FA'AALIGA FA'ASAEANISI E FANAU AOGA TULAGA MUAMUA

Ua amatalia le fa'aaliga o galuega fa'atino fa'asaeanisi a a'oga tulaga muamua i le teritori. O lenei tauvaga o lo'o ua nafa ma le vaega a le OCI a le Matagaluega o Aoga.

"Ua va'aia lava le aga'i i luma o tapenaga a le fanau a'goa o lo'o fiafia pea e fa'aalia fo'i a latou sailiiliga fa'asaeanisi e ala i lea ituaiga o fa'atinoga. O se mea lelei, e fa'ailoa ai ua fiafia le fanau e latou te fa'ailoa mai o latou tomai ua agai i luga e ala i a latou folasaga ua fa'ailoa mai i a latou galuega fa'atino nei,” o se tala lea a se tasi o faia'oga i le a'goa tulaga muamua a SBA i Happy Valley, o lo'o ia va'aia le latou vasega o fanau a'oga ua fili mo le Science Fair i lenei tausaga.

"O se fiafiaga lea i faia'oga, aua o i latou e a'oa'oina i latou i potu a'oga, ae o i latou e tali mai e tusa o galuega fa'atino, ua galulue ta'ito'atasi i ai, pe fa'apa'aga fo'i,” o sana tala 'ata lea a'o tatalia pea se fa'aiuga o le tauvaga o lo’o faia i le Army Reserve Center i Tafuna.

O nisi o fanau ma latou galuega ua matauina e fa'aautu le tasi i le ulaula sikaleti ma ona a'afiaga i le soifua maloloina.

E ese mai lea ua talanoa le tasi tamaititi a'oga mai le SBA, i le aoga o se tasi o la'au toto ua igoa o le Pride of India po'o le Banaba i le tau togafitia lea o le ma'i Mumu Tutupa. O nisi nei o ala e mafai ai ona maua se fesoasoani i togaiftiga o lea gasegase leaga tele mo tagata lautele o le atunu'u, ae maise i latou ua a'afia tele i lea ma'i mataga.

O le galuega a le tama'ita'i mai le a'oga a Lauli'i Elementary ua ia fesiligia ai, "Pe mafai e le tamai una ona avea ma Uu tele lava lea e fiafia tagata e fafaga ia lololo ona fa'ato'a kukaina lea ia lava ai le aiga atoa?”

Folasaga a le tama'ita'i mai Tafuna Elementary e tusa o le  Ma'i Papala lea e ta'ua i le Tusi Pa'ia, o le mala lona 10, e te alu atu fo'i e saili sou togafiti i lou mageso, ae o loo valu mai fo'i le fomai latou. "Scary Scaies!"

O le folasaga lea e fa'atatau i sikareti, ua fa'ailoa mai ai le a'afiaga o tamaiti talavou ae ulaula, ua malosi tele le sikaleti, ae o lo'o mu'amu'a lava o tatou mama, pe afai o le a e filifili e te amata ulaula o e la'ititi.

O le autu o folasaga ua taumafai i ai le fanau, ma ua tapena fo'i e le OCI/DOE lea autu: "Ia tausailia le 'auga!"

LE MAU - A'O'OGA FANAU O OLA MA AFAINA TAU LE TINO & MAFAUFAU

O le fanau ua soifua pea ma afaina tumau o le tino ma le mafaufau ma o lo ua taumafai e tausailia le atamai i Kolisi ma Iunvesite, sa pa'au tonu mai lava Dr Glenn  Gabbard ma lona atali'i o Max Rasbold Gabbard e talanoa patino i ai. Ua ia fa'ailoa ia i latou, "Pe na fa'apefea ona tatou o'o mai i le taimi nei? Ma o fea fo'i o le a tatou aga'i atu i ai?" O le 'auga lea o lana tautalaga atoa lava.

O le ali'i foma'i fo'i lenei, sa ia taumafai atili ina ia gafatia ona fa'aulu fanau ua mautinoa o lo'a afaina tumau tino ma le mafaufau i totonu o Kolisi ma Iunivesite, ma e le'i maluelueina lava lona lea taofi.

O le vaiaso na te'a lea na i ai i la'ua i le Kolisi Tu'ufa'atasi o Amerika Samoa ina ia lauga fa'amalosi'au i le fanau fa'apitoa lea o lo'o a'otauina ai, fa'atasi ma o latou faia'oga ma le pulega.

I lana lauga fa'amalosi'au ina ia tatou taga'i toto'a ia i latou ua soifua ma nei fa'aletonu tau le tino ma le mafaufau, "Ia tatou le manatu o i latou o nisi ua fa'atigaina tagata, ae ia tatou va'ai ia i latou o nisi ua ave'esea fa'amalosi nisi o latou mana'oga fa'apitoa po'o a latou aia tatau i se olaga sa'oloto ma gafatia ona faia mea uma ua manatu ai i latou."

