to'a 30 o i latou ua maua le tulaga togisilia se'ia o'o i le tulaga tolu i vasega ta'itasi o i latou na tauva, amata mai le vasega Level 3 se'ia o'o i le Level 12.

 

O le tauvaga lona 31 lea talu ona tauva le fanau i a'oga tulaga muamua ma le tulaga lua i tusiga tala fa'aperetania.

 

I le tauvaga tusigatala Fa'asamoa, sa faia i le aso Faraile na te'a nei i Uifa'atali Peter Coleman Elementary ma Tafuna Elementary. O latou laugatogi o le a faia lea i le vaiaso muamua o Me 2019.

 

I le Level 3 ua maua ai e Movete Fakalata mai Manumalo Academy le tulaga muamua; tulaga lua Frances Lavea mai Lauli'i Elementary ae tulaga tolu Evan Zou mai le Pacific Horizons.

 

Level 4, togisilia Julynn Aitui mai Alataua Lua; tulaga lua Lemalama Silafau Toa mai Iakina Academy;  tulaga tolu Talaiupu Reid mai Samoa Baptist Academy.

 

Vasega Lima ua manumalo ai Michelle Lavea mai Lauli'i Elementary; tulaga lua Mathias Lutu mai le South Pacifi Academy; ae tulaga tolu Alk West mai le Mt Alava Elementary.

 

Vasega Ono, tulaga muamua Marlynn Tua mai le SPICC; tulaga lua Alexnader Faiivae mai le Samoa Baptist Academy, ae tulaga tolu Aisynia Mageo mai le Coleman Elementary.

 

Vasega 7 ua tula'i mai ai Fenomarama Aperaamo I le Tafuna Elementary i le tulaga muamua, tu lua i ai Seraphin Lino mai Kanana Fou Elementary, ae tulaga tolu Princess Viesca mai St Theresa i Malaeloa.

 

Vasega 8, togisilia Leila Puletasi mai Kanana Fou; tulaga lua; Heleina Willis mai St. Theresa ae tulaga tolu Arianna Ta'atasi mai Lupelele Elementary.

 

Vasega 9, tulaga muamua Michael Sun mai le South Pacific Academy; tulaga lua Ario Hopkinson mai Leone High School ae tulaga tolu Prodieus Lutu Fuga mai Samoana High.

 

Vasega 10 ua manumalo ai Tasi Pereira mai Samoana; tulaga lua Leilani Galea'i mai le Pacific Horizons; ae tulaga tolu Sifua Ma'aele mai Leone High School.

 

Vasega 11 ua maua ai le togisilia e Evelini Suani mai le Manumalo Academy; tulaga lua Talofa Fe'a mai Tafuna High School; ae tulaga tolu Jane Faumuina mai South Pacific Acdemy.

 

Vasega 12, tulaga muamua Hewlett De Lara mai le Manumalo Academy; tulaga lua Sophie Young mai le South Pacific Academy; ae tulaga tolu Katherine Betham mai Tafuna High School.

 

SUIGA TETELE I LE TAULAGA I FAGATOGO

 

I le taimi nei i Fagatogo ua matua iloga ona fa'amatagofieina i le tele o faletetele ua mae'a fa'atula'ia ai, ma o fale fou lava. E aofia ai le fale o le Matagaluega o le Puipuiga o le Saogalemu Lautele, ae maise le fale fou o le vaega tinei afi.

 

Toeititi mae'a fausaga fou mo le Fale Mata'aga Jean P. Haydon Museum, fa’apea foi ma le Fagatogo Pavillion. O le Maota mo le Fono Faitulafono o lo’o taofia pea lea galuega i le taimi nei.

 

Taua e le fa’atonusili o le Matagaluega o Fefa'ataua'iga, Keniseli Lafaele, "Ua fuafua se fale e fa'amautu i ai tautua mo le vasega Turisi e aga'i mai i le atunu'u i lena avanoa."

 

O lo’o i ai foi se fuafuaga e toe fa’aleleia le "Lumana'i Building" ma ua fuafua lea fale e avea ma nofoaga autu o le a fa'atautaia ai le Ofisa o Fa'amaumauga Fuainumera (US Census Bureau) e tapenapena mo le Faitau Aofai po'o le Tusiga Igoa a le atunu'u lea e faia i le 2020. O le ala lea o le vave tapenapena atu o lea faletele.

 

O lo’o i ai pea le fa’amoemoe a le malo e toe fa’aleleia le nofoaga sa i ai muamua le Rainmaker Hotel. "O lea galuega e le'i taitai peita'i ua mae'a fa'asalalauina i fafo ni pisinisi latou te fia fa'atuina ai se latou fale mo ni pisinisi, peita'i afai loa e mautu atoatoa loa i latou e fa'aaogaina lea eleele,” o se tala lea a Lafaele.

 

I Malaloa, o le a toe fa'aleleia atili e le susuga le Faipisinisi o Peter Crispin o le Misaalefua Building, ma o le a i ai fo'i nisi suiga matagofie o le a maimoaina e le mamalu fegasoloa'i o le atunu'u e fa'atutuina i lea eleele e le o toe mamao.

 

O le fuafuaga lenei e fa'afouina lau taga'i ma le maimoa i le taulaga, o se taumafaiga i le tatou taligamalo mo le tatou Fu'a i lenei tausaga. Ae a le gafatia ai, e fa'asolo atu lava fo'i ina ia fa'aleleia mea uma mo le mamalu o tatou malo fegasoloa'i mai Meli tetele ma vaalele fo'i, ina ia maimoaina le tatou taulaga ma le Uafu matagofie.