Ads by Google Ads by Google

Tala I Vaifanua


[ata: foa'i]

MAEA TAOTOGA O LE FATU O LE KOVANA LOLO MOLIGA

 

Ua fa'ailoa mai nei e nisi sa malaga i fafo ma ua latou asia le afioga Kovana Lolo Moliga, o lo'o ua fa'ato'a mae'a lona taotoga o le fatu.

 

"E o'o atu le asiga ma'i lenei, ua fa'ato'a mae'a le taotoga o lana afioga le Kovana, ma e le'i talanoa mai ona o lo'o malolo pea, ma ua le manatu fo'i ina ia fagua o ia, ae o le fa'amatalaga a le foma'i fa'apitoa, e umi se taimi e malolo ai ona o le tele o vaila'au sa fa'aaogaina i lona taotoga. Ae o mea uma o le matauina ma fa'amaumau mai le mae'a ai o lona taotoga e o'o mai i le taimi ua tu'ua ai ae toe taliu mai, o lo'o sologa manuia mea uma i lona taotoga na faia,” o tala fa'alaua'itele lea a Senatoa Tuaolo Fuean, lea sa ia asia le fa'atafa gasegase o le tatou Kovana i Seattle.

 

Peita'i i le fonotaga a le Maota Maualuga sa fa'alauiloa ane ai le asiga na masi'i ma ua fa'ailoa mai fo'i, "O lo'o ua sologa manuia mai mea uma peita'i e mana'omia ona nofo tatalo le atunu'u mo le latou ta'ita'i."

 

Ua fa'ailoa mai o le a tuuva'a ese atu le afioga le Peresetene o le Senate Gaoteote Pala'ie le atunu'u i le aso Tofi nei e malaga asiasi i le kovana.

 

20% FOOD STAMP E FA'ATAU AI FUA O FA'ATO'AGA IINEI

 

I le amataga o le masina fou, ua fa'atulaga ai le 20% o le aotelega o lau Food Stamp, o le a fa'aaoga lea e fa'atau ai fua o fa'aeleeleaga a Amerika Samoa, po'o i'a mai faigafaiva o tautai Samoa, mo lou fofoga taumafa.

 

E tusa ai ma le faaaliga mai le susuga le Fa'atonu o le DHSS ia Muavaefa’atasi John Suisala, "O le taumafaiga lenei, ina ia fesoasoani e fa'atupu atili le taumafaiga e sapaia tatou Faifa'ato'aga ma Tautai fagota i le tai, ae maise o tatou pisinisi tumaoti o e o lo'o gaosia falaoa ma mea'ai mama, ae maise fale'aiga i le atunu'u."

 

"Ua le gata la lea, ae ua taumafai atu ai ma le fe'au taua, Taumafa Paleni i mea'ai tatau mo le tino maloloina ma e le so'ona mamafa ai le tino e ala lea i le fa'atau sa'o lava o moli ma fuala'au 'aina mata o lo'o felesi, leai ni vaila'au ua o'o i ai, ma fuala'au 'aina e gaosia lelei ai mea tausami i totonu o lotoifale o aiga ua agava'a i le Food Stamp."

 

"Ua o'o lava i Faifa'ato'aga lea ua faia latou maketi i autafa o alatele, ua mafai ona e talosaga ina ia avea lau fa'ato'aga ma se tasi o fa'ato'aga e fefa'ataua'i ma le Food Stamp. Ua mafai fo'i ona e fa'atauina ai talo ua fa'atau i totonu o faleoloa, o talo na mai Samoa po'o Tonga. E fa'aaoga i ai le 88% o lau Food Stamp.”

 

Mo Faifa'ato'aga uma lava ua mae'a i ai a latou laisene pisinisi, e fefa'ataua'i ai le Talo ma isi oloa tau mea'ai, ae ua mae'a fo'i ona i ai lau teugatupe i le TBAS i Utulei, ua mafai ona latou suia lau foodstamp i le tinoitupe. O lo'o fa'aaogaina nei e le ASNAP le TBAS mo lena tautua.

 

E le fou le fa'asoalua lea a le Food Stamp ina ia mafai ona faatau ai fo'i fua o fa'aeleeleaga a le atunu'u, peita'i, sa amata mai o fa'avasega mai le 30%, ae na toe fa'aitiitia lea i le 20%. O le vaitaimi e le'i mamao atu i tua na ave'esea atoa ai lea 20% mo fua o fa'aeleeleaga ma tautai fagota a le atunu'u. Peita'i, ua lagona e tatau ona toe fa'aa'e mai lea vaega, ma ia fa'amalamalama atili fo'i lea alamanuia ia i latou e mafai ona alu sa'o i ai lea vaega, ia tofu le tagata ma si ana fa'amanuiaga mai nei alamanuia.

