“ENVIROBASSADORS” MAI SAMOA FESO'OTA'I MA FANAU AOGA

Ua i Amerika Samoa nei le aumalaga o talavou mai Samoa, ua fa'aigoaina le latou Sosaiete o le "ENVIROBASSADORS”.

O lo'o ta'ita'ia mai e le susuga Jorim-Paul Phillips, ma o a latou asiasiga e fia feso'ota'i ma ni sosaiete e le o ni lala o se matagaluega o le Malo, ae o nisi o fanau talavou i a'oga maualuluga i le teritori e agaga fo'i i latou i le latou 'au'au na mafua ai ona fa'atula'ia le latou sosaiete, "Ia Mataituina le taou Siomaga i vaitau nei o le tele o fa'afitauli ogaoga ma suiga tetele o le tau ua tatou matauina ma soifua ai."

O le latou fa'amoemoe, o le galulue ma tu'ufa'atasia lea o fa'amoemoe ina ia mafai ona fasaga'i ma fa'afitauli o le Suiga o le Tau, ma e ao ina galulue feso'ota'i i latou ma so'o se Asosi a tama ma teine talavou o le Atu Samoa, ina ia malosi le latou mau, ia mataituina fesuia'iga anoanoa'i o le Tau ua i ai nei.

O lo'o asiasi i latou i a'oga, ae maise fo'i o le Ofisa Autu o le ASEPA lea sa latou asia i le aso Faraile ua tuana'i, ina ua latou tulaueleele i le teritori.

O se tala mai a le ali'i ta'ita'i malaga ia Phillips, o lo'o fa'atutu le latou taumafaiga lenei i le vasega o talavou o lo'o a'oa'oga i a'oga maualuluga i le atunu'u, ia mafai ona latou galulue fa'atasi ma so'otau'au i nei fa'afitauli.

I le aso Faraile sa latou asia ai Leone i le taeao lava, ona soso'o lea ma le fetufa'iga ma le Manumalo Baptist Academy i le aoauli, a tomuli ai i le asiasiga i le ASEPA ma talanoa ma le susuga le fa'atonu, Fa'amao Asalele Jr.

O le aso Gafua na malolo ai i tatou peita'i sa latou taumafai i se avanoa ma le Samoana High ae o le ulua'i avanoa ua maua lea mo le Nuuuli VocTech High i le itula i le taeao ae avanoa ma le Pacific Horizons i le aoauli.

O le aso Lulu, le latou toe aso lea e maua ai avanoa ua fa'atulaga mo Fa'asao Marist i le taeao ona toe asiasi lea ia Leone. O le South Pacific Academy  i le aoauli ma mae'a ai latou a'oga e asia. Ae o lo'o avanoa pea le itula o le taeao o le aso Tofi, pe mafai ona maua se avanoa mo Samoana ma Fagaitua.

O nisi o mea o lo'o mataituina e i latou, o ala o lo'o mafai ona toe fa'aleleia ai le si'omaga pe a mae'a afa tetele, galulolo ma le so'ona vevela o le la, ae maise o afaina fo'i le gataifale ona o suiga o le la.

O le latou o'o mai fo'i e manatu ai ina ia fa'amalosia le galulue so'ofa'atasi o ni sosaiete a talavou ua latou naunau e fa'aleleia le si'omaga ma galulue malosi fo'i e taofia le fa'aleagaina pea o le si'omaga ona o le so'ona ola fa'atamala o tagata o soifua i le atunu'u e ala i lo latou sona tia'i solo o lapisi e le mafai ona pala, ma le fa'alapisi i le tele o auvai ma laufanua e ono tatafe atu aga'i i le gataifale ma fa'afaula'i mai ai, e fa'aleagaina ai le amu ma le a'au.

"Afai e so'ofa'atasi le autalavou e tete'e i le fa'aleagaina pea o le gataifale, laufanua ma le si'omaga, e mautinoa se olaga lelei mo le latou augatupulaga i le lumana'i ma isi augatupulaga fai mai o Samoa na lua,” o se mau lea ua malaga mai ma i latou nei.

