Ads by Google Ads by Google

Tala I Vaifanua


O le ali'i ua augani mo sona avanoa, Umair Muhammad. [ata: Leua Aiono Frost]

MALAGA MAI PAKISTANA  - FIA MAUA SE MEA E NOFO AI

 

Pe afai e te lagona le alofa ia te ia, e tatau ai, aua o i tatou o tagata Kerisiano, peita'i e loloto atu ma ogaoga le afaina o i tatou i se isi taimi, pe afai e le sailia tonu, pe aisea na malaga mai ai Umair Muhammad mai lona nu'u na soifua a'e ai, a'oga ai, ma o lo'o i ai uma ona aiga i le taimi nei.

 

O Muhammard o se tasi na faigaluega i lona malo i se Matagaluega e fesoasoani i tagata nu'u e a'afia ini fa'ai'uga fai a le faigamalo a Pakisitana, ma ua avea ma mea faigata ai ona soifua lelei i Pakisitana, ma sa ia iloa ai, i lana galuega lea, le naunau o tagata e sosola ese mai Pakisitana ona o le faigata ona soifua ma le saogalemu pe fiafia fo'i.

 

O lea ua taunu’u i Amerika Samoa, e saili ai se to'omaga e mafai ai ona soifua saogalemu e aunoa ma ni ona pepa fa'amaumau. E o'o lava i lona tusi folau na malaga mai ai, o lona ata ma lona igoa, e ese na mea uma nai lo ona fa'amaumauga moni.

 

Ua mae'a fa'ato'ai lana talosaga i le Ofisa o le Loia Sili, ua fa'ailoa i ai e loia na ia talanoa ai i lena Ofisa, e leai se fesoasoani e mafai ona ofo atu e le Malo, e pau le fa'asinomaga, o le toe fo'i i le malo na ulufale mai ai i totonu o Amerika Samoa.

 

Na ulufale mai o ia mai Samoa, ae o pepa uma na talosaga ma maua mo ia e ulufale mai ai, sa tapena lea e le Travel Agency sa ia fa'afeso'ota'ia a'o i ai lea i Pakisitana e tapena ai sona visa e malaga ai i Amerika, ae le o Amerika Samoa.

 

O le aofai o le tupe na ia totogia i lea Kamupani Fai Visa e $15,000 - tupe Pakisitana. Peita'i e na te le iloaina fo'i le igoa o lea Kamupani Fai Visa, na'o lana uo i lona malo, sa ia fa'ailoa ia te ia e mafai ona maua ai lona visa e ulufale ai i Amerika pe a ia totogia lea tele o le tupe.

 

O ia ua fa'ato'a lua tausaga talu ona faigaluega i lana galuega lea, ina ia fesoasoani i tagatanu'u o Pakisitana e tapena lelei o latou pepa e malaga ese mai ai e fa'amautu i nisi malo o le lalolagi, pe afai ua lamatia tele o latou soifua i Pakisitana.

 

O le tele o ia tagata sa fesoasoani i ai Muhammad, o Kanata e maua atu ai le so'otaga ma fa'atonuga o le fa'atautaiga o latou pepa talosaga, ae umi lava se taimi o tatalia se tali.

 

Ua ia fa'amatala, na soifua a'e o ia o se Musalema. Peita'i ua ia va'aia i sauaga ma nei mea uma, ona ia iloa ai lea, e sili lava le soifua fa'a-Kerisiano ma le autu o le talitonuga i le Atua le Tama, e tutusa tagata uma i lona alofa ma lana fa'amagaloga.

 

"I le fa'aMusalema, e eseese mamao. Ua ou iloa e le tutusa tagata Kerisiano lea e fasiotia e le Musalema, ma tagata Kerisiano i le ola alolofa atu, ma fa'amagalo i le sese ua faia e se tasi,” o lana tala lea ma fofoga fa'asiasia.

 

E le o faigofie ia te ia ona fa'asalalau lenei tala, ae ua iloa e ia, na'o le lima aso o totoe o lona visa na ulufale mai ai, ma ua ia iloa, o le tautala lava i le sa'o e ao ina fai i le taimi nei.

 

O le tala lenei, o le talosaga ina ia mafai ona maua se mea e nofo ai, e le o ia o se tasi e pei o isi tagata uma o lona malo, sa latou fai taua, ma ua manunu'a ma maliliu ai alo e to'atele o Amerika.

 

E le'i faigofie ona maua le $15,000 sa totogia ai lona visa e sau ai. Sa faatau ma fa'amau le fanua o ona matua i Pakisitana ina ia mafai ona maua le tinoitupe, aua e le tele se vaega tupe e maua e le faleoloa o meataulima a lona tina, e faia mai lava i le tasi le potu o le latou fale, e totogia ai le tupe atoa.

 

"O lo'u tu'ua ai o lo'u aiga, sa matua fetagisi o'u matua ma nai o'u tei, aua e le'i faia so'u to'alua, ua iloa lelei, atonu ou te taunu'u i se leleiga, pe ou te taunu'u fo'i i se fa'aletonu la'u faigamalaga. O lea ua ou iloa nei, o lo'o o'u tu lava i le va, o se leleiga ma le nofo falepuipui aua ua leai ma se pepa e moni o pepa uma na ou ulufale mai ai,” o se tala fa'anoanoa lea a Muhammad i le Samoa News.

