Ads by Google Ads by Google

Tala I Vaifanua


L-R: Jenny Uli, Tunu Nancy Matautia-Elisara, Arona Mataia ma Tai Vili o le Au Tauva a le Samoa Bodybuilding i le Australasian Championships i Sydney, Australia. [ata: foa'i]

Le tama'ita'i o Valasi Tea lea ua fiafia tele e fa'ailoa mai lona mauaina o lana siaki fa'ameaalofa mai le American Samoa Community Cancer Coalition, ma o le fa'alua lea ona ia maua lea fa'amanuiaga. [ata: foa'i]

3 PINE MO SAMOA MAI TEUTEUTINO AUSTALASIA

 

I se lipoti mai Samoa, o le susuga Arona Mataia na manumalo i le Pine Auro i le tauvaga a le "Men's Physique" teuteutino a tama mai le manava aga'i i luga i le fatafata ma lima.

 

Peita'i o Albert Wilson mai Alafua na tulaga lua i le Novice Body Building a'o Tunu Nancy Mata'utia -Elisara mai Maluafou na mauaina fo'i le tulaga lua i le Women's Physique.

 

O le to'atolu lea ua lautogia ai Samoa i le Pine Auro ma SIliva e lua mai le Australasia lea sa faia i le a'ai tele o Sydney i le fa'aiuga o le vaiaso na te'a nei ma ua fa'alauiloa aloa'ia mai ia Aperila 1, 2019.

 

Ua fa'atulaga nei le isi Tauvaga Teuteutino lea ua talimalo ai Amerika Samoa i le Mr & Ms Bodybuilding ia Iulai 2019. O malo sa tauva i lenei tauvaga teuteutino a alii ma tama'ita'i na aofia fa'atasi ai sui mai Tonga; Tahiti, Atu Kuki; Niu Kaletonia, Amerika Samoa, Samoa, Niu SIla ma Ausetalia

 

Fa'aalia fo'i e le susuga le Faia'oga o le au teuteutino a Samoa na masi'i i le tauvaga, Johan Keil, "E tele na'ua le tauvaga lea ua tauva ai nei alo o Samoa, fa'afetai ua tofo fo'i i latou i le faigata o le tauva ma atunu'u tetele, aua e lelei tele ona koleni latou au ta'a'alo i so'o se ta'aloga. Ae sili ai ona fa'afetai ona ua lautogia i latou i se pine mo Samoa le atunu'u pele."

 

AMERICAN SAMOA COMMUNITY CANCER COALITION FESOASOANI TUPE I GASEGASE

 

Ua toe fa'amanuiaina fo'i nisi o le atunu'u i ni foa'i tupe mai le American Samoa Community Cancer Coalition (ASCCC), i latou o lo'o ua fa'agasegasea ma ua fa'atautaia togafitiga i le ma'i faigata o le Kanesa.

 

O i la'ua na mafai ona kiliva a la'ua siaki o fesoasoani i le vaiaso na te'a e aofia ai le tama'ita'i o Valasi Tea, ua fa'alua ona togafitia lona Kanesa peita'i e le fa'anoanoa ai o ia. E va'aia lava lona laufofoga fiafia e ui ina ua atoa le 11 tausaga talu ona a'afia o ia i le Kanesa.

 

O le tausaga e 2008 na mua'i po'ia ai o ia i le Leukemia, ma sa maua fo'i lana fesoasoani tupe i lena tausaga, ma o ia fo'i o se ulua'i sui pito i laititi na maua lana fesoasoani lea mai le ASCCC i lona amataga mai.

 

I le tausaga 2014 na toe taumafai ai foma'i e ave'esea le tumor ma faia ai loa ana fa'ata e fa'ape atoa ai lona kanesa lea. O le taimi nei ua malolo mai ona togafitiga ma ua fa'aauau fo'i ana talavai i Honolulu.

 

"Fa'afetai ia i latou o foa'i mo le ASCCC ina ia mafai ona fa'asoa mai ia i matou o lo'o faia togafitiga o matou ma'i, tau ina ia alofa tele le Atua ma fa'afo'i atu le manuia i le agalelei. Fa'afetai fo'i i le ASCCC mo le galuega alofa, e le mavae manuia ia te outou ona o le manatu i a i matou o lo'o mana'omia le fesoasoani. Fa'afetai tele,” o sana fe'au fa'afetai lea ua fa'aleo mai ma le agaga fiafia.

