Ads by Google Ads by Google

Tala I Vaifanua


O se vaaiga i le taimi ua suaina ai le eleele mo le fausia o le faleaoga fogafalelua a le aoga a Marist St Francis ma Mary the Mother Montessori i Lepua, lea e fa'atupeina e sailiga a le Vikaliatu i Sasa'e e aofia ai Pulega e valu mai Fagatogo se'ia o'o i Alao. O le fa'afetai sa fofogaina e le afioga Epikopo Peter Brown. [ata: Leua Aiono Frost]

SUA ELEELE FAUSIA FALEA'OGA FOU MARIST ST FRANCIS - LEPUA

 

O le taeao o le aso Lua na te'a nei sa faia ai le sauniga i lumafale o le Marist St Francis i Lepua, ina ia aloa'ia ai le suaina o le eleele e amatalia ai le fausaga o le faleaoga fogafalelua fou o lea aoga.

 

O le galuega ua tuuina atu i le Kamupani a Peter Wulf Construction latou te fausia i le tau, ae le tamau a'i $320,000 mo le 5 i le 6 masina.

 

I lea sauniga na saunoa le taitaifono o le Komiti Fa'afoe, Rep Faimealelei Allen, ma faatalofa aloa'ia mai e fa'afeiloa'ia fo'i le mamalu na auai.

 

O le galuega o le falea'oga fou lenei, ua fa'alauiloa mai na tausailia e le Vikaliatu i Sasa'e a le Ekalesia Katoliko Pule'aga Samoa Pago Pago lona fa'atupega. E valu pulega a le Vikaliatu i Sasa'e: Pulega Fagatogo e aofia ai Faga'alu ma Utulei; Pulega Pago Pago; Pulega Fagasa; Pulega Lepua; Pulega Aua; Pulega Lauli'i, Pulega Sailele ma Alao.

 

E ui o le sauniga o le suaina o le eleele, ae o le sauniga fo'i e si'i a'e ai le fa'afetai i le Atua ona o lona mana sa lotolotoi i le soifua galulue fa'atasi o pulega ta'itasi, o le mamalu o le aufaigaluega galulue i nei pulega ta'itasi o le Vikaliatu i Sasa'e, ma lo latou va'ai mamao ina ia manuia pea le fa'asolo atu i le lumana'i o a'oa'oga a fanau a le atunu'u o utuvai i lea Laumua.

 

O le saunoga fa'apitoa sa tu'uina lea i le afioga le Epikopo Peter Brown, ma sa ia fa'aluaina le fa'afetai lea. "O lo outou va'ai mamao i le lumana'i fanau, o le lumana'i fo'i lea o le galuega a le Atua i lenei malo. Fa'afetai i le sailiga, ua le vale le taui ua toina mai e le Atua ina ua ia silasila i o outou loto, ua ogatasi le futia ma le umele, ua outou olopapa fa'atasi, ia maua le 'ai e pei o le aso lenei. Fa'afetai galulue, fa'afetai tausaili. Fa'afetai ia latou na lagolago mai ma foa'i mo le fa'amoemoe lenei. O i latou ia ua maua e le Agaga o le Atua ua foa'i ai i le sailiga a le Vikaliatu i Sasa'e, o le galuega e le vale le taui o le tagata i lana na foa'i. Fa'afetai."

 

O lana toe saunoaga sa ia fa'atutu aga'i i le kamupani ua tofia mo le galuega, "O le toe mana'oga i le Atua, ia manuia le galulue ma le alofaiva o le Agaiotupu ma le Falefa o le Aiga Salemalama. Ia maua le malosi e fa'atino ai le galuega, ia mautu pea le atamai e fausia ai fale anagata ma malolosi, ia maua atili ai e tupulaga faia'e le atamai i le poto lautele, aua le fa'aauauina o galuega a le Malo, tautuaina ai le atunu'u, ae maise fo'i o le galuega a le Atua, o lo'o ua tatou galulue ai nei."

 

Sa auai le sui o le Peter Wulf Construction i lea sauniga, ma ina ua mae'a le saunoaga a Epikopo Brown, sa vala'auina loa sui fa'apitoa mo sui ma pulou ina ia suaina le eleele pe a mae'a ona fa'apa'ia le eleele i le vaisa e le susuga le Faife'au tofia mo le A'oga Marist St Francis, Patele Pio Afo.