 

E i ai le ata o lona tusi folau moni o lo'o i le telefoni a Muhammad. Pau lea o se mea o lo'o mautu ia te ia e fa'ailoa ai lona tagata. Ae o nisi mea uma, e le'o fa'ailoaina se moni. Ua pau fo'i le telefoni a le Travel Agency sa tapenaina ona pepa malaga ma le pasese, ua na'o le telefoni #034 41 7109, ae afai e toe vala'au e ia lea telefoni i le taimi nei, ua le toe talia maia, ua foliga mai ua soloia.

 

I le taimi fo'i na to'ai taunu'u mai ai loa o ia i le tatou nei malo, sa fa'afeso'ota'ia e ia le Ofisa lea i le toe fa'aauauina o lana malaga mo Amerika, ae fa'ailoa mai ia te ia e le Ofisa fai visa lea, "Tia'i uma pepa na e malaga atu ai, e le o ni ou pepa!"

 

I luga fo'i o lana telefoni o lo'o ua tamau ai ona ata o lona fa'au'uga mai le Iunivesite o Mirpur, lea sa fa'au'u mai ai ma lona fa'ailoga i le "Electrical Engineering!"

 

Talitonu i ai pe leai, ae sa mafai fo'i ona fa'asoa atu i le ali'i mai Pakisitana, "Afai e amata mai sau malaga i ni faiga e le tusa ma le tulafono, e uma ane lava mea uma e patino i lena faigamalaga, e le o tusa ma le tulafono.”

 

O le ala lea sa sau ai, amata mai Pakisitana, uia Sigapoa, malaga sa'o mai ai i Fiti, ae fa'ato'a o'o mai ai i Samoa, ma ulufale mai ai loa i Amerika Samoa nei.

 

FA'ATULA'IA TALAVAI FESO'OTA'I MA AIGA & LATOU FA'AMAUMAUGA E LE DOH

 

Ina ua manuia le fa'atupega mo le 4 tausaga a le Matagaluega o le Soifua Maloloina, ua aga loa ina ia fa'atula'ia le Talavai Feso'ota'i ma Aiga ma Latou Fa'amaumauga mo gasegase e po'ia ai matua ma fanau.

 

I se pepa o fa’amatalaga o lo’o fa’ailoa ai e le Matagaluega le fa'atula'ia o lea Talavai ona o le manaomia tele ona sapaia ma feso'ota'i lelei ma Aiga o lo'o aofia ai fanau talavai po'o fanauiti fo'i e ao ina tausia fa'apitoa ona o gasegase tumau ua maua ai, ma ia maua mai fa'amaumauga uma, o latou a'oa'oga ma ala o mafai ona tausia lelei ai i latou ma fesoasoani fo'i fa'aletulafono ma fautuaga o latou maua i lo latou olaga atoa.

 

Ua i ai foi ala o feso'ota'iga e fa'ailoa ai o latou manatu fa'aalia, e fa'aigoaina "Fofoga o Aiga" ina ia feso'ota'i i latou ma fetufa'i o latou manatu.

 

E fa vaega ua fa'atulaga ai le tautua a le "DOH: Talavai mo Aiga" lea ua ave lava le fa'amuamua i le Vaega Muamua - Fa'amautu le Ta'ita'i o le Aiga.  Lua - Ia faia a'oa'oga fa'apitoa a sui ta'ito'atasi o aiga uma ina ia mautu lo latou iloa lelei ona tausia fa'apitoa o le tamaititi po'o le talavou ua gasegase fa'apitoa i totonu o le aiga.

 

Tolu - Fausia ni Taiala ma ni faiga e mafai ai ona feso'ota'i lelei ma Ofisa po'o Matagaluega o lo'o mafai ona sapaia pe fesoasoani fo'i i le tausiga fa'apitoa o le fanau po'o talavou ua i ai gasegase tumau fa'apitoa nei ina ia galulue fa'atasi ma Aiga. Fa - Lagolago ma fa'amautu fa'amaumauga mo i latou o lo'o o talavou po'o fanau ua maua i gasegase tumau fa'apitoa ia mafai ona fefa'asoa'i ma Matagaluega o lo'o maua ai fesoasoani mo i latou.

 

O nisi sa mafai ona tausoa fa'atasi le galuega na talosagaina ai lenei faatupega mo le DOH "Talavai mo Aiga" e aofia ai Sandra Scanlan le sui e ona le Founder of Parents of Children with Special Needs Network; Tafaimamao Tupuola o le Fa'atonu o le University Centers for Excellence in Developmental Disabilities; ma Teresa Atuatasi o le DOE Faia'oga o le SPEd.

 

O le aso 24 Ianuari 2019, na taunu’u ai i fanua Dr Glenn Gabbard, o se tasi o sui feso'ota'i a le "Fofoga o Aiga" ina ia fesoasoani e faatula'ia le “Family to Family Center” mo le vaiaso lava e tasi.

 

I le taimi nei o lo'o va'aia lenei talavai e Ipuniuesea Eliapo Unutoa, o ia lea o lo'o feso'ota'i lelei ma galulue fa'atasi ma le Rheumatic Heart Disease Prevention & Control Program i le Matagaluega o le Soifua Maloloina. Mo nisi fa’amatalaga telefoni DOH 633-4008.