TAUA'AO FA'AILOGA A LE "TRIO" FA'ATUPE FETERALE -  DR. ANDREW AH YOUNG AMERIKA SAMOA

Sefulu fitu tausaga talu ai na talosagaina e Andrew Ah Young le fa'atupega a le feterale ua fa'aigoaina o le "TRIO" a le Polokalama o le Upward Bound, ina ia avea ma ala e totogia ai ana a'oa'oga i suesuega fa'asaeanisi, peita'i i le mae'a ai ona a'oga ma sailia ona fa'ailoga maualuluga i lea lava fa'atupega, ua taua'ao aloa'ia ai ia te ia le fa'ailoga fa'apitoa, "TRIO ACHIVER" po'o le sui sa agavaa i le fa'atupega, ma ua iloga lona tula'i mai ua ia gafatia ona fa'amautu lana sailiga sa fa'atupea mo ia.

"O le tama'ita'i sa fa'auluulu i ai le Upward Bound na ia una'ia malosi lava a'u ou te ulufale i le Upward Bound i le amataga o le olaga a'oa'oina i le a'oga maualuga i Tafuna Level 9, ma tausailia ai se avanoa e fa'atupe ai au a'oa'oga i suesuega fa'asaeanisi pe a o'o ina fa'ai'uaso. O ia lea o Apulu Veronica Mortenson. Fa'afetai na talileleia mai, ua fa'aaogaina, ae o lea ua latou fa'aeaina a'u  i lenei fa'ailoga, e tamau ai le taumafaiga ua mae'a. E si'i le vi'iga i le Atua, aua o ia na faia avanoa lelei, alofaina le taumafaiga i so'o se mea,” o se tala lea a Dr. Ah Young.

O le aso 19 Fepuari 2019 lea na tula'i ai lea alo o Amerika Samoa, sa fa'au'u mai Tafuna High School i le 2005, e talia lona fa'ailoga i le Hyatt Reancy i Phoenix, Arizona.

O lona fa'ailoga PhD in Biological Chemistry, lea ua fa'ailo i le avea ma Foma'i [Dr.] na maua lea i le tausaga 2015 ina ua mae'a ana a'oa'oga i le UCLA, ae ua 26 ai tausaga o lona soifua.

E le'i mamao atu na toe taliu mai ai Dr Ah Young e tali lona vala'aulia e saunoa fa'apitoa mo le vasega fa'ai'uaso 2017 i le A'oga maualuga a Tafuna. O ia o se alo e fa'asino i le tama o Su'a ma Luisa Ah Young mai Faleniu.

I lana saunoaga i le taimi na talanoa mulimuli ai i le Samoa News, e tusa o lana taumafaiga, sa ia fa'ailoa ai, "E ui lava ina faigata, ae ua malosi le loto e taumafai, aua e mana'omia lava ona i ai se ituaiga fale fa'apea mo tatou fanau i le tatou teritori, sa sailia ai le togafitiga o gasegase, aua ou te iloa ma talitonu, o le tele o fa'ama'i o lo'o fa'agasegasea ai le atunu'u, o lo'o maua lava vaifofo mai le tele o la'au ua fa'aola e le Atua i o tatou laueleele ma lo tatou gataifale."

Ua ia fa'afetaia fo'i le tapuaiga ma le nofo tatalo o matua ma aiga, le fesoasoani sa faatupea lona ola taumafai i a'oa'oga maualuluga, lea ua toe fa'apale o ia i lea fa'ailoga, ae maise le alofa le mavae o le Atua i lana taumafaiga.

TAU MAGOTO LE MV SILI A'O TAULA I LE UAFU I FAGATOGO:

Ua faailoa mai ua le o toe mamao ona ave lea o le MV Sili e faia lipea i le mea toso va’a i Satala, ina ua mae'a ona tau magoto i le suasami le vaiaso na te'a nei. O le tala mai e fa'apea na matauina e se tasi o le au Inisinia o le Sa'ilele sa taula latalata ane i le MV Sili ua iloga mai ua maulalo le va'ai atu i le tu mai a le va'a. O ia lena sa alu e siaki totonu o le va'a i lea potu o i ai le afi, ae maua atu ua o'o mai luga le suavai ae na'o le afi lava e le'i lilo i le suasami.

