Ads by Google Ads by Google

Tala I Vaifanua


Pule o le Galuega ma le Hope Dialysis Center i Iliili, Chris Fisher. [ata: Leua Aiono Frost]

O se va'aiga i le falema'i fou ua toetoe mae'a, ua fa'ailoa mai toe tolu masina tatala ona faitoto'a i le atunu'u mo togafitiga o le Fa'amama Toto. [ata: Leua Aiono Frost]

LAVA SAUNI HOPE DIALYSIS CENTER TAUTUA LE ATUNU’U

 

Ua matua lava sauni Chris Fisher e tatala faitoto'a o le Hope Dialysis Center e tautuaina ai le mamalu o le atunu'u o lo'o fa'agasegasea ma e fa'amama o latou toto, ona ua afaina tumau o latou fatuga'o.

 

E le gata ina ua mae'a fa'atulaga se tasi o Foma'i Fa'apitoa o Gasegase tau Fatiga'o e fa'afaigaluegaina i le tatalaina o le latou auaunaga, ae ua tapena mai fo'i ma le foma'i fa'apitoa mo Taumafa Tatau ma le Paleni.

 

"Ua e iloa e na'o le lua lava vaiaso e te matua tu'utoina ai lou tagata atoa i 'aiga o mea'ai tatau ma le paleni, toe kilia ese lou ma'i suka.S O le ituaiga foma'i fa'apitoa lea o Me'ai Tatau ma le Paleni, ua fa'atulaga mai e le Hope Dialysis Center, i lona tula'i mai e tautua le atunu'u,” o se tala fiafia lea a Fisher.

 

Sa asia e le Samoa News le Maota ua fa'atulaga e fa'atautaia mai ai le falema'i. Ma sa va'aia le potu e talia ai tagata gasegase e gasolo atu, fa'asolo lea i le isi fo'i potu e mafai ona fuaina ai latou toto ma le suka, le mamafa ma lo latou fiva.

 

Ona fa'ato'a o'o lea i le potu e fa'atulaga tonu mo togafitiga lea ua amata fa'atutu ai masini, ua fa'apena fo'i ona toe fausia le nofoaga o le masini e sapalaia le malosi'aga fa'aeletise ina ne'i motusia fa'afuase'i le eletise.

 

Ua i ai fo'i le potu mo e faigaluega ina ia faia ai latou galuega tatau mo togaifitiga, ae maise o le potu o vaila'au ma le sapalai o le suavai mama mo le suiga o vaila'au e alagatatau mo le fa'aaogaina e masini mo le fa'amamaga o le toto.

 

Ua i ai le potu ua fa'aavanoa e fa'atalitali ai gasegase e fa'asolo i masini ma ua i ai fo'i ma televise e fa'anofo filemu ai i latou. O mea uma ua fa'atulaga ina ia maua le aiaiga o falema'i ua fa'atutuina mo lea tautua i totonu o le Iunaite Setete ma ona teritori. Ua fa'amoemoe fo'i ina ia maua le so'otaga ma le au pasi falema'i a le Centers Medicare Services (CMS) e sau ona fa'ato'a amatalia lea o le tautua a le Hope Dialysis Center.

 

"O le taimi nei e tusa ma le 60 aiga ua fa'ato'ai mai e nisi o latou fanau le matou nei falema'i ina ia mautinoa e tatala faitoto'a e tautuaina i latou i le tolu masina o lumana'i nei. Ua amata ona fa'atulaga mai latou taimi e asiasi mai ai o latou matua o lo'o fa'amama toto i fafo ina ia o mai ai e asiasi mai i o latou aiga. O le mea tonu lava lea o lo'o o'u mana'omia i le taimi nei. Ia talanoa mai ma fa'atulaga aso e fia malaga  mai ai latou aiga i Samoa pe a mae'a le tolu masina o lumanai nei,” o se tala lea a Fisher.

 

O le fale ua fa'atula'i ai nei le falema'i fou lea e fa'asaga tonu mai lava i le isi itu i le Malae Tapolo i Ili’ili, ua fa'apipi'ia ai fo'i ma le fa'ailo o le falema'i lenei i lumafale ia mautinoa e tagata uma lea nofoaga taua.