 

O le a faia i le aso Faraile nei se vasega fa'apitoa i le Food Stamps mai le itula e 9am ma le 1:00pm ia i latou uma o lo'o ua manana'o e avea ma se tasi e fefa'ataua'i ma le Food Stamps i lea tautua.

 

OSOFA'I FALEA'OGA TAFUNA HIGH SCHOOL

 

Na osofa'ia le Ofisa Autu o le A'oga maualuga a Tafuna i le vaitaimi o le vaveao o le aso Gafua na te'a nei, ma ua tele mea ua fa'aleagaina i totonu o lea Ofisa. Ua motusi uaea o moli o le Ofisa, ma o le faitoto'a Tioata o le Ofisa na matua ta'ei ma ua avea ma mea e tulioso mai ai i totonu i latou na faia lea galuega leaga.

 

O le vasega o le Aukuka na usupo atu mo le tapenaga o mea'ai a le fanau a'oga, na latou va'aia le ta'e tele i le faitoto'a o le a'oga, ma latou telefoni ai i le tamaita'i puleaoga o Tutuila Togilau e tusa o le 4:00 i le vaveao.

 

O se tala mai a Togilau, sa ia fa'ailoa ai, "O i latou na osofa'ia le Ofisa sa latou su'eni atoa kapoti o kesi a le Sui Pule ma sofa'i solo pepa sa i luga o kesi ma ua fa'asalalau solo i luga o le foloa i totonu o le Ofisa atoa.

 

O le faitoto'a taugata fo'i o le a'oga, ua le toe aoga e tatau ona toe fa'atau se faitoto'a fou aua ua matua tele na'ua le ta'e ua i ai, ua ofi mai ai i totonu le tagata.

 

Ua fa'alua ai lenei ona osofa'ia le Ofisa o le A'oga i lenei tausaga, o le osofa'iga muamua e fa'ato'a lua vaiaso talu ai na tupu ai.

 

"O le osofa'iga muamua o le Ofisa o le A'oga na fa'aleagaina ai e le tagata uaea ma meapu'eata, ma o le faigata, o le kamupani sa fa'apipi'ia nei masini pu'eata ua le o toe i ai, ma ua le'i mafai lava ona toe lipea nei mea aoga mo le puipuiga o le Ofisa,” o se tala lea a Togilau.

 

"O le osofa'iga lona lua, ua tele mea ua fa'aleagaina. Ma ua i ai lo'u popolega, e le toe sefe lava le a'oga aua o lo ua mautinoa e le au osofa'i lenei, ua le toe i ai se mea pu'eata sa mafai ona maua ai foliga ma o latou tino e faigofie ai suesuega a Leoleo ma le a'oga lava fo'i latou,” o se toe faamatalaga lea a le tama'ita'i pule.

 

I le taimi nei, sa ia talosagaina ai se fesoasoani mai le Faipule o le Tualauta, Larry Sanitoa ina ia mafai ona fa'atula'i se Leoleo Po i le lotoa a le Aoga. O lea fo'i se mataupu sa ia fa'atuina ma talanoaina ma le afioga le Kovana Sili Lolo Moliga i le latou fonotaga e le'i mamao atu ma Pule A'oga uma i le atunuu.

 

O lana aioiga i le Faipule, pe mafai ona ia fa'afeso'ota'ia le Ofisa o le Kovana e tusa o lena talosaga mo le fa'ateleina o meapu'eata ma sailini i totonu o le loto a aoga maualuluga ma le osofa'ia so'o fa'apenei.

 

Fa'ailoa e Sanitoa, "Ua iloga mai le gasea fo'i o le tama'ita'i pule a'oga ma le vasega o faia'oga ona o meatotino i le a'oga i toe fa'aleagaina, ae ona o le totogi mo Sailini ma meapu'eata e fa'atupe mai e le matagaluega o le Criminal Justice, o lea o le a ia saili ai fo'i i lena matagaluega o le Malo mo se fesoasoani mo a'oga maualuluga uma, lea masani ona osofa'ia fa'apea, po'o le a se latou tali i le talosaga mo lea tautua. E le gata i lea, ae o le a taumafai lava e tulituli matagau se i'uga e maua mai i fa'amaumauga ua i lima o ali'i leoleo suesue, i sui na faia lea osofa'iga i le Laumua o le Toa."