Ads by Google Ads by Google

Tala I Vaifanua


O se va'aiga i le to'a 18 o i latou fou ua ulufale i le PTK National Honor Society a le ASCC i le sauniga sa faia i le afiafi o le aso Tofi ua te’a i le ASCC Multipurpose Hall. [ata: Leua Aiono Frost]

18 SUI FA'AULUFALE PHI THETA KAPPA - KOLISI TUUFAATASI

 

O le afiafi o le aso Tofi na fa'atautaia ai le sauniga e fa'aofi ai le isi to'a 18 o fanau a'oga ua ausia togi maualuluga i a latou mataupu o tau'avea i le Kolisi Tu'ufa'atasi o Amerika Samoa.

 

O i latou nei sa tutuina fo'i moli ga'o e fa'amau lo latou tu'utoina o latou olaga a'oa'oina, e fa'ataunu'u ai e i latou mana'oga uma o le avea ai ma sui totino o le PTK Honor Society. E ese mai lea sa latou fofogina fo'i le tautoga fa'atulaga ma fa'afofogaina fo'i se lauga fa'amalosi'au a le tama'ita'i o Savannah Fonoti, lea o lo'o faigaluega nei i le Special Education Program a le Mataglauega o A'oga a le tatou malo, ma o se tasi fo'i sa avea ma totino o le PTK NHS i le taimi na a'oga atu i le Kolisi.

 

O le tama'ita'i Teutupe o le Sosaiete, Maryanne Fa'atau, sa lauga fa'afeiloa'ia i le sauniga i le potu fono o le ASCC Multi Purpse Hall.

 

O le tama'ita'i sui Peresetene o le PTK NHS Epifania Petelo sa ia fa'alauiloaina le fofoga o le afiafi.

 

O fou sa fa’auluina: Lyndsey Laupola; Alphina S Liusamoa; Fuamai A. Tago; Christine Tominiko; Tamara Makailo; Angelo Micah Mayer; Malae Judy Vaimoli; Naoiailagi Senio; Jadine Laumoli; Ripena Ioane Aitaoto, Julia Akenese Fa'aiu; Finiana Finau; Angel Amosa; Satauroolealofa Evelyn Pulu; La'auli Malotumau Ifopo; Tofiga Tufele; Apoiliu Atuaia ma Theresa Ping.

 

I lenei tausaga o le Peresetene o le PTK NHS o Precious Ameperosa, Sui Peresetene o Epifania Petelo, Teutupe o Maryanne Fa'atau ma le Failautusi Marqueritta Tanuvasa.

 

FILIFILIA SUI FOU ASOSI VOLLEYBALL AMERIKA SAMOA - ASVA

 

I le aso fono a le Asosi Volleyball a Amerika Samoa i le vaiaso na te'a, na fa'atulaga ai fo'i ma le palotaina o latou tofiga fou mo le 2019, ma tapena ai fo'i a latou tapenaga mo ta'aloga fa'avaomalo i lenei tausaga, lea e aofia ai ma Ta'aloga a le Pasefika i Samoa.

 

O i latou ua tutula'i nei i le laulauatofi o le ASVA: Peresetene - Ben Sauvao; Sui Peresetene o Meleisha Purcell; Failautusi o Pona Sitagata-Ala; Teutupe o Jayleen Chun.

 

I lea lava fo'i fonotaga na sailia ai sui totino e nofoia nofoa o le Komiti Fa'afoe ma ua tulai mai ai: Rev Nepo; Rev. Mariner; Meleisha Purcell; Palemene Palemene; Pona Sitagata - Ala; Jayleen Chun; Fa'alialia Mauigoa; Peni Tautunuafatasi ma Ben Sauvao.

 

I le tala mai e tusa o tulafono fou ua fa'aulu ma fa'aaoga i le taimi o ta'aloga fa'avaomalo, ua mae'a soalaupule ai le tatou sone fa'a-Oceania lea sa malaga ai Sauvao, ua fa'alauiloa mai ina ia auai uma sui faia'oga o 'au taitasi i le aso Tofi o le vaiaso nei, 14 Fepuari 2019 i lea fonotaga e faia lea i le Ofisa o le NOC ma ua fa'atulaga ai fo'i le talanoaga o le fa'afautaiga o le Ta'amilosaga Volleyball mo le Fu’a i lenei tausaga.

 

"E taua lava le i ai o se sui iloga o 'au Volleyball ta'itasi i lea fonotaga, e vala'au fa'apitoa fo'i i nisi o Ekalesia, Autalavou ma afio'aga fo'i o lo'o fia fa'aulu ni a latou 'au Volleyball a teineiti laiti U18ma Tama fo'i; Au VolleyBall a Tama'ita'i ma Ali'i Matutua; ina ia auai mai. E taua le malamalama lelei fo'i i ni suiga ua mae'a talanoaina e sui o le Sone o aofia ai i tatou fa'atasi ma nisi o malo tetele, e ao ai ona matua a'otauina lelei o tatou fanau i le fa'agatama ma ona tulafono o lo'o ua tauva ai nei fa'avaomalo,” o se tala lea a Sauvao.

 

FA'AMAE'A DOH TUIGA O A'OGA MO LE MENINGOCOCCAL

 

I se talanoaga ma le 'au fa'asalalau ia Fepuari 08, 2019, ua fa'ailoa mai ai e le Matagaluega o le Soifua Maloloina, ua mae'a lelei le latou fa'asologa i tua i a'oga, mo tuiga o fanau e i le va o le 11-18 tausaga le matutua, mai le fa'ama'i o le "Fiva Fai'ai" po'o le "Fa'ama'i o le Maualuga o le Fiva."

