28 MOLI ALATELE MO PAGO PAGO TALU MAI GITA

Va'aia le fiafia o nai aiga tuaiala o le afio'aga o Pago Pago ina ua to'ai taunu'u atu le ta'avale a le ASPA, ua mae'a ona la'u atu ai matauila ma nisi o mea faigaluega e fa'aleleia ai moli na fa'aleagaina talu le afa o Gita i le 2018.

"Ou te iloa ua atoa lelei le tausaga, ae o lea fa'ato'a mafai ona fa'atino lea galuega lipea a le ASPA mo si matou afio'aga nei. Peita'i. o lo'o taumafai fo'i i latou e fa'asolo le tautua i nisi afio'aga. Ona o le talanoa atu lava fo'i i ali'i o lo'o latou pulea lea itu o le tautua a le ASPA, ia lea ua tali mai. Ona o le fa'apogisa fo'i o le afio'aga, e tele ai fo'i fa'atasiga le lelei e ono tutupu  mai ma le saogalemu ai le tofaga o lea afio'aga i maota ma laoa,” o tala lea a le ali'i Faipule fou o Pago Pago, Vesiai Poyer Samuelu.

"A'o le'i fa'atautoina lo'u nei sui faatauva'a i le nofoa o le afio'aga, sa ou talosagaina loa lea fesoasoani, aua ua iloga fo'i i taimi o talanoaga ma tagata o le matou afio'aga a'o taumafai mo le nofoa, o lo'o ua mana'omia lava ona toe fa'amalamalama le nu'u ua fai si leva o pogisa, e le'i toe mumu mai lava moli talu mai ona mae'a laveia i tatou i le afa o Gita. E ui la ina e le'i o'o mai a latou sapalai fou o moli, ae ua tali mai lava le pulega o lea vaega o le ASPA o le a fa'aaoga mai moli o toe lipea ina ia fa'amalamalama ai si o matou afio'aga i lenei vaitau."

I le galuega lea sa tula'i atu ai ali'i talavou malolosi mai le 'au toso laina eletise a le ASPA, o Mulu, Savea ma Faga ma ua latou a'e i luga o pou moli uma lava ua mae'a fa'ailoga e le ali'i Faipule o Pago Pago, ua pepe, aumai i lalo le matauila, suia totoga ma toe fa'aola pe o lelei, ona toe fa'apipi'i lea ma fa'aola.

Ua faailoa mai o le tele o oka moli fou e le'i to'ai taunu'u mai aua o lea na fa'ato'a fa'alauiloa mai ua mae'a toina mai e le FEMA le aotelega o le talosaga a le malo i mea na fa'aleagaina e Gita, ae e ao fo'i i le malo ona fa'amatu'u i matagaluega ta'itasi a latou vaega o lea tinoitupe, e tusa ma latou tu'ufa'atasiga o mea na fa'aleagaina.

TUUA LE MALO MRS. LEALA ELISARA PILI

Pe afai e manatu se tasi e tu'uina se foliga i le tatou Falema'ataga "Jean P Haydon Museum" i Fagatogo, e mafai ona tu'uina i ai foliga tausa'afia o le fa'atina o lea ofisa, lea sa avea ai o ia ma Fa'atonu mo se taimi umi, e silia ma le 20 tausaga. Na maliu filemu o ia i le Falema'i tele i Faga'alu, ua 82 tausaga o lona soifua.

I lona tula'i mai o le Fa'atonu o le American Samoa Arts Council, sa matua iloga ana taumafaiga malosi ina ia fa'ao'o mai i laueleele o le atunu’u le "Fa'aaliga o Tu ma Agaifanua a le Atuvasa" lea na tatou taligamalo ia Iulai 2008.

E le fesiligia fo'i lona naunau ma lona fa'amalosi'au i tupulaga talavou o le atunu'u ina ia fiafia e fa'afiafia fa'aleaganu'u, ia tula'i mai e fai sou sao i ana galuega alofilima, ma una'ia malosi fo'i le polokalama mo le vaitau fiafia o le tausaga, Kerisimasi ma le Tausaga fou i Pesepesega sa fa'atino e matagaluega uma o le Malo.

E le gata i le Malo ana taumafaiga i lea itu, ae ua iloga fo'i i lona nu'u o Fagatogo, ae maise i totonu o lana Ekalesia i le Mafutaga a Tina ma lona avea ma Tiakono Tina i le Ekalesia Fa'apotopotoga Kerisiano i Amerika Samoa.