Na fa’ailoa e Lt Al Blaiddell o le US Coast Guard, o le ali'i Inisinia lena sa ia mua'i mauaina lea fa'aletonu ma sa latou fesoasoani loa i le aufaigaluega a le Uafu tele e pamu i fafo le suasami lea ma ua mafai ai ona le magoto le MV Sili i le taimi lava lea.

O le taimi nei e le toe fealua'i lea  Sa i se taimi umi, peita'i o le va'a lea sa fa'amoemoeina mo fela'ua'iga o pasese ma uta i le va o Tutuila ma Manu'a mo le 20 ai lenei o tausaga.

DANIEL T. HOLIADAY - LOIA FOU PASIA TAUTUA I AMERIKA SAMOA MAI LE RDA LAW FIRM

Ua fiafia le Ofisa Loia a le RDA Law Firm e fa'alauiloa se tasi o latou ali'i Loia fou ua mae'a pasia fo'i e ia agava'a uma e avea ai ma Loia i le atunu’u, ae tautua mai lava i le latou Ofisa Loia.

O lenei ali'i o Daniel T. Holiaday o se tasi e matua palagi lava, ae aua ne'i e fa'atamala i ai, o le matua lelei lava o lana gagana tusitusi ma tautala i le faa-Samoa ma o se tasi o mea ua atili ai ona fiafia le RDA Law firm e fa'afaigaluega o ia i le teritori. E matua malamalama ma lelei fo'i le fa'asamoa a lenei ali'i Loia.

E lua lelei tausaga o nofo lenei ali'i i Savaii se'ia o'o mai I Tutuila nei ma i lona taliu atu i lona malo, sa ia taumafai loa i sana galuega e mafai ai ona toe taliu mai ma aoga mo tatou tagatanu'u, le atunu'u ua fiafia tele o ia e nofo ai.

Na a'oga o ia i Bringham Young University Provo Utah, ma soso'o ai ma lona toe ulufale i le Frederck G. Levin  School of Law i le Iunivesite o Florida.

Ona o le naunauta'iga sa ia te ia e toe fia taliu mai lava e galue ma nofo i Samoa, o lea ua ia tapena ai lona agavaa ia mautu lelei, ona fa'ato'a taliu mai lea e fa'aaoga lona iloa mo tagata Samoa.

"Ona o le aganu'u sili ona matagofie lea sa ou ola ai ma tautua i tala'iga i Samoa nei, ua ou filifili ai e tautuaina nai o tatou tagata i lea avanoa lelei ina ua fa'asalalau atu le avanoa mo se loia i le RDA Law Firm,” o sana tala lea. "Ou te mana'o ina ia fa'asamoa mai tagata e gasolo mai ia te a'u, ou te malamalama ae fia fa'alautele atili lo'u iloa o le gagana."

TU'UA'IA LE ATOA PEPA ULUFALE I AMERIKA SAMOA - TOE FO'I I FITI

I lipoti mai Samoa, ua fa'ailoa ai le toe fa'afo'ia o le to'a fitu o tagata mai Asia na fia toe fo'i mai i Amerika Samoa ina ia fa'afaigaluega e le Va'a Fagota. Ua tu'ua'ia e le Ofisa Malaga i Samoa, e le o atoatoa pepa e mafai ai ona ulufale mai i Amerika Samoa.

O le to'afitu lea ua toe fa'afo'i sa'o lava i Fiti i le mea na mulimuli malaga mai ai.

Peita'i ua fa'asea se tasi o le Ofisa Malaga sa fa'atautaia ma tu'ufa'atasia pepa malaga uma o i latou nei, le Ofisa Malaga o Samoa, ona ua le galulue fa'atasi mai, mo le toe fa'afo'ia mai o latou tama fagota.

O le fa'aiuga e le tatau ona fa'aauau mai lea faigamalaga, na faia tonu lea e le CIO o Samoa, Valavala Siaopo Pese, ina ua ia iloa patino e le o i ai ni pepa e ulufale mai ai le to'aiva lea i Amerika Samoa nei, ma ua toe fa'afo'i ai lava i le va'a na malaga ane ai i Samoa.

I le taimi nei, ua te'ena e le Ofisa Malaga sa tapenaina nei pepa mo sui nei e to'aiva le i ai o se mea fa'apea o lo'o tupu, ua fa'ailoa mai e i latou, sa tofu lava le to'aiva ma le pemita e ulufale mai ai i Amerika Samoa, ae ua le mautinoa e i latou le mea ua le talia ai pemita o isi e malaga mai ai, ae ua toe fa'afo'ia i Fiti.