$10,000 FAIMEAALOFA MALO I LE MALAGA SPECIAL OLYMPICS

Mo le faigamalaga a le Au Ta'aalo a le Special Olympics a Amerika Samoa ua mafai ona asia e i latou le Ofisa o le Kovana mo se latou fa'amanuiaga i le taumafaiga a le fanau fa'apea fo'i latou taita'i o lo'o latou masi'i aua fo'i se 'ai o Amerika Samoa i ta'aloga fa'avaomalo a le Special Olympics i Abu Dhabi, na faimeaalofa atu ai le malo mo le latou fa'amoemoe i le tinoitupe e $10,000.

O le latou toe asiga lea i le Ofisa o le Fa'aao o le Malo o Amerika Samoa ao le'i tuua e i latou le teritori Ia Mati 5, 2019, ma ua atoa nei le vaiaso talu ona to'ai taunu'u i latou i Arapi ma ua fa'amasani fo'i i latou i le tau o lea malo, fa'apea ma le fa'amoemoe e fa'amasani ona koleni lelei ai fanau ta'a'alo.

Ona o le taimi lava lea ua masi'i ese atu foi Kovana Lolo Moliga mo lana malaga i le fonotaga a Kovana uma o le Iunaite Setete o Amerika, o lea sa maua atu fo'i na'o le afioga le Sui Kovana Lemanu Peleti Mauga, o ia lea sa ia taua'aoina fa'apitoa lea seleni mo le aumalaga atoa ma le au ta'a'alo.

Sa taua'aoina atu lea meaalofa ma se fa'amanuiaga mai le Taitai o le tatou Malo, sa saunoa fo'i le afioga le Lutena Kovana ma ia fa'apea ai, "E le fa'atauva'a le va'ai a le tatou malo ia te outou a matou fanau silisili ona taua. O le ala fo'i lea o le fa'apitoa ona faia o mea uma lava mo outou. O la outou fa'aeaea fo'i e tu'uina mai mo le tatou Malo ma ona tagata, matou te iloa lelei, e le o faigofie ona outou tausailia, o se mea sili lea ona lagona ma o'o i o matou fatu lo latou suamalie ma le taua. Tau ina outou iloa, o loo matou tu'uina atu lenei meaalofa fa'atauva'a, ma o matou agaga atoa, ma o matou loto atoa, o le a outou tausailia manuia e ala i ta'aloga fa'avaomalo mo i tatou ma le loto toa, ma le lotonu'u i o outou fatu.

“Ia malosi o outou tino, alofa le Atua foa'i atu lena malosi. Ia malosi la outou fa'atamasoali'i, ma ia outou maua le atamai i ta'aloga o le a tauva ai, ia manatua e outou, o lo'o matou tapuai ai ma tu'u le mulipapaga, ia outou manumalo mai i se Pine Auro, lea ua masani ai outou ona aumai mo Amerika Samoa."

Sa fa'afetaia fo'i e Lemanu le fa'ato'ato'a ma le faufautua, o le onosa'i ma le sapaia malosi fo'i a ta'ita'i ma faufautua ma i latou uma e o'o i matua o lo'o masi'i ma lenei aumalaga i le mamao ua felelei atu ai nei i Sasa'e Tutotonu. E le'i galo fo'i i le taita'i na fautuaina le aumalaga, ina ia toe taliu mai ma malaga atu ma le saogalemu o a'ao o le Atua, aua o nei fo'i malo, o lo'o tele ai vevesi i ona tapuafanua.