 

E toa sefulu i latou na vala'auina, ma sa aofia ai fo'i ma le afioga Moseniolo Viane Etuale, o le Pule A'oga i Marist St. Francis ma Mary the Mother Montessori lea o le a fa'aaogaina fo'i lenei falea'oga fou.

 

Ona ua le i ai ni sui o Ma'opu o le afio'aga o Lepua, o lea sa i ai lo la'ua sui na tula'i e talia le vala'au mo le suo ma le pulou, aua o afioga i Ma'opu na la'ua foa'i le eleele mo le Laumua mai le amataga mo lenei aoga.

 

Ina ua mae'a le sauniga sa toe sausauina fo'i ma le eleele sa tutula'i ai ma fale sa nofoia muamua e Tama'ita'i Sa uma sa avea ma Faia'oga i na vaitau o le amatalia o le aoga. O le nofoaga tonu fo'i lea o le a toe fa'atulai ai le falea'oga fogafalelua lea e fa'aaogaina fa'atasi mo le A'oga Fanauiti ma Marist St. Francis.

 

Ua fa'ailoa mai fo'i e le Failautusi a le Komiti Fa'afoe o le galuega lenei, Silia Time, "O le falea'oga e fogafalelua, e aofia ai nisi o Potu A'oga; Umukuka ma le Faleai ma le  Science Laboratory. O lona uiga o le a matua aoga lava lenei falea'oga mo le fa'alava o potu a'oga ma se potu suesue fa'asaeanisi a le Marsit St. Francis."

 

Na soso'o le suaina o le eleele ma fa'aaloaloga sa pa'au i ai le Komiti Fa'afoe mo le mamalu lautogia sa auai.

 

TAOFIA LE LISI A LE ARGOSY UNIVERSITY I LE FALE SA I AI

 

Ua fa'ailoa e le Haleck Enterprises, ua latou taofia nei le lisi a le Argosy University mai le latou faletele o Pisinisi i Ottoville. Sa fa'aaogaina e le Argosy University le fogafale muamua o lea fale atoa.

 

Ua faailoa mai fo'i e le Peresetene o le Halecks Enterprises, Avamua Dave Haleck, "O lo'o tutusa lava i matou ma le isi fo'i vasega o pisinisi o lo'o lisi mai ai lenei Iunivesite, e i ai foi masina e le'i totogia mai mo i matou peita'i, ua tu'uina i le pulega i'inei le aso o Mati 30, e o'o atu i ai ua mae'a tapenapena mea uma mo i latou e ave'esea."

 

Fa'aalia fo'i le agaga fa'anoanoa tele o Avamua, aua e lelei fo'i le tautua ma le auaunaga a lea Iunivesite i le atunu'u, ua a'oa'oina ai nisi o tatou fanau i le atamai lautele, ae maise lava i latou e le mafai ona tu'ua aiga ma le tatou atunu'u ae malaga mo a'oa'oga i fafo.

 

O le masina o Aperila 25, 2018 na tatala aloa'ia ai faitoto'a o le Ottoville Professional Building mo le Argosy University.

 

E ese mai lena sa i ai fo'i le lisi a le Argosy University i le Pago Plaza mo le latou satelite Lab ma isi potu a'oga. Na saunoa fo'i le ali'i Pule Sili o le Pago Plaza Howard Helg, na tapunia le potu a'oga i le fa'aiuga o le tausaga ua te'a, ae fa'atautaia ai na'o le Lab mai le latou fale i le amataga o lenei tausaga.

 

"Peita'i, o le vaiaso na te'a, na fa'ato'a ou tapunia aloa'ia ai loa ma le Lab, ina ia le toe fa'aopoopo atu ai se isi pili mo a'u ona o fa'aletonu ua le mafai ona soloia gofie mo lea Iunivesite i le taimi nei. O lea ua loka ae ua 3-4 masina e le'i totogia o le latou pili,” o se tala lea a Helg.

 

"O le tele o taimi e totogia lava le latou lisi ta'i masina, ae ua matou masani fo'i i le to'atele o sui sa a'oa'oina, o alo o le tatou atunu'u. Lea la ua fa'amotu fa'apea a'oa'oga a i latou, talosia ae mafai ona toe fa'aleleia mea uma, ma toe fa'atulaia a'oa'oga mo i latou sa tau'avea mataupu e pei ona sa i ai,” o se toe fa'amatalaga lea a Helg.