 

I le fa'aiuga o latou tuiga i a'oga ua mae'a fa'amauina mai ai e le Matagaluega le to'a 2,085 MCV ua mae'a ona tuia i fanau i totonu o a'oga i le teritori - aoga tulaga muamua ma a'oga tulaga lua. I lea aotelega e tusa ma le 73% o fanau a'oga ua mae'a maua lea tui puipuia.

 

I le taimi lea na fa'asolo atu ai i latou i tua i a'oga mo nei tui, ua maua ane ai e le Matagaluega o le Soifua Maloloina e na'o le 30% o le fanua a'oga ua mae'a o'o i le 14 tausaga le matutua ua mae'a faia le tui MCV lea, i le tuiga lona lua, ae ua mae'a o latou tui muamua.

 

Ua fa'ailoa mai e le tama'ita'i Fa'atonu o tama'ita'i tausima'i a le Soifua Maloloina, Margeret Sesepasara, "E mana'omia tele le tui lona lua lea mo fanau talavou lea e i le va o le 11-18 tausga le matutua ina ia mautinoa lava ua le a'afia i le meningococcal i le taimi nei. O le fa'afetai e avatu i matua i le vave o le gaoioiga  ina ua fa'ao'o atu tusi a le fanau talavou, ma toe fa'afo'i mai ua mae'a sainia."

 

"I nisi o le fanua o lea ua atoa le 16 tausaga le matutua, ae maua ane i faamaumauga o latou tui puipuia, e le'i faia lava le tui muamua lea e ao ina faia a'o le'i a'e i le a'oga maualuga, 14 tausaga le matua, o le vaega la lea ua fa'atonuina lelei, ina ia toe taliu ane i le falema'i e toe tuia le tui lona lua i le tausaga a sau, a'o le'i a'e le a'oga. O le tui lona lua lea e le'i faia o nei fanau."

 

E ese mai nei tui mo le Meningococcal, ua maua ane fo'i nisi o le fanau talavou ua matutua lava, ae le'i faia ni tui HPV ma le Tetanus/Dipheria. O i latou la nei, ua tuiina uma lava le tolu o latou tui nei, ia mautinoa lava ua agatonu o latou tino tuputupu a'e ma le fa'asologa o latou tui puipuia.

 

O le aso 1 Fepuari, 2019 lea ua fa'amauina lava ua fa'amae'a uma ai le fa'asolo o le Matagaluega o le Soifua Maloloina e faia tuiga mo le fanau talavou mo le Meningococcal ma ua sailia atu ai fo'i ma isi tui puipuia poo a mai i si tui puipuia o fanau uma o loo i a'oga maualuluga ma a'oga tulaga muamua i le atunu'u.

 

O isi fanau uma na ave pepa e fa'atumu mai ae le'i toe taliu ane ma nei pepa mo matua e sainia ma faia ai latou tui puipuia, ua lisia o latou suafa ma o le a taua'aoina lea i le Matagaluega o A'oga, ma e 30 aso o le a tu'uina i a'oga e fa'ailoa atu ai i matua o nei fanau le tulaga o i ai latou tui puipuia ma e tatau ona fa'ao'o i latou e faia o latou tui, a leai o le a faia loa e tusa ma le tulafono, o le taofia lea o fanau nei mai le toe a'o'oga.

 

Aafai o le a mae'a ona faia tui o lou alo, e ao ina toe aumaua se pepa fa'atumu mai e foma'i ua mae'a faia tui puipuia o lou alo sa misia. E fa'ailoa atu i matua, ia utagia lava lea fa'aaliga taua.

 

LA'U LAPISI ITUAIGA O ELETORONISI E LE SWIRE SHIPPING LE TOTOGIA

 

O nisi o ituaiga o oloa e le mafai ona tia'ia solo i o tatou laufanua, o ituaiga oloa nei e pei o televise, computer tuai ua le toe aoga, masini kofe ma isi anoanoaa'i o oloa e fa'aaogaina le eletise, ae le mafai fo'i ona so'otia'ia i le fa'atafuna i Futiga.

 

Lea ua fa'alauiloa atu le fesoasoani lelei tele ua faataunu'uina nei e le Swire Shipping, se tasi o pisinisi La'u Oloa fou i le tatou atunu'u. Ua latou la'uina e aunoa ma se totogi nei ituaiga o lapisi, ma fa'ae'e fo'i i Pusaoloa tetele ma toe ave'esea atu mai le atunu'u.

 

Ua fa'ailoa mai, ua tolu a latou uta ua mae'a ave'esea mai le atunu'u, peita'i, e le o mailoa fo'i ala e mafai ona fa'afeso'ota'ia ai lea Kamupani Va'a La'u Uta ma Oloa i se latou telefoni e mafai ona fa'ailoa i tagata e fa'alauiloa ai ala e mafai ai ona avatua au lapisi ina ia 'ave'esea mai le lou lumafale po'o autafa o le alatele. I le taimi nei, sa vala'auina le ASTCA mose telefoni, ae fa'ailoa mai e le o lisia se numera telefoni mo lea Kamupani Va'a. Peita'i o le Swire Shipping sa fa'atula'ia i le tatou atunu'u i le tausaga 2018.

 

O se fa'amatalaga mai le susuga Leota Kosimiti Latu sa ia fa'ailoa ai, o lo'o la'uina le otaota mo oloa tau eletoronisi uma lava mai Samoa e le Swire Shipping ma o lo'o faia lea tautua e aunoa ma sina totogi.