 

Ua fa'aaogaina na'o le fogafale alalo o le Maota, peita'i e le o i ai se fuafuaga i le taimi nei e fa'aaogaina lona fogafale lua. Afai e fa'aaogaina lea fogafale, e ao ina faia fo'i se lifi e fa'aaoga i le va o fogafale e lua o le fale.

 

Fa'ailoa e Fisher, e tele nai mea o le fausaga ua suia e i latou ina ia mafai ona talafeagai ma fa'atonuga o le fausaga o falema'i i Amerika.

 

"O le toe mea o totoe nei, o le talosagaina atu lea i tama'ita'i tausima'i pasi, ina ia fa'afeso'ota'i sa'o mai a'u e outou o lo'o fia mauina galuega tausima'i i totonu o le Falema'i Fou lenei,” o se tala lea a Fisher, ma o lana telefoni 272-5256 .

 

"Ou te mana'o e talanoa mai tagata Amerika Samoa ia te a'u, ia mafai ona ou talia a latou fesili, ma ou iloa atili ai, o latou mana'oga i le tautuaina o i latou."

 

"O le fa'amamaina o le toto, afai e tui atu le masini ae faigata ona o le tiga, e le tatau ona fa'apea se mea e tupu mai ia te oe a'o fa'amama lou toto. Pe va'aia fo'i le tautau maulalo mai o le vaega e tuia atu i ai le masini o lou lima, e le tatau fo'i ona fa'apena. E i ai se mea o fa'aletonu i le tuiga o lou toto. Ia iloa o le taimi lenei, ua le toe tiga lava so'o se togafitiga o se gasegase i fafo, ae maise i le fa'amama toto, e tatau foi ona fa'apena le tautuaina o outou iinei,” o le isi lea ana talanoa fa'amalamalama mai.

 

I le galuega o lo'o fa'aolioli mai mo le isi falema'i tele atu mo le Fa'amama Toto lava, ua fa'ailoa mai ai e Fisher, "O le galuega la lena e fausia lea mai le amataga, e vave ma sa'o mea uma, ma o le a fa'amoemoe e tatala fo'i i le tausaga a sau i le amataga, ae o le aotelega o Masini Faamama Toto e fa'atutu ai e atoa le 60."

 

UH MANOA - MAFAI FA'AMAE'A SAILIGA TIKERI TAUAVEA I LE ARGOSY

 

O ona o le tapunia fa’afuase’i i le masina ua te’a o le Iunivesite a le Argosy i Amerika,, e aofia ai lona lala i Amerika Samoa, o lea ua tula'i mai ai le Iunivesite o Hawaii (UH) e fesoasoani i alo le atunu’u.

 

O le tama'ita'i o Dr Deborah Zuercher o le UH sa ia fa’amaonia lea tulaga mo i latou sa aooga i le Argosy.

 

"E ao ia i latou uma lava ona fa'afeso'ota'i mai a'u, ina ia talanoa fa'ailoa ia i latou le ala e fa'atautaia ai pea a latou a'oa'oga, ina ia maua o latou fa'ailoga sa naunau e tausailia,” o se tala lea a Zuercher.

 

Ua fa'ailoa mai e ia, ua mae'a ona fa'atalanoaina e i latou ma sui fo'i sa gaulue i le Argosy, ma ua latou fa'ailoa fo'i ala e mafai ona fa'aauau ai pea ona sailia e le fanau a'oga sa taumafai mo latou fa'ailoga, a latou a'oa'oga i le UH ma maua ai latou fa'ailoga.

 

Ina ia mautinoa o lo'o ua malamalama tonu le sui o a'oga i lana mea e fai, ma ala o aiaiga e fa'atino ai pea ana a'oa'oga ia maua lona fa'ailoga o tausailia, e ao ina talanoa ma Zuercher i le latou potu mo vasega i le Tasi Street, Lions Park.

 

Ua i ai fo'i nisi e mafai ona maua mai ai transcript poo lisi o vasega, o le susuga William Thompson ma Lora Laolagi.

 

Ua fa'afetaia e Zuercher le susuga le Sui Kovana Lemanu Peleti Mauga mo le taumafaiga e faia se auala e toe maua ai se avanoa mo lea vasega tele o fanau a'oga, sa ave mataupu i le Argosy.

 

O le UH ua loa le latou tautua lea mo alo o Amerika Samoa, lea na amata mai i le tausaga e 1980, o tausoa lua pea a latou a'oa'oga ma le Kolisi Tu’ufa’atasi a Amerika Samoa.