Ads by Google Ads by Google

Tala I Vaifanua


O atupanele a le ASPA o lo ua mae'a fa'atutuina i lo latou taualuga e sapalaia mai ai le eletise e fa'aaogaina e le aufaigaluega i ona ofisa uma i Tafuna. [ata: Leua Aiono Frost]

FOLASAGA - ASPA, KOLUSE MUMU & PUBLIC WORKS - SEMINA O SUIGA O LE TAU

 

O le toe aso o folasaga mo le Semina o Suiga o le Tau i le Atuvasa ma le Lalolagi atoa, sa tu'uina ai le avanoa i Matagaluega ma Sosaiete e matua iloga ona tele le latou vaega fai i le taimi e lutia ai le atunuu i ni fa'alavelave fa'afuase'i.

 

O i latou e ta'imua i galuega fesoasoani atu i tagata lautele e toe fa'atumau naumau e vave fausia o latou lotoifale ia malosi lelei ma toe saogalemu mo tagata uma o le aiga. E le gata i lea, ia toe fa'aauau galuega atia'e o le atunu'u, pe a mavae atu puapuaga.

 

O le Pulega o le Eletise ma le Suavai Taumafa (ASPA) o le uluai folasaga lea sa maimoaina fo'i e le au usufono le latou lotoa i Tafuna, lea o lo'o fa'aautu i ai a latou galuega uma e tautuaina le mamalu lautele o Amerika Samoa.

 

Ina ia feso'ota'i le asiasiga ma le taumafaiga ina ia aluga galuega fa'atino ma ala e fa'aitiitia ai le tele o a'afiaga o le Siomaga ona gaoioiga a tagata ma le latou fo'i matagaluega i a latou matafaioi o lo'o fa'atino. Ua leva ona amatalia e le ASPA a latou galuega e fealofani lelei ma le fa'aleleia o le SIomaga, e aofia ai le latou taumafaiga lea ina ia le toe fa'aaogaina le Suau'u e fa'aola ai Afi mo le Sapalai o le Eletise. Ua faliu i latou e gaosia mai e le Eletise i Panele e miti'ia ai ave malolosi o le La, ma fa'aliliu mai ai lea malosi'aga o se sapalai o le eletise.

 

"O le motu o Ofu ma le Motu o Olosega ua atoatoa nei le 100% ua ola mai i le Fa'ato'aga o Panele ua mae'a fa'atuina i Ofu. Ua mae'a fausia fo'i le fa'ato'aga panele i Ta'u, lea ua mae'a fa'aaogaina e Ta'u ma Faleasao. O se amataga fou lea o lo ua aga atu ina ia le toe fa'aaogaina le suau'u i afi tetele e sapalaia le Eletise, lea e matele ina sau ai i fafo tauasuasu e tele kasa o'ona o lo'o agai mai ai i le tatou siomaga,” o se faamatalaga lea a Edna Asalele Noga, o le Electrical Engineer mo le ASPA. Sa i ai nai fesili mai sui Pulenu'u sa auai i le semina, lea sa o'o ai ina fesiligia e lea tina pulenu'u, "Aisea ua faia ai nei fa'ato'aga panele i Ta'u ma Ofu, ae ua le faia muamua i Tutuila i le motu o lo'o to'atele na'ua tagata o lo'o alaalata'i ai, ma oi i le maualuluga o Pili eletise i masina taitasi?”

 

"Ona o tulaga olo'o fa'ata'ita'ia pea nei fo'i panele pe mata e lava ma totoe mo le sapalaiga o aiga e toatele, o le ala lea o le muamua fa'ata'ita'i i motu laiti fa'apea, ma ia gafatia ona sapalaia atoa e le atuga panele ua mafai ona tu'ufa'atasia i se ogaeleele e tusa ma le 10 eka i Ofu ma Ta'u fo'i,” o le tali lea a Noga.

 

"Lona lua o le taumafaiga lenei e ao ina fa'amatu'u mai ni eleele tetele pei o le 10 eka mai aiga, ina ia mafai ona fa'atutu ai panele, a leai e le faigofie i le tatou nei motu, aua ua tele ina nofoia fanua uma e auaiga. Ma le lona tolu ona o lo'o taumafai ona mata'i pe lelei atoatoa mo le soifuaga o auaiga po'o nu'u ma ekalesia, a iloa uma loa e le ASPA aluga o lea fo'i ituaiga o tautua, ona faigofie lava lea ona fa'amatu'u atu i afio'aga ma aiga i le tatou nei motu i Tutuila lea e to'atele ai i tatou. O le la'uina fo'i o le suau'u i le Manu'atele le isi afaina e ono va'ai lava i ai. I le tele o taimi, e faigata le fela'ua'iga o le suau'u i le vasa e aga'i atu i Manu'a. Afai o lea ituaiga o sapalai o le eletise e matua leai lava se suau'u e fa'aaoga ai, o se tasi lea o mea sili ona lelei ua mafai ona faia mo le Manu'atele fa'atasi ai ma le ASPA."