Aisea ua mafuli ai Dr Gabbard e matua sofa'i lea mataupu, tula'i ai e una'ia le mau, ia aia tutusa fanau ua soifua ma fa'aletonu tau le tino ma le mafaufau, ma le to'atele o le fanau e  o lo'o soifua saoloto mai na faigata? O lo'o soifua lea aiga ma se tasi o le fanau, o lo'o ua soifua ma nei afaina tumau.

O Dr Gabbard sa amatalia atu lana taumafaiga e unaia malosi avanoa e a'oa'oina tutusa ai fanau uma fa'atasi ma i latou ua i ai afaina tumau i le tino ma le mafaufau i le tatou nei malo. O ia na soifua a'e i ona matua i Leloaloa, ma a'oga i le Samoana High fa'au'u mai ai i le tausga e 1971.

Malaga i fafo e sailia lona tusi pasi maualuga i le Kosi o le English Literature i le Sonoma State University, ma toe taliu mai i Amerika Samoa i le tausaga e 1977 ma faia'oga ai i le tatou Kolisi Tu'ufa'atasi.

I le tausga e 1983, na soifua a'e ai si ona afafine o Megan Ali'itasi Rasbold-Gabbard i le falemai i Faga'alu. Ae ave faatopetope Megan i Hawaii ina ia mafai ona soifua pea, ma ua pule alofa le Atua o lo ua soifua pea o ia, ae i ai ona afaina tumau tau le tino. Ua tumau ia te ia le celebral palsy.

I le taimi nei ua avea nei Dr Gabbard ma se tasi e fa'afeso'ita'ia mo le auaunaga a le Red Wheelbarrow Consulting LLC, o i latou ia e mafai ona fa'afeso'ota'i mo ni fesoasoani pe afai e i ai se tasi ua ia lagona ua sopoia lana aia tatau e soifua fiafia ai ma a'oa'oina tutusa ma isi uma i lea lava setete.

O le la'ua malaga mai i le tatou atunu'u, ona o lo'o ua taumafai ina ia fa'atula'ia le Talavai fou lea a le Matagaluega o le Soifua Maloloina, "Family to Family Health Inrmation Center!" po'o le "Aiga Feso'ota'i mo Fa'amaumauga Soifua Maloloina!"

TAOFIA AOGA A LE MALO ITU I SASA'E O TUTUILA - ASO LUA, 12 FEPUARI

I le vaveao ananafi na pa'u ai le la'au tele i luga o le laina ola o le Eletise i le afio'aga o Alofau ma motusia ai le eletise i le tele o nu’u i lea itu o le motu ma sa mafua ai ona tapunia aoga a le malo i le aso ananafi.

O ia aoga e aofia ai aoga tulaga muamua i Alofau, Lauli'i, Olomoana ma Matatula ma le a'oga Maualuga i Fagaitua i lea lava taofiga.

Ua fa'ailoa mai fo'i, talu mai le taimi na motusia ai lea uaea malosi o le eletise, e o'o mai i le taimi ua amatalia galuega ma fa'asolo atu aga'i i le aoauli, ua galulue pea le aufaigaluega a le ASPA e toe fa'aleleia lea laina ua motusia ina ia mautinoa ua toe a'e a'oga i le aso lenei.

GALUEGA FA'AMAMA MUAMUA 2019 - MO LE MOTU ATOA:

Ua fa'ailoa mai, o lo ua amata fuafua nei le galuega fa'amama muamua mo lenei tausaga 2019 ma o le a va'aia fo'i le tu'ua o Ofisa ma galuega a i latou uma e faigaluega ai, ae masi'i mai i fafo e matua salu, vele ma fa'amama autafa o le alatele, ma nofoaga faitele o le a fa'atulaga e nafa ma lea matagaluega ma lea matagaluega o le malo.

Ua fa'atulaga lenei galuega e le Komiti Fou mo le Fa'amama ua tutulai i lenei tausaga, le CEO o le ASPA Wallon Young ma le Faatonu o le ASEPA Fa'amao Asalele Jr. lea e ta'ita'ia.

Ua lagolagosua atu fo'i i ai ma le susuga Tialuga Vince Iuli i lea lava taumafaiga ma ua fa'asalalauina fa'alaua'itele i le televise lea fa'amoemoe, ina ia fa'autagia e le mamalu lautele o le atunu'u, "Taofi le Fa'aotaota! Fa'amatagofie Amerika Samoa!" O le fe'au lea ua avatua e lenei galuega fa'amama tele muamua o le 2019.