Na fa'aauau lava e ia le tele o polokalama e fa'atino mo le Tu'uaga Umi o A'oga i le Taumafanafana, lea e a'oa'oina ai talavou laiti i le atunu'u i galuega alofilima fa'asamoa, ae maise i aga o Fiafiaga Fa'asamoa e aofia ai Pesega ma Siva, ae maise o le tomai e gaosia oloa fa'asamoa, o le elei ma le ie valivali, o mea e mafai ona sailia ai le tamaoaiga tausi o aiga Samoa, aua e alumia oloa na i le gaosiga o Lavalava Samoa e iloga ai i so'o se atunu'u pe a la'ei ai.

E le gata i lea sa to'atele fa'alapotopotoga, Autalavou ma afioaga sa ia fa'aosofia ai le olaga fiafia e fa'aalia latou taleni i le vaitau o Fa'afiafiaga mo le Sisigafu'a i lona fo'i tulai mai.

O nisi sa latou galulue fa'atasi mai lava i lana ta'ita'iga o lea ofisa e aofia ai Rex Yandall, ua maliu fo'i ma le susuga Matini Purcell.

"O Leala Elisara Pili, e le o se tasi e iloa ita i se isi o matou, e fa'aosofia le fiafia i taimi uma e galulue fa'atasi ai ma ia, aua e foliga mai o se matou tina, ma e fetufa'i fo'i lagona e pei o le tina ma lana fanau. E uma lava le aso o fiafia fa'atasi e fa'atino tiute, ma afai fo'i e i ai ni fa'aletonu, e soalaupule lava matou ma faia le fa'aiuga fa'atasi i se mea e lelei ai. Ua misia o ia ina ua malolo mai le galuega, ae ua silia ona misia o ia i le taimi nei, aua ua le toe maua se so'otaga i lenei lalolagi ma ia. O se tina e tautua ma le fiafia, e tautua ma fia fai mea sili,” o se tala lea a Purcell e tusa o le la'ua mafutaga i le galuega ma Leala, lea na fa'ato'a ulufale atu o ia i le Arts Council i le 1986, ae ua mae'a galue Leala Elisara Pili i lea matagaluega.

"O lea ituaiga ta'ita'i e faigata ona fa'agalo, aua na te lagonaina lagona o tagata faigaluega. E malamalama lelei fo'i i mea ua fa'aletonu ona fa'atino, ma e tu'u avanoa i le vaivai ma fa'ailoa ia i matou le mea e ao ina fai. O ia e foliga mai o se tina moni lava.”

I le afio'aga o Fagatogo, e matua iloga ai lava ona tulaga vae, e matua fa'afiafia tagata o ia, ma o lo'o mausali lava nisi o lana 'au Kirikiti i lenei vaitau. "Po'o le a lava le umi e iloga lava tulaga vae o Teine o le Malae o le Talu, e le toe i ai se isi 'au kirikiti a Fagatogo e avea le manulauti lena sa fa'asifo i taimi o le talavou matou tama'ita'i o le Malae o le Talu. O taimi o le fiafia fa'atasi o le auuso ma le malosi fo'i e le'i avea,” o se tala ata lea a le tama'ita'i o Leleaga Frank Reid, lea ua alaala nei i Vailoatai.

Ina ua malolo mai o ia i tiute fa'alemalo, ae afai e te malaga atu i le Fonotele a le EFKAS i so'o se tausaga o lena vaitau atoa na malolo mai ai i matagaluega o le Malo Amerika Samoa, o lo'o tutula'i mai o ia i le Komiti o le Tupe ma o i latou e fa'atautaia le po o Fa'afiafiaga a le Ekalesia Aoao.

Ua sola le tina i le olaga nei, peita'i ua fai pea ma va'aiga ia te ia si ana fanau e to'a tolu, o fanau a lana fanau, ma fanau a fanau a ona alo.

TAUNU'U MAI TINO MALIU FA'AMASINO LYLE RICHMOND - SAUNIGA FEPUARI 15, 2019

O le po o le aso Tofi o le vaiaso ua te’a sa taunu’u ai i fanua le Sa o Lyle Richmond, le sa avea ma Fa'amasino Lagolago i le Fa'amasinoga Maualuga, a'o le'i litaea ona ua fa'agasegasea.

Na maliu filemu Richmond ia Ianuari 21, 2019  i le Queens Medical Center i Honolulu.

E pei ona fa’ailoa i se fa’asalalauga a le aiga, o le aso Tofi, Fepuari 14, 2019 i le itula e 3pm o le a faia ai lona sauniga i le malumalu o le LBJ Medical Center ma molita'i atu ai lona tino i lona maota i Lepuapua e feiloa'i ai ma ona aiga se'ia aulia le aso Faraile 15 Fepuari, 2019 ona fa'atautaia lea o lona toe sauniga i le Malumalu AOG Calvalry Temple, i Lepuapua  i le itula e 11:00 i le taeao, ma soso'o ai lava ma lona falelauasiga i lona Nofoaga tumau i lona maota i Lepuapua lava.