VALA'AUINA FAAPITOA PISINISI IA AUAI I LE FA'AMAMA MO LE FU'A 2019:

O le fa'amamaina o le atunu’u mo le Fu'a o lenei tausaga, e pei ona fa’atulaga i le aso 5 o Aperila mo ofisa uma o le malo, ua valaauina ai foi ma pisinisi ina ia alofagia la latou fesoasoani i lea aso - fa’amama Amerika Samoa.

O le susuga le ali'i CEO o le ASPA, Wallon Young ma le fa'atonu o le ASEPA Lefega Fa'amao Asalele o lo’o ta’itaia lea fa’amoemoe ma ua talosaga ai pisinisi ma le atunu’u atoa ina ia fa’amama o tatou laufanua.

"O lo tatou galulue fa'atasi e lelei ma matagofie ai le tatou fa'amoemoe i lenei tausaga. O lo'o tatou tutu fa'atasi e fa'ailoa lo latou lotonu'u ma le matagofie o le tatou talafatai i a tatou malo uma ua vala'auina ina ia o'o mai mo le tatou Fu'a 2019,” o se tala lea a Young ma Lefega i pepa o fa’amatalaga a le malo.

Ma ua fa'amalosi atu fo'i i pisinisi ina ia fa'avasega se taimi lelei e talafeagai mo ni a latou galuega fa'amama i a latou aufaigaluega, ma ia teuteu fa'amatagofie a latou lotoa uma o tu aualatele.

E le gata fo'i i lea, ae ua talosagaina aiga uma, ia fa'aalia lo tatou agaga fiafia ma foliga lalelei i le tatou teuteuina lelei fo'i o tatou lumafale ma tafafale ae maise tuafale ma ia la'u ese lapisi e le matagofie ai le maimoaga mai autafa o maota ma laoa.

O le aso 10 o Aperila ua fa’atulaga e faia ai teuteuga i autafa o le alatele.

FA'ATAUA NUUULI VOCTECH FANAU AFAINA TUMAU O LE TINO & MAFAUFAU

Ua fa'asolo pea le vaiaso atoa o lo'o fa'atulaga ai e le Nuuuli VocTech High SPEd Education Program e taualoa ai le a'oa'oina tutusa o fanau uma fa'atasi ai ma fanau ua i ai afaina tumau i le tino ma le mafaufau, atoa ai ma fanau talavou o lo'o ta'usalaina faaletulafono ae tatau fo'i ona tausailia tipiloma mai a'oga maualuluga.

I le fa'amatalaga a le tama'ita'i o lo'o fa'atautaia le Special Education i lea a'oga maualuga, "O loo fa'asolo lava ona asiasi mai Pisinisi ma Matagaluega eseese a le Malo sa vala'auina fa'apitoa mo ni a latou folasaga i ni ituaiga o galuega e mafai ona ofoina mo fanau ua soifua ma afaina tumau o le tino ma le mafaufau, aua o lea ua o'o i latou i le vaega o le soifua ua tatau ai ona mafaufau toto'a i ni galuega e faigaluega ai pe a mae'a a'oga maualuluga."

O le taumafaiga lenei ua fa'asolo, aua ua le mafai ona maua se avanoa mo se Career Day a le A'oga Matata Eseese i lenei tausaga, aua o lo ua avea i latou ma A'oga Maualuga Talimalo i le Trade Fair i lenei tausaga.

O le vaiaso lenei, Mati 25 - 29 ua fa'atulaga mo folasaga eseese ma ua fa'atulaga ai le kamupani telefoni a le Bluesky Communications i le aso ananafi.

O le autu o le polokalama fa'asolo, "Ausia Lau Matati'a ma Ave ma Toa”. Ua iloga mai le matagofie o le polokalama aua ua aofia uma le fanau fa'apitoa fa'atasi fo'i ma i latou sa nofosala i le taumafaiga i lenei tausaga.

"Ua taumafai lava ina ia matua leai se tasi o fanau talavou e te'ena ai le a'oa'oina tutusa, fa'atasi ai ma le tu'uavanoa e tausailia ni faiva e galulue ai i le lumana'i. Ua le toe te'ena se avanoa e fa'aleleia atili ai tomai e ao ina a'oa'oina lelei ai i latou ia mafai ona soifua tuto'atasi e tausia lava e i latou i latou, aua ua fa'asolo ina matutua ma faia e i latou lava a latou filifiliga ma fa'aiuga i mea e tutupu i o latou soifuaga,” o le tala ea a Josephine Gauta Siaumau, le faia'oga o le SPEd i Voctech High.