LIMA O LE 'VICE & NARCOTICS' SUESUEGA O LE PUSA TUPE

Ua fa'ailoa mai, ua o'o nei i a'ao o le Vice & Narcotics a le Matagaluega o Leoleo le suesuega o le afuaga o le i ai o lea pusa tupe i luga o le va'a na malaga i Upolu e aumaia le latou Inisinia fa'apitoa, ae o lea ua malaga mai le pusa tupe.

O le va'a na malaga o se tasi o va'a fagota na toetoe atoa le po atoa o malaga i Samoa i le amataga o le vaiaso na te'a.

O le va'a fagota lea e fa'aigoaina o le "Lady Ann" ua tau fai te'ena e lona Kapeteni fa'atasi ma le tamaloa e ona lea va'a, lona iloa o se mea i lea pusa tupe ua umia nei e leoleo.

Ua fa'ailoa mai, o lea pusa tupe ua na'o pepa ta'i $100, ae o le aotelega o lea tinoitupe atoa e sili atu ma le $100,000.

O le tele o le tupe e mafai ona aumaia e se tasi i totonu o Amerika Samoa e 10,000, peita'i afai e sili atu se tinoitupe e aumaia i totonu o Amerika Samoa e ao la ina lipotia, e pei ona i ai le tulafono.

O le aso Lulu o le vaiaso na te'a na toe tulaueleele mai ai le va'a Lady Ann mai Samoa ma fa'atautaia loa le sailiga lea a le Ofisa o Tiute, lea e maua ane ai le pusa tupe. O le ali'i faipisinisi lea e le'o mafai ona fa'ailoa lona suafa, ae sa i ai fo'i lona Fale Teuoloa i Pago Pago ma le faleoloa na mu i nai tausaga ua te'a.

VA'ALELE FOU A LE SAMOA AIRWAYS - 737MAX9

Ua faailoa mai ua i ai nei le sui o le Kamupani mai Los Angeles Kalefonia, CEO Steven Udvar-Hazy, ina ia sainia le feagaiga malilie fa'atasi a i latou le kamupani o lo'o lisia mai ai le va'alele fou 737-Max 9 a le Samoa Airways lea o le a tulaueleele e le o toe mamao i Samoa. Ma ua mae'a sainia nei pepa fa'amaonia mo lea feagaiga fa'apisinisi o va'alele mo feoa'iga i le ea.

O le tala mai, pe afai e taulaueleele lea va'alele tele i Faleoloa le malae va'alele o Samoa, o le va'alele muamua lea o lea fo'i ituaiga o le a femalaga'i i malo o le Pasefika.

O se tautalaga a le ali'i Palemia o Samoa, sa ia fa'ailoa ai, o lenei galuega ua iva tausaga o lo'o afuafua mai, ina ia gafatia e Samoa ona lisia maia lea ituaiga o va'alele mo faigamalaga a tagata o Samoa ma isi tagata o atumotu o le Pasefika/

O Udvar-Hazy o ia fo'i na amatalia lea pisinisi ua galulue feso'ota'i nei ma Samoa i lana lea aseta, ma ua fa'ailoa fo'i e le ali'i ta'ita'ifono o le Komiti Fa'afoe o le Samoa Airways, Feesago, George Fepulea'i, "O le mafuaga lea o le malaga mai o lea ali'i faipisinisi va'alele i Samoa, ina ia sainia pepa nei o le MOU ma Samoa fa'apea fo'i ona ta'ita'i."

O lenei va'alele, ua avea ai Samoa ma atunu'u muamua i le vasa pasefika o le a fealua'i ai lenei va'alele a le Boeing Family, e o'o lava ia Niu Sila ma Ausetalia, o Samoa lava lea ua muamua i le 737MAX9.

O nisi o nei mea fa'apitoa ua ofo mai a le kamupani mo le Samoa Airways ua aofia ai le maliliega ina ia fa'apa'u pea pasese femalaga'i i le vaitau e le to'atele ai nisi e femalaga'i, fa'atasi ma vaitaimi e matua fa'atumulia ai nofoa uma i so'o se malaga, ma le avanoa fo'i ua ofoina i pailate ma tama'ita'i o va'alele e faia ai a'oa'oga fa'apitoa i tomai mo'omia e tautuaina ai le mamalu fegasoloa'i i luga o latou va'alele nei.