 

O se tasi o fesili mai se isi pulenu’u, ona o lo ua matauina ua le toe o'o se suau'u i le Manu'atele, ae aisea lava la e totogia ai fua pili uila a le vasega o aiga o lo'o fa'aaogaina le Eletise mai le fa'ato'aga i Ofu ma Ta'u?

 

O le tali, "O lo'o fa'atautaia lea fa'ato'aga Panele i se tau e $9 miliona na faatu ai, e le'i taitai lava ona o'o se seleni ua toe fa'aola mai i lea aotelega. Ona o lo'o faigaluega ai fo'i tagata i le mataituina lava o lea fa'ato'aga, e tatau lava ona totogia pili fa'atulaga a le ASPA mo le sapalai o le Eletise, o le fa'ato'aga panele fo'i o le meatotino a le ASPA, o lo'o sapalaia le eletise mo na afio'aga uma i le Manu'atele."

 

Ina ua mae'a le asiasiga, sa toe taliu ane le mamalu o le au usufono i le Potufono o le LDS i Malaeimi mo le folasaga a le Public Works, Rec Cross ma le Pago Tank Guy, ma mae'a ai loa le semina e tima'ia ai le mamalu lautele e aofia ai le fanau a'oga uma mai a'oga maualuluga i le teritori, ina ia latou maua'a i le fa'afitauli o lo ua feagai nei ma atunu'u uma o le lalolagi, "suiga matuia o le tau!"

 

SIITIA LE LAFOGA A LE FANAU I LE $1400. A LE TAMAITIITI

 

Ua fa'ailoa e le Ofisa o Lafoga le si'itaga o le totogi mo le tamaititi e to'atasi e i lalo ane o le 18 tausaga le matua, ua si'itia nei mai le $1,000 i le $1,400 i lalo o le Additional Child Tax Credit (ACTC), lea e fa’atupeina e le fetarale.

 

O lea si’itaga e amata i le 2019 mo i latou e faila lafoga mo le tausaga 2018.

 

O nisi o matua ua faailoa fo'i le agaga fiafia, ae o nisi fo'i ua fa'ailoa mai o latou taofi, "Ma'imau lava pe ana fai o le aotelega lava o lata fanau o le aofaiga atoa fo'i lena o le $1400 a le tamaititi e aumai, peita'i e matele lava ina itiiti ane nai lo lena aotelega."

 

O nisi ua fa'ailoa mai, "E, a si'isi'i ane lava sina mea, ua lava ta ita, ae afai e si'i mai lava iina, ae uma ane lava e le siitia ai lata mea e maua, se matua leaga fo'i!"

 

Ua fa'ailoa mai e na'o le tolu lava fo'i tamaiti e mafai ona talosaga e se ulugali'i pe afai e fa'aaogaina le ACTC lea e $1400 a le tamaitiiti e to'atasi.

 

PALEMIA O SAMOA: TOE FO'I ATU AUA LE OVA TAIMI I PAGO

 

I nisi o lipoti mai Samoa tuaoi, o lo’o fa’ailoa ai se saunoaga a le Palemia "Afai ua mae'a aso o lou pemita na e malaga atu ai i Pago Pago, toe fo'i mai, e le o ausage lou malo, e tatau ona e toe fo'i lelei mai, ae le o le avea ai o oe ma se tasi e solitulafono i le tatou usoga."

 

"Pe fai e te nofo umi iina, ua ese lagona e alia'i ia te oe, ua e manatu ua le lelei ona tausia oe iina e o tatou aiga, ae afai e te toe taliu lelei mai, e mafai lava ona e toe asiasi atu i se isi vaitaimi, ua gafatia fo'i ona vave talosagaina ou pepa e te nofo mau ai e si ou aiga! Aua le fa'amaasiasia e oe nai ou aiga, i lou o'o ane i se solitulafono ma ta'uvalea ai le igoa pele o si ou tua'a."

 

O le isi lava mea e naunau mai ai le afioga le Palemia ina ia toe fa'afo'i atu fanau a Samoa, "O lo'o i ai fo'i fa'ato'aga ma isi galuega lelei e mafai ona galulue ai, pe fa'alautele atili le latou atamai i ta'aloga, ma malaga ese atu ai i nsi malo e asiasi i ai, atonu e lelei atu na fo'i atunu'u i a latou sailiga nai lo Amerika Samoa. E laititi fo'i laufanua o Amerika Samoa e le tatau ona toe o mai fo'i i latou fa'aofiofi atu ai, ma tulaga fo'i o le tamaoaiga ina ia lava ma totoe mo e uma o lo'o ua alaala tumau i Amerika Samoa."

 

"Afai e le o fa'afouina lou pemita ina ia faaopoopo nisi aso e alaala ai outou i Pago Pago, e sili ai lou toe fo'i lelei mai. O se filifiliga tatau lena e te faia mo lou tagata taumafai."