 

O le tama'ita'i fo'i o Mele Pati sa o'o ane ina ia taua'aoina i ai le siaki fesoasoani mo le susuga Vatoi Ching Sam, lea ua fa'ato'a faimeaalofa i ai le ASCCC. Ua maua Vatoi i le Kanesa ma le Mama, peita'i ua matua lagona e ia le toe fia va'ai mai i si ana fanau, aua o lea ua fa'amalosia lava o ia e nofo i le falema'i i Faga'alu mo ona togafitiga.

 

Ua le mafai fo'i ona auaina atu o ia i Niu Sila aua e le taulia ai le Medicare mo ia e faia ai ana talavai.

 

Fa'afetaia fo'i e Vatoi le foa'i mai le ASCCC ma ana pa'aga o lo'o sailia le seleni e faatupe ai nei foa'i aoga tele mo i latou ua po'ia i le Kanesa. Fa'afetai mo Mele Pati i le tausi matua, ma le mau fa'atuatuaina na te tauavea le siaki mo le tama.

 

UNA'IA ASOSI AUFAIPISINISI SUI TOTINO AUAI I LE BIZFEST

 

I le fonotaga a le Chamber of Commerce, po'o le sosaiete a le Aufaipisinisi i le tatou atunu'u, i le vaiaso ua te'a sa una'ia malosi ai e le Laulauatofi o lea asosi o latou sui totino ina ia auai, fai se sao o i latou i le Bizfest lea o le a tu'ufa'atasia i lenei tausaga.

 

Saunoa le taitaifono a le asosi, Ella Gurr, e tolaulauina mea e ao ina fa'atino e pisinisi uma o le a auai i le Bizfest, o se tasi o polokalama e soso’o ma le fua o lenei tausaga.  O le a sainia e pisinisi uma a latou vaega o le eleele o le a faia ai latou fa'aaliga o latou oloa i le Malae o le Siugaula o le Atuvasa i Utulei.

 

O le BizFest, e amata i le aso 12 o Aperila e o’o atu i le aso 16. E leai se BizFest ia Aperila 14 o le aso sa.

 

I lea lava fonotaga na mua'i tulai le sui Taitaifono o Luisa Kuaea ma fa'afeiloa'ia i latou na auai. Ma ia fa’ailoa tulaga o se ofisa mo i latou, atonu e fa’aaoga se tasi o Ofisa Autu o Pisinisi i le Maketi i Fagatogo.

 

Ona o lo'o i lalo le va'ava'aiga a le Matagaluega o Fefa'ataua'iga lea fo'i Vaega o le Maketi, o lea ua fa'aauau au nei ni talanoaga tau lea tulaga mo le taimi nei.

 

O le Kamupani Va'a a le Swire Shipping sa latou saunia taumafataga mama mo le fonotaga a le Chmaber of Commerce i lea afiafi.

 

FESOASOANI WAYLAND UNUVERSITY MO I LATOU SA I LE ARGOSY

 

Ua ofoina e le Waylan University, lea ua fa'atuina le latou lala i le lotoa a le Manumalo Baptist Academy, le fesoasoani mo fanau sa aooga i le Iunivesite a le Argosy, lea ua tapunia ona nofoaga i Amerika, ae pei i le teritori nei.

 

O le Wayland Unversity sa fa'atuina i le tausaga e 1908, lea sa amatalia e le o se Iunivesite mo se polofiti poo tupe fa'asili.

 

I tausaga na fa'ato'a fa'atula'ia ai le A'oga Manumalo Baptist Academy na saunoa ai le Pule A'oga a'o le Faife'au foi, Frank Ala, "O le ma'ua fa'amoemoega tele, ia ou va'aia le a'oga tulaga muamua ma le lua ua fa'atuina, ae soso'o mai ai ma le Iunivesite po'o le Kolisi e sailia ai fa'ailoga maualuluga o fanau a Amerika Samoa."

 

O le fa'atula'ia tumau ai nei o le Wayland University i lea nofoaga mau, ua avea ma se fa'amoemoe ua taunu'u, o le moemiti fo'i a toeaiina ua taunu'u, e ala lava i le sailiga o le atamai lautele.

 

Ua i ai atoa le Ofisa o le Wayland University i lea lava nofoaga i Malaeimi ma o le latou numera e 699-2177. Ua manatu i latou ina ia vala'au atu le fanau a'oga o lo'o fia fa'aauau kosi sa tau'avea i le Argosy, e talanoaina latou mea uma e tatau ona o'o atu ma i latou, ia fa'aauauina lesona mo na kosi aoga.

 

Ua ma’ea ona ofoina mai e le University of Hawaii Manoa le fesoasoani mo i latou sa aooga i le Argosy.