TOE SAUNIGA MALAGA AUTA'A'ALO - SPECIAL OLYMPICS AMERIKA SAMOA

O le sauniga mulimuli e fa'ao'o atu se fanoga i le Atua ina ia fa'amanuiaina fo'i le taumafaiga a le Team American Samoa a le Special Olympics lea na tuua le teritori i le aso ananafi, na faia i le EFKAS Fagatogo i le afiafi o le Aso Sa na tea nei.

Na ta'ita'ia lea sauniga e le fa'atama o le Special Olympics Amerika Samoa, Rev Iasepi Ulu ma sa fa'atumulia sauniga i sui totino o lea Ekalesia ae maise o fanau uma o lo'o aofia i le Special Olympics ma o le a tauva i lenei fo'i tausaga, fa'atasi ai ma latou aiga ma pelega.

O le aso e amatalia ai le fa'amoemoe ise sauniga tele e fa'atino lea i le Zayed Sports City Stadium i Abu Dhabi ia Mati 14, 2019. O le aso fo'i lea e tatau ona o'o atu uma ai 'au mai atunu'u eseese ina ia auai. O le sulu fo'i mo le Olimipeka Fa'apitoa 2019 ua mae'a tutuina lea i le aso ananafi i le ma ua fa'aigoaina lea sulu "O le Sulu o Fa'amoemoega!"

Ua leva ona umia e Amerika Samoa Pine Auro, Siliva ma Apamemea mai tauaofiaga ta'itasi a le Special Olympics i tausaga e tele.

O a tatou tama fa'amoemoeina lava o Justina Lutu, le tama moni o le Malaeoletalu ma Tanumaleu, fa'apea ma isi ua iloga a latou taumafaiga i le Olimipeka Fa'apitoa. O tu'uga tamo'e lava lea e masani ona mua mai ai tatou fanau nei.

Tapua'ia faiva o le fanau ina ia manuia mai i lenei tausaga e ui ina mamao tele le nofoaga i Alapi o le a fa'atautaia ai nei ta'aloga. O le latou alava'a ua saunia mo i latou e malaga atu i Samoa, Fiti ona soso'o lea ma Ausetalia ma tu'uva'a sa'o atu ai i Alapi.

AMATALIA LIKI VOLLEYBALL MO LE FU'A AMERIKA SAMOA MATI 09

Ua tapenapena lava le laulauatofi fou a le Amerika Samoa Volleyball Association mo le amataga o le latou Liki fa'apitoa mo le Fu'a o lenei tausaga. O le toe fonotaga a le Asosi e faia afiafi o le aso Tofi, itula e 5:00 i le afiafi i le ASNOC office i le Stadium i Tafuna, ma e tatau ona auai uma lava sui o 'au ta'itasi o le a fa'aulu a latou 'au i lea liki.

"Ua fa'atulaga le Liki Volleyball o le Fu'a o lenei tausaga, ua tele fo'i suiga ua mae'a fa'atautaia ai, ua fautuaina lava i matou ua avea ma sui patino o le Laulauatofi, ina ia tu'u ese uma nisi uiga vaivai e le mafai ai ona fa'atautaia lelei ta'amilosaga o lea fo'i fa'agatama. Ua o'o lava ina aumaia Laufali ua latou pasia ma umia tusi pasi fa'avaomalo i le fa'afoega o ta'aloga Volleyball, ina ia pa'au mai e faia a'oa'oga o tulafono o le ta'aloga fa'atasi ai ma ituaiga ta'alo ma le poina o le polo e le talafeagai ma o lape o lau ta'alo ai i lea ta'aloga,” o se tala lea a le susuga Ben Sauvao, peresitene o le Asosi Volleyball i lenei tausaga 2019.

Ua ese mai lea, ua ese fo'i le ituaiga pepa fa'atumu e tusia ma fa'amaumau 'ai fa'atasi ma tagata ta'a'alo o le a fa'aaogaina i ta'aloga uma, ma ua fa'ailoa ae maise ua fa'amasani fo'i tagata uma ina ia fa'atumu nei pepa mo ta'aloga ta'itasi o so'o se ta'amilosaga Volleyball e fa'atautaia i le atunu'u.

O le susuga Sam Montalvo, mai le setete o Hawaii, lea sa malaga mai, ma ia fa'atautaia le a'oa'oga mo tagata laufali i ta'aloga a le tatou atunu'u, ma ua auai atu nei o ia i le malo o Ausetalia mo le fa'afoega o ta'aloga Volleyball a lea fo'i malo i le taimi nei. I le taimi nei o ituaiga pepa fa'amaumau nei ua fa'aaogaina tutusa uma lava e so'o se malo o lo'o ta'a'alo i le Volleyball ma ua lisia o le FIVB Scoresheet.

LOIA TAGATA LAUTELE - TATAU ONA I AI SE DRUG REHABILITATION CENTER

O le ali'i Loia e tula'i mo tagata lautele, Public Defender Michael White, na ia  fa'ailoa lona sapaia le fa'atuina o se nofoaga fa'apitoa e tau togafitia ai i latou ua tagofia fuala'au fa'asaina ma vaila'au o'ona ma ua a'afia tumu ai fo'i mafaufau ona o lea aga.

I lea nofoaga o le a toe taumafai ai togafitiga e fa'aautu i o latou a'afiaga, ma tima'iga mai sui ua agava'a e feagai ma i latou na, ina ia mafai e i latou na ona toe fa'asagatonu o latou mafaufau ma toe alo'ese mai ai i nei ituaiga o olaga o lo'o aafia ai ma i'u ai fo'i nisi ina solituina ai tulafono e i latou.

O le mau ina ia fa'atuina lea nofoaga sa fa'atuina lea e le afioga le Ma'oputasi Mauga Tasi Asuega.

"E matua'i mana'omia lava lenei ituaiga nofoaga i Amerika Samoa nei. O lea fo'i ua mae'a fa'atuina le Behavoral Health Center, ae tatau ona i ai fo'i ma le nofoaga lea fa'apito augafa i le togafitiga o e ua a'afia tele i a'afiaga o le tele o le tagofia o vaila'au o'ona ma fuala'au fa'asaina,” o se tala lea a White.

O le manatu fa'aalia o le susuga le Failautusi o le Mataupu Tau Samoa sa ia fa'ailoa ai, "Ua na'o le pau le mea ua faia i a tatou fanau o le tala'u i le falepuipui ona ua maua o lo'o tagofia pe tufatufaina atu fo'i fuala'au fa'asaina ma vailaau o'ona i nisi o le atunuu, ae tatau ona taumafai se togafitiga fa'apitoa mo i latou ina ia le toe faia ai e i latou. Ua tatou iloa lelei, e tagofia loa e fanau, matua pe laiti nei mea uma ua lisia o fuala'au fa'asaina ma vaila'au o'ona, o iina lava e le toe mafai ai ona taofia, ua foliga mai ua mana'o pea i ai le tino ma ua le mafai e le mafaufau ona fai atu i le tino ma le mana'oga e taofi, e leaga."

Ua le au ese le manatu fa'aalia o le afioga le Ma'oputasi ia Mauga, i le anoanoa'i o le fanau ua a'afia i lenei fa'afitauli, ma ua pepesi ua sili atu ona leaga nai lo se fa'ama'i pepesi e a'afia ai le to'atele. O fea e fa'aautu i ai le tigaina, o totonu o le li'o ma le lotoifale o aiga ta'itasi. "O lea ua tatau ai ona faia se gaoioiga tatau a le Malo, ina ia taofia lea tulaga ma fa'atuina lea nofoaga e saili mamao ai i togafitiga talafeagai”.