Na vave amata lava le sailiga seleni a le Special Olympics i le tausaga e 2017, ma e le'i fa'amoemoe fo'i i latou o le a taua'ao e le Malo lenei seleni mo i latou. Peita'i ina ua taua'aoina lea meaalofa, sa saunoa mai le tama'itai o Tafamamao Tupuola mai ala o feso'ota'iga tau emeli, sa ia fa'ailoa mai ai, "Fa'ailoa atu le agaga o le fa'afetai tele, ona sa tu'ua lava le atunu'u ae muamua mai ina ia taga'i toto'a i nofoaga ma mea uma fa'atalia atu ai le masi'i mai o fanau pele ma le 'aumalaga. O le fa'asoa ma le faimaeaalofa a le Malo, e le o faigofie ona talia ma folomolemoleina, se'i tulou. Fa'afetai tele, ua avea ma se toe fafaga o le malo ma le taumafai, ia masi'i mai ma fo'i atu ma se 'ai i fanua. Fa'afetai le alofa, fa'afetai le agalelei. O le fa'asoa fo'i a le tatou malo ma ona tagatanu'u uma, ua mafai ai ona masi'i mai le 'au ta'a'alo i lenei atunu'u mamao mo se tatou 'ai. Tau ina ia fa'amanuia tele le Atua i le tatou Malo, ma ia maua e le 'au ta'a'alo lenei le malosi mai le Atua e manumalo ai. O lo'o manuia i latou uma, ma ia tatou si'i ae ai le vi'iga i le Atua ona o lona alofa mai."

"Ina ua matou iloa le foa'i lenei, ua fa'ailoa ma le fiafia fo'i i le fanau ma ua avea ma se fa'amalosi'au mo i matou uma ae maise lava le fanau. O le taimi o le malu taeao a le fanau, e toe fa'amatala ia i latou le alolofa mai o latou aiga, ae maise o latou ekalesia ma nu'u, o latou uso o lo'o fa'atali mai ma le onosa'i, ae maise lava, o latou matua. O iina e toe va'aia ai le fiafia uiga ese ma le sogasoga o fanau i a latou taumafaiga. Faafetai tele Amerika Samoa, tatalo mai mo le latou taumafaiga."

"O Lau Pule Lea, Amerika Samoa, e silafia e le Atua le fiafia tele o le fanau ona o lo outou a'ao foa'i mai mo le fa'amoemoe. Fa'afetai!" O toe upu ia a le tama'ita'i Taitaifono o le. Special Olympics Tafaimamao Tupuola.

TOTOGIA EPC OLA O LE ALO 8 TAUSAGA NA MALIU I LE ELETISE 2018

I se lipoti mai le malo o Samoa, o lo’o fa’ailoa mai ai le atoa ai o le tausaga talu mai ona tupu le faalavelave tau eletise ma maliu ai se tamaititi e na'o le 8 tausaga le matua i Samoa, ua fa'ailoa mai e le pulega a le Electric Power Corporation, ua mae'a faia le latou fa'ai'uga o le a totogia se vaega tupe mo le maumau ai o lea soifua ma'ale'ale ona o le eletise, i nai aso talu ona mae'a le afa tele oi Gita i le Atu Samoa.

Ua fa'ailoa mai e le CEO o le EPC, Tologata Tile Tuimalealiifano, e moni lelei lea tala, ma ua feiloa'i nei i latou ma le aiga o lea alo na maliu, ae o le a le mafai ona fa'alauiloa mai le afuaga o le mafai ona maua ma ala fo'i o le maua o lea tinoitupe mai le EPC mo le soifua o lea alo talavou o Samoa.

"Ua maea tu'ufeagaiga e le fa'alauiloaina le tele o mea i le maua ai o le foa'i. Peita'i o le foa'i ua toe taua'aoina nei, e ese mai ai le $20,000. na totogia i le aiga i le taimi o le maliu,” o sana tala fa'aopoopo mai lea.

Peita'i ua ia fa'aaogaina tatau lea avanoa ua maua e fa'ao'o mai ai fo'i se lapata'iga i le mamalu lautele o le atunuu ma i latou o le a o'o i ai lenei tala. "O le tupe e le taua, a'o le soifua, afai e va'aia la'au o toulu ma ua a'afia fo'i laina o le eletise pe leai, e ao ina nofouta pea tagata uma, ae maise lava i taimi fa'ato'a te'a atu ni fa'alavelave fa'anatura ua a'afia ai le atunuu atoa, ia silafia lelei, aua ne'i uia e le fanau laiti, pe afai lava ua silasila atu ua pau ma a'afia ai se pou moli. Ia aua ne'i uia e le fanau lea nofoaga se'ia mae'a o'o atu i ai le aufaigaluega a le Eletise."