O le ala ua fesoasoani ai le a'oga maualuga lenei i fanau ina ia mafai ona sapaia latou taumafaiga e soifua tuto'atasi i le lumana'i. E to'a 30 le aofa'i o le fanau ua a'oa'oina i lea a'oga ua soifua ma gasegase tumau tau le tino ma le mafaufau na soifua mai lava i latou ua a'afia ai.

Ua fa'atulaga fo'i ina ia atoa lelei lava le 4 tausaga o a'oa'oga maualuluga o tau'avea pea e i latou matata eseese i lea a'oga maualuga. E to'aiva i latou sa tatau ona pasi i le tausaga a'oga ua te'a, peita'i, na toe talosaga matua ina ia toe a'o'oga pea ia mautinoa ua agava'a i latou e galulue pe fa'aauau a'oa'oga, lea la ua toe taumafai fo'i i lenei tausaga.

"O le aga'i mai la o Kamupani ua fa'aavanoa o latou taimi e fa'alauiloa i le fanau avanoa faigaluega ua mafai ona agava'a ai pe a mae'a latou a'oga maualuluga, o se fa'ailo lea o le agalelei ma le alofa i fanau nei. Ua o gatasi ai ma le fa'amoemoe, ia le te'ena se avanoa lelei mo le fanau ua soifua ma gasegase tumau i le tino po'o le mafaufau,” o se toe fa'afetai lea a Siaumau.

VA'ALELE A LE NOAA - FA'AAUAU FA'AFANUA O LE TATOU TALAFATAI

I le aso Gafua sa to'ai taunu'u mai ai va'alele e lua a le NOAA lea ua fa'atautaia lo latou faiva ia fa'afanua leleia atoa le talafatai o Amerika Samoa, le laufanua fa'apea ma le gataifale.

Ua tatou iloa lelei, ua leva na mae'a fa'amauina so'o se setete o Amerika ma ona teritori i o latou talafatai, peita'i o Amerik Samoa e le'i leva fo'i ona fa'amauina i polokalama o fa'afanua mo le GPS.

O lea fo'i polokalama e fa'aaogaina tele e le Malo tele ma le FEMA ina ia fa'asinoala i so'o se nofoaga o fia sailia, pe suesueina fa'apitoa e i latou. Ae maise i tulaga o le fa'amautu lelei o le puipuigamalu a le NOAA i o tatou sone o le gataifale ma le laufanua.

I taimi fo'i e sofa'i mai ai i tatou i ni puapuga fa'anatura, e vave ona fana a'e i luga le fa'afanua lea ua fuaina ma fa'amau e le NOAA ma iloa patino ai le nofoaga atoa o lo'o a'afia, ae pe fia fo'i ni fale nofo o aofia ma a'afia ai, ma nisi o mea mautu tau meatotino a le tatou Malo po'o le malo tele o a'afia ai.

Mo ni fa'aiuga faia a le NOAA ma isi lala uma o le malo tele, e tatau ona muamua va'ai i le fa'afanua lea e avea ma tapasa e ta'imua i a latou filifiliga ma fa'aiuga fai fa'avave mo e ua a'afia.

O le va'alele lea a le NOAA, o le Gulf Stream, sa fa'afoe e Capt. Kristie Twining ma isi pailate e to'alua. O le aso lua na malaga ese ai i latou.

I le malaga lenei ua fa'amautu atili ai fo'i le maualuluga ua si'itia i ai le suavai mai le apitagalu, ma e aoga tele i fa'amaumauga ina ia manino pe o le a suiga o nei fa'amaumauga fou mai fa'amaumauga sa mua'i faia talu ai.

Ua fa'ailoa mai fo'i e tusa ma le 30% o le latou galuega fa'amaumau ua mae'a nei, ae o le a toe fa'atulaga mai fo'i se isi asiasiga e fa'amae'a ai le isi vaega o totoe.

Maimoaina ma faitau a lea vaega i le latou Uepesite: oceanservice.noaa.gov